റിയാദ്- കസ്റ്റംസ് നിയമലംഘനങ്ങള്‍ സ്വയം വെളിപ്പെടുത്തുന്നവര്‍ക്കായി സൗദി സക്കാത്ത്, ടാക്‌സ്, കസ്റ്റംസ് അതോറിറ്റി പുതിയ നിയമങ്ങള്‍ പുറപ്പെടുവിച്ചു. അതോറിറ്റി പിഴവ് കണ്ടെത്തുന്നതിന് മുന്‍പ് തന്നെ വ്യക്തികളോ സ്ഥാപനങ്ങളോ അത് സ്വയം വെളിപ്പെടുത്തിയാല്‍ പിഴകളില്‍നിന്ന് പൂര്‍ണ്ണമായ ഒഴിവാക്കല്‍ ലഭിക്കും എന്നതാണ് ഇതിന്റെ പ്രധാന ആകര്‍ഷണം.
നികുതിദായകര്‍ക്ക് തങ്ങളുടെ കസ്റ്റംസ് സ്റ്റാറ്റസ് സ്വയം തിരുത്താനുള്ള അവസരം നല്‍കുക, സുതാര്യത വര്‍ദ്ധിപ്പിക്കുക, നിയമങ്ങള്‍ കൃത്യമായി പാലിക്കാന്‍ പ്രേരിപ്പിക്കുക എന്നിവയാണ് പുതിയ തീരുമാനത്തിന്റെ ലക്ഷ്യം .
വെളിപ്പെടുത്താവുന്ന പിഴവുകള്‍ ഇവയാണ്: സാധനങ്ങളുടെ വര്‍ഗ്ഗീകരണത്തില്‍ (Classification) വന്ന തെറ്റുകള്‍, സാധനങ്ങളുടെ വില നിശ്ചയിക്കുന്നതിലെ പിഴവുകള്‍, ഏതു രാജ്യത്തെ ഉല്‍പന്നമാണ് എന്നത് സംബന്ധിച്ച തെറ്റായ വിവരങ്ങള്‍, നികുതി കുറയാന്‍ കാരണമായ മറ്റേതെങ്കിലും തെറ്റായ വിവരങ്ങള്‍.
കസ്റ്റംസ് കള്ളക്കടത്തുമായി ബന്ധപ്പെട്ട കേസുകള്‍ക്ക് ഈ ഇളവ് ലഭിക്കില്ല. കൂടാതെ, അതോറിറ്റി ഇതിനകം പരിശോധനയോ അന്വേഷണമോ ആരംഭിച്ച കേസുകളാണെങ്കില്‍ ഈ ആനുകൂല്യം പ്രയോജനപ്പെടുത്താന്‍ കഴിയില്ല.
പിഴവ് കണ്ടെത്തിയ ഉടന്‍ തന്നെ അതോറിറ്റിയെ അറിയിക്കണം. ZATCAയുടെ ഔദ്യോഗിക വെബ്‌സൈറ്റ് വഴി ഓണ്‍ലൈനായി അപേക്ഷ സമര്‍പ്പിക്കാം. കസ്റ്റംസ് ഡിക്ലറേഷന്‍ രേഖകള്‍, തെറ്റിന്റെ സ്വഭാവം, അടയ്ക്കാനുള്ള നികുതി തുക തുടങ്ങിയ വിവരങ്ങള്‍ സഹിതം അപേക്ഷിക്കണം. അപേക്ഷ അംഗീകരിച്ച് 30 ദിവസത്തിനുള്ളില്‍ ബാക്കിയുള്ള യഥാര്‍ത്ഥ കസ്റ്റംസ് ഡ്യൂട്ടി തുക അടച്ചു തീര്‍ക്കണം.
ഔദ്യോഗിക ഗസറ്റായ ഉമ്മുല്‍ ഖുറയില്‍ വിജ്ഞാപനം വന്ന് 30 ദിവസത്തിന് ശേഷം പുതിയ നിയമങ്ങള്‍ പ്രാബല്യത്തില്‍ വരും. അറിഞ്ഞോ അറിയാതെയോ കസ്റ്റംസ് രേഖകളില്‍ വന്ന പിഴവുകള്‍മൂലം ഭാവിയില്‍ ഉണ്ടായേക്കാവുന്ന വലിയ പിഴകളില്‍ നിന്നും നിയമനടപടികളില്‍ നിന്നും രക്ഷപ്പെടാന്‍ ബിസിനസുകാര്‍ക്ക് ലഭിക്കുന്ന വലിയൊരു അവസരമാണിത്.
.jpg)
Related News
