തിരുവനന്തപുരം: അംശദായ കുടിശ്ശിക കാരണം പ്രവാസി ക്ഷേമനിധി പെന്‍ഷന്‍ പദ്ധതിയില്‍ അര്‍ഹത നഷ്ടപ്പെട്ടവര്‍ക്ക് പെന്‍ഷന്‍ പുനഃസ്ഥാപിക്കാന്‍ തീരുമാനിച്ചെന്ന് കേരള പ്രവാസി കേരളീയ ക്ഷേമ ബോര്‍ഡ് ചെയര്‍മാന്‍ അഡ്വ ഗഫൂര്‍ പി ലില്ലീസ് അറിയിച്ചു. അര്‍ഹത നഷ്ടപ്പെട്ട അംഗങ്ങള്‍ മുഖ്യമന്ത്രിക്കും, പ്രവാസി ക്ഷേമനിധി ബോര്‍ഡിനും, സര്‍ക്കാറിനും സമര്‍പ്പിച്ച നിവേദനങ്ങളില്‍ മാനുഷിക പരിഗണന മുന്‍നിര്‍ത്തിയാണ് തീരുമാനം.

2025 ഒക്ടോബര്‍ 1 മുതല്‍ 2026 ജനുവരി 31 വരെ പെന്‍ഷന്‍ തീയതിയില്‍ ഒരു വര്‍ഷത്തില്‍ താഴെ അംശദായ കുടിശ്ശിക ഉണ്ടായിരുന്ന അംഗങ്ങള്‍ക്കാണ് ഈ അവസരം ലഭിക്കുകയെന്നും അദ്ദേഹം വ്യക്തമാക്കി. അത്തരത്തിലുള്ള അംഗങ്ങള്‍ക്ക് കുടിശ്ശിക തുക അടച്ചുതീര്‍ക്കുന്നതിനു 2026 ഫെബ്രുവരി 28 വരെ അവസരമുണ്ട്. ഈ സമയപരിധിക്കുളളില്‍ നടപടിക്രമങ്ങള്‍ പൂര്‍ത്തിയാക്കി പെന്‍ഷന്‍ അപേക്ഷ സമര്‍പ്പിക്കേണ്ടതുമാണ്. 2008 ലെ കേരള പ്രവാസി കേരളീയരുടെ ക്ഷേമ നിയമത്തിലെ വ്യവസ്ഥകള്‍ പ്രകാരം, ഒരു ക്ഷേമനിധി അംഗം പെന്‍ഷന്‍ അര്‍ഹത നേടുന്നതിന്, പെന്‍ഷന്‍ തീയതിക്കുള്ളില്‍ അംഗത്വകാലയളവില്‍ ബാധകമായ എല്ലാ അംശദായങ്ങളും അടച്ചുതീര്‍ക്കേണ്ടതാണെന്നും ഗഫൂര്‍ പി ലില്ലീസ് പറഞ്ഞു.