ജിദ്ദ: കെ.പി.സി.സി.യുടെ ഔദ്യോഗിക പ്രസിദ്ധീകരണ വിഭാഗമായ പ്രിയദര്‍ശിനി പബ്ലിക്കേഷന്‍സിന്റെ ജിദ്ദ ചാപ്റ്റര്‍ പ്രവര്‍ത്തനോദ്ഘാടനം കെ.പി.സി.സി ജനറല്‍ സെക്രട്ടറി അഡ്വ. ബി.ആര്‍.എം ഷഫീര്‍ നിര്‍വ്വഹിച്ചു. വായനയും എഴുത്തും സാഹിത്യവും മനുഷ്യനെ മാനസികമായി കരുത്തനാക്കുന്ന ശക്തികളാണെന്ന് അദ്ദേഹം അഭിപ്രായപ്പെട്ടു.
സാംസ്‌കാരികവും രാഷ്ട്രീയവുമായ അവബോധം ജനങ്ങളില്‍ എത്തിക്കുക എന്ന ലക്ഷ്യത്തോടെയാണ് പ്രിയദര്‍ശിനി പബ്ലിക്കേഷന്‍സ് പ്രവര്‍ത്തിക്കുന്നത്. ഇന്ത്യന്‍ നാഷണല്‍ കോണ്‍ഗ്രസിന്റെ ചരിത്രം, സ്വാതന്ത്ര്യസമര പോരാട്ടങ്ങള്‍, ഗാന്ധിയന്‍ ദര്‍ശനങ്ങള്‍, നെഹ്റൂവിയന്‍ ആശയങ്ങള്‍ എന്നിവ വരുംതലമുറയ്ക്ക് പകര്‍ന്നുനല്‍കുന്നതില്‍ ഈ സ്ഥാപനം നിര്‍ണ്ണായക പങ്ക് വഹിക്കുന്നുണ്ടെന്നും അദ്ദേഹം കൂട്ടിച്ചേര്‍ത്തു.
ഒരു നല്ല പുസ്തകം നമ്മെ അറിവിലേക്കും ചിന്തയിലേക്കും നയിക്കുമ്പോള്‍, എഴുത്ത് നമ്മുടെ വികാരങ്ങള്‍ക്കും ആശയങ്ങള്‍ക്കും ശബ്ദം നല്‍കുന്നു. സാഹിത്യം നമ്മുടെ ഭാഷയെയും സംസ്‌കാരത്തെയും തലമുറകളിലൂടെ ബന്ധിപ്പിക്കുന്നു. പ്രവാസജീവിതത്തില്‍ ഈ മൂല്യങ്ങള്‍ക്ക് പ്രത്യേക പ്രാധാന്യമുണ്ട്. സ്വന്തം നാടിനെയും ഭാഷയെയും വിട്ടുനില്‍ക്കുമ്പോള്‍, മലയാള സാഹിത്യം നമ്മെ വേരുകളോട് ചേര്‍ത്തുനിര്‍ത്തുന്നു. വായന മാനസിക സമ്മര്‍ദ്ദം കുറയ്ക്കാനും എഴുത്ത് ഒറ്റപ്പെടലിനെ അതിജീവിക്കാനും സഹായിക്കും. മലയാള ഭാഷയില്‍ എഴുതുകയും വായിക്കുകയും ചെയ്യുന്നത് നമ്മുടെ സാംസ്‌കാരിക പൈതൃകം നിലനിര്‍ത്താനും പുതുതലമുറയ്ക്ക് കൈമാറാനും അനിവാര്യമാണെന്നും അദ്ദേഹം ഓര്‍മ്മിപ്പിച്ചു.
ഒ.ഐ.സി.സി റീജ്യണല്‍ പ്രസിഡന്റ് ഹക്കീം പാറക്കല്‍ ചടങ്ങില്‍ അദ്ധ്യക്ഷത വഹിച്ചു. കോഓര്‍ഡിനേറ്റര്‍ സിമി അബ്ദുല്‍ ഖാദര്‍ പ്രിയദര്‍ശിനി പബ്ലിക്കേഷന്‍സിന്റെ പ്രവര്‍ത്തനങ്ങളെക്കുറിച്ച് വിശദീകരിച്ചു. അസ്ഹാബ് വര്‍ക്കല, റീജ്യണല്‍ ട്രഷറര്‍ ഷെരീഫ് അറക്കല്‍, ബുറൈദ പ്രസിഡന്റ് അബ്ദുറഹ്‌മാന്‍,പ്രശസ്ത എഴുത്തുകാരി സൗദ കാന്തപുരം എന്നിവര്‍ ആശംസകള്‍ നേര്‍ന്നു.റീജ്യണല്‍ ഭാരവാഹികള്‍ നാഷണല്‍ ഭാരവാഹികള്‍ ജില്ലാ പ്രസിഡന്റ് മാര്‍ ഭാരവാഹികള്‍ ഹെല്‍പ് ഡെസ്‌ക് നേതാക്കള്‍ വനിതാ നേതാക്കള്‍ പ്രിയദര്‍ശിനി കല കായിക നേതാക്കള്‍ ബാലവേദിയുടെ കുട്ടികള്‍.പ്രിയദര്‍ശിനി പബ്ലിക്കേഷന്‍സ് കോഓര്‍ഡിനേറ്റര്‍ സുജു തേവരുപറമ്പില്‍ സ്വാഗതവും നജീബ് വെഞ്ഞാറമ്മൂട് നന്ദിയും പറഞ്ഞു.
Related News
