ജിദ്ദ: മലബാറിലെ പ്രവാസികളുടെയും ഉംറ തീര്‍ത്ഥാടകരുടെയും ദീര്‍ഘകാലത്തെ കാത്തിരിപ്പിന് വിരാമം. ഇന്ത്യയിലെ അതിവേഗം വളരുന്ന വിമാനക്കമ്പനിയായ ആകാശ എയര്‍ മാര്‍ച്ച് 13 മുതല്‍ ജിദ്ദ - കോഴിക്കോട് സെക്ടറില്‍ നേരിട്ടുള്ള സര്‍വീസ് ആരംഭിക്കുന്നു. കുറഞ്ഞ നിരക്കിലും മികച്ച സൗകര്യങ്ങളോടും കൂടിയുള്ള ഈ സര്‍വീസ് വടക്കന്‍ കേരളത്തിലെ പ്രവാസികള്‍ക്ക് വലിയ ആശ്വാസമാകും.

യാത്രക്കാരുടെ സൗകര്യം കണക്കിലെടുത്ത് പകല്‍ സമയത്താണ് വിമാനത്തിന്റെ ഷെഡ്യൂള്‍ ക്രമീകരിച്ചിരിക്കുന്നത്. ജിദ്ദ - കോഴിക്കോട്: രാവിലെ 9:10-ന് പുറപ്പെട്ട് ഇന്ത്യന്‍ സമയം വൈകുന്നേരം 5:30-ന് കരിപ്പൂരിലെത്തും. കോഴിക്കോട് - ജിദ്ദ: വൈകുന്നേരം 6:55-ന് പുറപ്പെട്ട് രാത്രി 10:50-ന് ജിദ്ദയിലെത്തും. 186 സീറ്റുകളുള്ള അത്യാധുനിക ബോയിംഗ് 737 മാക്‌സ് 8 വിമാനങ്ങളാണ് ഈ റൂട്ടില്‍ സര്‍വീസ് നടത്തുക.

വിശുദ്ധ റമദാന്‍ മാസത്തിലെയും തുടര്‍ന്നു വരുന്ന ചെറിയ പെരുന്നാള്‍ അവധിക്കാലത്തെയും തിരക്ക് പരിഗണിക്കുമ്പോള്‍ പുതിയ സര്‍വീസ് പ്രവാസികള്‍ക്ക് വലിയൊരു അനുഗ്രഹമാണ്. സീറ്റുകളുടെ കുറവും അമിത വിമാനക്കൂലിയും മൂലം വലയുന്ന സാധാരണക്കാരായ യാത്രക്കാര്‍ക്ക് ആകാശ എയറിന്റെ വരവ് ആശ്വാസം പകരും. വരും ദിവസങ്ങളില്‍ കൂടുതല്‍ അന്താരാഷ്ട്ര നഗരങ്ങളിലേക്ക് സര്‍വീസ് വ്യാപിപ്പിക്കുമെന്ന് കമ്പനി അധികൃതര്‍ സൂചിപ്പിച്ചു.

കോഴിക്കോട് വിമാനത്താവളത്തിന്റെ വികസനത്തിന് ആവേശം പകരുന്ന ഈ തീരുമാനത്തിന് പിന്നില്‍ ജനപ്രതിനിധികളുടെയും ആകാശ എയര്‍ ഉന്നത ഉദ്യോഗസ്ഥരായ പ്രതീക് ശര്‍മ്മ, പ്രിയ മെഹ്റ, മുരളി മേനോന്‍, സുധീഷ് മംഗലശ്ശേരി എന്നിവരുടെയും നിരന്തര ഇടപെടലുകളുണ്ട്. കഴിഞ്ഞ വര്‍ഷം ജൂണ്‍ മുതല്‍ കൊച്ചിയില്‍ നിന്ന് ആകാശ എയര്‍ ജിദ്ദയിലേക്ക് സര്‍വീസ് നടത്തുന്നുണ്ട്.

ഈ വര്‍ഷത്തെ ഹജ്ജ് സര്‍വീസിലും ആകാശ എയര്‍ നിര്‍ണ്ണായക പങ്കുവഹിക്കുമെന്നാണ് റിപ്പോര്‍ട്ടുകള്‍. കരിപ്പൂരില്‍ നിന്നുള്ള ഹജ്ജ് വിമാനങ്ങള്‍ ആകാശ എയര്‍ മുഖേനയാകും സര്‍വീസ് നടത്തുക.