റിയാദ്: പശ്ചിമേഷ്യയില്‍ സമാധാനത്തിന്റെ പുതിയ അധ്യായം തുറന്നുകൊണ്ട്, ഇറാനെതിരായ ഏതെങ്കിലും തരത്തിലുള്ള സൈനിക നീക്കങ്ങള്‍ക്കോ ആക്രമണങ്ങള്‍ക്കോ സൗദി അറേബ്യയുടെ വ്യോമാതിര്‍ത്തിയോ ഭൂപ്രദേശമോ ഉപയോഗിക്കാന്‍ അനുവദിക്കില്ലെന്ന് സൗദി കിരീടാവകാശിയും പ്രധാനമന്ത്രിയുമായ മുഹമ്മദ് ബിന്‍ സല്‍മാന്‍ വ്യക്തമാക്കി. ഇറാന്‍ പ്രസിഡന്റ് മസൂദ് പെസെഷ്‌കിയാനുമായി നടത്തിയ നിര്‍ണ്ണായക ടെലിഫോണ്‍ സംഭാഷണത്തിലാണ് അദ്ദേഹം രാജ്യത്തിന്റെ നയം വ്യക്തമാക്കിയത്.
ഇറാന്റെ പരമാധികാരത്തെയും പ്രാദേശിക സമഗ്രതയെയും സൗദി അറേബ്യ പൂര്‍ണ്ണമായും ബഹുമാനിക്കുന്നുവെന്ന് കിരീടാവകാശി ഊന്നിപ്പറഞ്ഞു. മേഖലയിലെ സുരക്ഷ വര്‍ധിപ്പിക്കുന്നതിനും നിലവിലുള്ള തര്‍ക്കങ്ങള്‍ ചര്‍ച്ചകളിലൂടെയും നയതന്ത്ര മാര്‍ഗങ്ങളിലൂടെയും പരിഹരിക്കാനുമുള്ള എല്ലാ ശ്രമങ്ങള്‍ക്കും സൗദിയുടെ പൂര്‍ണ്ണ പിന്തുണയുണ്ടാകുമെന്നും അദ്ദേഹം ഉറപ്പുനല്‍കി. പശ്ചിമേഷ്യയില്‍ വര്‍ധിച്ചുവരുന്ന സംഘര്‍ഷാവസ്ഥയ്ക്കിടയില്‍ സൗദിയുടെ ഈ നിലപാട് ഏറെ രാഷ്ട്രീയ പ്രാധാന്യമുള്ളതാണ്.
ഏകദേശം ഒരു മണിക്കൂറോളം നീണ്ടുനിന്ന ചര്‍ച്ചയില്‍ ഇറാനിലെ ഏറ്റവും പുതിയ സംഭവവികാസങ്ങളെക്കുറിച്ച് മസൂദ് പെസെഷ്‌കിയാന്‍ വിശദീകരിച്ചു. ഇറാന്റെ ആണവ പദ്ധതിയുമായി ബന്ധപ്പെട്ട ചര്‍ച്ചകളിലെ ഏറ്റവും പുതിയ പുരോഗതിയും ഗവണ്‍മെന്റിന്റെ നിലപാടുകളും അദ്ദേഹം കിരീടാവകാശിയെ ധരിപ്പിച്ചു. മേഖലയില്‍ സ്ഥിരത ഉറപ്പാക്കാന്‍ ഇറാന്‍ സ്വീകരിക്കുന്ന നടപടികളും ചര്‍ച്ചയില്‍ വിഷയമായി.
സൗദിക്ക് നന്ദി പറഞ്ഞ് ഇറാന്‍ പ്രസിഡന്റ്
സൗദി അറേബ്യ സ്വീകരിച്ചുവരുന്ന ക്രിയാത്മകമായ നിലപാടുകള്‍ക്ക് ഇറാന്‍ പ്രസിഡന്റ് നന്ദി അറിയിച്ചു. മേഖലയില്‍ സമാധാനം പുനഃസ്ഥാപിക്കാനും അയല്‍രാജ്യങ്ങള്‍ തമ്മിലുള്ള ബന്ധം ദൃഢമാക്കാനും മുഹമ്മദ് ബിന്‍ സല്‍മാന്‍ നടത്തുന്ന വ്യക്തിപരമായ ഇടപെടലുകളെ അദ്ദേഹം പ്രശംസിച്ചു. ഇറാന്റെ പരമാധികാരത്തെ ബഹുമാനിക്കാനുള്ള സൗദി നിലപാട് ഇരുകക്ഷികളും തമ്മിലുള്ള വിശ്വാസം വര്‍ധിപ്പിക്കാന്‍ സഹായിക്കുമെന്ന് അദ്ദേഹം കൂട്ടിച്ചേര്‍ത്തു.
വര്‍ഷങ്ങളോളം നീണ്ടുനിന്ന ശത്രുതയ്ക്ക് ശേഷം ചൈനയുടെ മധ്യസ്ഥതയില്‍ നയതന്ത്ര ബന്ധം പുനഃസ്ഥാപിച്ച സൗദിയും ഇറാനും ഇപ്പോള്‍ കൂടുതല്‍ അടുക്കുന്നതാണ് ഈ ചര്‍ച്ച വ്യക്തമാക്കുന്നത്. ഇറാനെതിരായ നീക്കങ്ങള്‍ക്ക് തങ്ങളുടെ മണ്ണ് വിട്ടുനല്‍കില്ലെന്ന പ്രഖ്യാപനം അമേരിക്കയുള്‍പ്പെടെയുള്ള ആഗോള ശക്തികള്‍ക്കുള്ള വ്യക്തമായ സന്ദേശം കൂടിയാണ്.
Related News
