റിയാദ്: ചരിത്രം പുനര്‍വ്യാഖ്യാനം ചെയ്ത് ജനങ്ങളുടെ ചിന്താശേഷിയെ നിയന്ത്രിക്കുന്ന ഫാസിസ്റ്റ് രാഷ്ട്രീയമാണ് ഇന്നത്തെ ഇന്ത്യയില്‍ ശക്തിപ്പെടുന്നതെന്ന് എഴുത്തുകാരനും സാമൂഹിക നിരീക്ഷകനുമായ ജോസഫ് അതിരുങ്കല്‍ പറഞ്ഞു. ഒ.ഐ.സി.സി റിയാദ് സെന്‍ട്രല്‍ കമ്മിറ്റിയുടെ നേതൃത്വത്തില്‍ ബത്ഹ സബര്‍മതിയില്‍ സംഘടിപ്പിച്ച 77-ാം റിപ്പബ്ലിക് ദിനാഘോഷ പരിപാടിയില്‍ മുഖ്യപ്രഭാഷണം നടത്തുകയായിരുന്നു അദ്ദേഹം.
സ്വാതന്ത്ര്യ സമര ചരിത്രത്തെ ബോധപൂര്‍വം മായ്‌ച്ചെഴുതുകയും, സമര സേനാനികളെ ചരിത്ര താളുകളില്‍ നിന്ന് ഒഴിവാക്കുകയും, രാജ്യത്തെ ഒറ്റിക്കൊടുത്തവരെ മഹത്വവല്‍ക്കരിക്കുകയും ചെയ്യുന്ന സമീപനം ഇന്ത്യന്‍ ജനാധിപത്യത്തിന്റെ അടിസ്ഥാന മൂല്യങ്ങളെ തകര്‍ക്കുന്നതാണെന്ന് അദ്ദേഹം പറഞ്ഞു. ബഹുസ്വര ഇന്ത്യയെ തീവ്ര ഹിന്ദുത്വ രാഷ്ട്രീയത്തിന് കീഴ്‌പ്പെടുത്താനുള്ള നീക്കമാണ് ഇതിലൂടെ നടപ്പാക്കപ്പെടുന്നതെന്നും അദ്ദേഹം ചൂണ്ടിക്കാട്ടി.
ഫാസിസം അതിന്റെ രാഷ്ട്രീയ രൂപത്തിലൂടെ ചരിത്രത്തെയും ചിന്തയെയും പുനര്‍നിര്‍മിക്കുകയാണെന്നും, അതിന്റെ ഫലമായി രാജ്യത്ത് അസഹിഷ്ണുതയും വിദ്വേഷ രാഷ്ട്രീയവും വര്‍ധിക്കുകയാണെന്നും ജോസഫ് അതിരുങ്കല്‍ പറഞ്ഞു. എഴുത്തുകാരെയും ബുദ്ധിജീവികളെയും കലാകാരന്മാരെയും ഭയപ്പെടുത്തുകയും നിശ്ശബ്ദരാക്കുകയും ചെയ്യുന്നത് ഫാസിസ്റ്റ് ഭരണകൂടത്തിന്റെ സ്ഥിരം തന്ത്രമാണെന്നും അദ്ദേഹം വിമര്‍ശിച്ചു.
പരിപാടി ഉദ്ഘാടനം ചെയ്ത ഒ.ഐ.സി.സി റിയാദ് സെന്‍ട്രല്‍ കമ്മിറ്റി പ്രസിഡന്റ് സലീം കളക്കര, മതത്തിന്റെയും ജാതിയുടെയും ഭക്ഷണത്തിന്റെയും പേരില്‍ മനുഷ്യരെ ഇല്ലായ്മ ചെയ്യുന്ന സാഹചര്യം ജനാധിപത്യത്തിനുള്ള ഗുരുതര ഭീഷണിയാണെന്ന് പറഞ്ഞു. അധികാരത്തിന്റെ അഴുക്കുകള്‍ പുറത്ത് കൊണ്ടുവരേണ്ട മാധ്യമങ്ങളെ നിയന്ത്രിച്ച് സത്യം പറയുന്നവരെ രാജ്യദ്രോഹികളായി ചിത്രീകരിക്കുന്ന പ്രവണത ശക്തമാകുകയാണെന്നും അദ്ദേഹം വിമര്‍ശിച്ചു.
വൈസ് പ്രസിഡന്റ് അമീര്‍ പട്ടണത്ത് ആമുഖ പ്രഭാഷണം നടത്തി. പ്രോഗ്രാം കണ്‍വീനര്‍ ബാലു കുട്ടന്‍ അധ്യക്ഷത വഹിച്ചു. ഒ.ഐ.സി.സി നേതാക്കളായ രഘുനാഥ് പറശ്ശിനിക്കടവ്, മുഹമ്മദലി മണ്ണാര്‍ക്കാട്, ഷുക്കൂര്‍ ആലുവ, ഷംനാദ് കരുനാഗപള്ളി, ശിഹാബ് കൊട്ടുകാട്, യഹിയ കൊടുങ്ങല്ലൂര്‍, നൗഫല്‍ പാലക്കാടന്‍, മാള മുഹിയുദ്ധീന്‍, അബ്ദുള്ള വല്ലാഞ്ചിറ, സിദ്ധീഖ് കല്ലുപറമ്പന്‍, സ്മിത മുഹിയുദ്ധീന്‍ എന്നിവര്‍ ആശംസകള്‍ നേര്‍ന്നു. വൈസ് പ്രസിഡന്റ് സജീര്‍ പൂന്തുറ സ്വാഗതവും ജനറല്‍ സെക്രട്ടറി സക്കീര്‍ ദാനത്ത് നന്ദിയും പറഞ്ഞു.
തുടര്‍ന്ന് നേതാക്കളും പ്രവര്‍ത്തകരും ചേര്‍ന്ന് കേക്ക് മുറിച്ച് റിപ്പബ്ലിക് ദിനാഘോഷത്തിന്റെ സന്തോഷം പങ്കിട്ടു. ജോണ്‍സണ്‍ മാര്‍ക്കോസ്, ഹക്കീം പട്ടാമ്പി, ഷാനവാസ് മുനമ്പത്ത്, നാസര്‍ വലപ്പാട്, ഒമര്‍ ഷരീഫ്, സന്തോഷ് കണ്ണൂര്‍, ജോസഫ് കോട്ടയം, ജംഷാദ് തുവ്വൂര്‍, മാത്യു ജോസഫ്, സൈനുദ്ധീന്‍ വല്ലപ്പുഴ, ബിനോയ് കൊല്ലം, അലക്‌സ് കൊട്ടാരക്കര, അന്‍സാര്‍ വര്‍ക്കല, ഹരീന്ദ്രന്‍ കണ്ണൂര്‍, ഷംസീര്‍ പാലക്കാട്, മൊയ്തീന്‍ മണ്ണാര്‍ക്കാട്, ഹാഷിം, ശരത് സ്വാമിനാഥന്‍, മുഹമ്മദ് ഖാന്‍ പത്തനംതിട്ട, സൈഫുന്നീസ സിദ്ധീഖ്, മുസ്തഫ കുമാരനെല്ലൂര്‍, മജു സിവില്‍ സ്റ്റേഷന്‍, ഷുക്കൂര്‍ എടക്കര, മജീദ് മൈത്രി തുടങ്ങിയവര്‍ പരിപാടിക്ക് നേതൃത്വം നല്‍കി.
