യാമ്പു: നാല്‍പതു വര്‍ഷത്തിലേറെക്കാലത്തെ പ്രവാസം അവസാനിപ്പിച്ച് നാട്ടിലേക്ക് മടങ്ങിയ പരപ്പത്തൊടി മൊയ്ദീന്‍ (69) നാട്ടില്‍ നിര്യയാതനായി. മലപ്പുറം പെരുമണ്ണ ക്ലാരി ചെട്ടിയാംകിണര്‍ സ്വദേശിയായ അദ്ദേഹം ചികിത്സയിലിരിക്കെ ചൊവ്വാഴ്ച രാവിലെയാണ് നിര്യാതനായത്.
യാമ്പുവിലെ പ്രമുഖ കായിക സംഘടനയായ 'റദ്വ സൗദിയ' സ്‌പോര്‍ട്‌സ് ആന്‍ഡ് ഗെയിംസ് ക്ലബില്‍ 41 വര്‍ഷത്തോളമാണ് മൊയ്ദീന്‍ സേവനമനുഷ്ഠിച്ചത്. സ്വദേശികള്‍ അദ്ദേഹത്തെ സ്‌നേഹത്തോടെ 'മൊഹി' എന്നാണ് വിളിച്ചിരുന്നത്. ക്ലബിന്റെ വളര്‍ച്ചയില്‍ നിര്‍ണായക പങ്കുവഹിച്ച അദ്ദേഹം, അവിടെ കായിക പരിശീലനത്തിനെത്തിയിരുന്ന തലമുറകളുടെ പ്രിയങ്കരനായിരുന്നു. കുട്ടിക്കാലത്ത് ക്ലബില്‍ കളിക്കാനെത്തിയിരുന്ന പലരും പിന്നീട് ഉന്നത ഉദ്യോഗസ്ഥരും ക്ലബ് ഭാരവാഹികളുമായി മാറിയെങ്കിലും മൊയ്ദീനോടുള്ള ആദരവില്‍ മാറ്റമുണ്ടായില്ല. ഒരു വിദേശ തൊഴിലാളി എന്നതിലുപരി ഒരു കുടുംബാംഗത്തെപ്പോലെയാണ് അവര്‍ അദ്ദേഹത്തെ കണ്ടിരുന്നത്.
2024 ആഗസ്റ്റില്‍ മൊയ്ദീന്‍ പ്രവാസം അവസാനിപ്പിച്ച് മടങ്ങുമ്പോള്‍ ക്ലബ് നല്‍കിയ ഹൃദ്യമായ യാത്രയയപ്പ് ഏറെ ശ്രദ്ധിക്കപ്പെട്ടിരുന്നു. അദ്ദേഹത്തിന്റെ ചിത്രം പതിപ്പിച്ച കേക്ക് മുറിച്ചും, തോളിലേറ്റിയും ഗ്രൗണ്ടിലൂടെ നടത്തിയ പ്രദക്ഷിണം സൗദിയിലെ പ്രാദേശിക മാധ്യമങ്ങളിലും സോഷ്യല്‍ മീഡിയയിലും വലിയ വാര്‍ത്തയായിരുന്നു. സന്ദര്‍ശന വിസയില്‍ വീണ്ടും കാണാമെന്ന വാഗ്ദാനം നല്‍കിയാണ് അദ്ദേഹം പ്രിയപ്പെട്ടവരോട് വിടപറഞ്ഞത്. 23-ാം വയസ്സില്‍ ഹായിലില്‍ പ്രവാസം തുടങ്ങിയ അദ്ദേഹം പിന്നീട് യാമ്പുവിലേക്ക് മാറുകയായിരുന്നു. 41 വര്‍ഷവും ഒരേ സ്ഥാപനത്തില്‍ തന്നെ ജോലി ചെയ്തു എന്നത് അദ്ദേഹത്തിന്റെ വിശ്വസ്തതയുടെയും അവിടുത്തെ ഉടമകളുമായുള്ള ബന്ധത്തിന്റെയും തെളിവാണ്.
പരേതനായ പറപ്പത്തൊടി കുഞ്ഞലവി ഹാജിയുടെയും ആയിഷ ഹജ്ജുമ്മയുടെയും മകനാണ്. ഭാര്യ: ഖദീജ വെള്ളത്തുമാട്ടില്‍. മക്കള്‍: അബ്ദുല്‍ ജബ്ബാര്‍ (യാമ്പു), ജാബിര്‍ (ദുബായ്), ജസീം ഫര്‍സാന്‍, ഫര്‍ഹാന ജെബിന്‍. മരുമക്കള്‍: ഷിബിന്‍ തിരൂര്‍, ഷമീല വേങ്ങര, ഹസ്‌ന. സഹോദരങ്ങള്‍: മുഹമ്മദ്, സൈദലവി, അസൈനാര്‍, അഷ്റഫ്, ഫക്രുദ്ദീന്‍ (നാലു പേരും യാമ്പു), ബിയ്യുമ്മു, ഫാത്തിമ, സഫിയ, സൈനബ, സുഹ്‌റ.
Related News
