റിയാദ്/ഗ്ലാസ്‌ഗോ: അന്താരാഷ്ട്ര ആരോഗ്യ മേഖലയിലും സാമൂഹിക സേവനത്തിലും പുതിയ ചരിത്രം കുറിച്ചിരിക്കുകയാണ് ഡോ. ബദൂര്‍ ബിന്ത് ശബാബ് നവാര്‍ അല്‍ മുതൈരി. ബ്രിട്ടനിലെ റോയല്‍ കോളേജ് ഓഫ് ഫിസിഷ്യന്‍സ് ആദരിക്കുന്ന ആദ്യ സൗദി-അറബ് വനിത എന്ന ബഹുമതി സ്വന്തമാക്കിയ ഡോ. ബദൂര്‍, ആഗോള ആരോഗ്യ മേഖലയിലെ സ്വാധീനശക്തിയുള്ള വനിതകളുടെ പട്ടികയില്‍ ഇടംപിടിച്ചു.
തന്റെ ഗവേഷണങ്ങള്‍ക്കും അന്താരാഷ്ട്ര തലത്തില്‍ നടപ്പിലാക്കിയ രോഗപ്രതിരോധ പരിപാടികള്‍ക്കുമുള്ള അംഗീകാരമായി 'EMMS ഗ്ലോബല്‍ വുമണ്‍ ഇന്‍ ഹെല്‍ത്ത് കെയര്‍' അവാര്‍ഡും അവര്‍ ഏറ്റുവാങ്ങി.
ഡോ. ബദൂറിന്റെ നേട്ടങ്ങള്‍ ആരോഗ്യരംഗത്ത് മാത്രം ഒതുങ്ങുന്നതല്ല. സ്‌കോട്ട്ലന്‍ഡ് സര്‍ക്കാരിന്റെ ഈ വര്‍ഷത്തെ 'ഐഡിയല്‍ മദര്‍' (മാതൃകാ മാതാവ്) പുരസ്‌കാരം നേടിയതും ഇവരാണ്. കഴിഞ്ഞ അഞ്ച് വര്‍ഷത്തിനിടയില്‍ ഈ പുരസ്‌കാരം നേടുന്ന ആദ്യ സൗദി-അറബ് വനിതയാണവര്‍. അഞ്ച് കുട്ടികളുടെ അമ്മയായ ഡോ. ബദൂര്‍, അവരുടെ വളര്‍ത്തലിലും വിദ്യാഭ്യാസത്തിലും നല്‍കിയ ശ്രദ്ധയും കമ്മ്യൂണിറ്റി സേവനവുമാണ് ഈ പുരസ്‌കാരത്തിന് അര്‍ഹയാക്കിയത്.
'വാക്കുകളിലൂടെയല്ല, പ്രവൃത്തിയിലൂടെയാണ് ഞാന്‍ എന്റെ രാജ്യത്തെ പ്രതിനിധീകരിക്കുന്നത്. ഇസ്ലാമിക മൂല്യങ്ങളിലും സ്‌നേഹത്തിലും അധിഷ്ഠിതമായ വളര്‍ത്തലാണ് ഓരോ സൗദി വനിതയും തന്റെ മക്കള്‍ക്ക് നല്‍കുന്നത്.' - ഡോ. ബദൂര്‍ അല്‍ മുതൈരി പറഞ്ഞു.
അഞ്ചു കുട്ടികളെ വളര്‍ത്തുന്നതിനൊപ്പം തന്നെ പിഎച്ച്.ഡി ഗവേഷണവും ഔദ്യോഗിക തിരക്കുകളും കൊണ്ടുപോകുന്ന ഡോ. ബദൂര്‍ ഒരു വിസ്മയമാണ്. സോഷ്യല്‍ മീഡിയയുടെ വെല്ലുവിളികള്‍ക്കിടയില്‍ കുട്ടികളെ മൂല്യാധിഷ്ഠിതമായി വളര്‍ത്താന്‍ പ്രത്യേക പരിശീലന കോഴ്‌സുകളും പുസ്തകങ്ങളും അവര്‍ പ്രയോജനപ്പെടുത്തി. ഈ അനുഭവങ്ങള്‍ പങ്കുവെച്ചുകൊണ്ട് അമ്മമാര്‍ക്കായി പ്രത്യേക ദേശീയ വിദ്യാഭ്യാസ പദ്ധതികള്‍ വേണമെന്നും അവര്‍ വാദിക്കുന്നു.
അല്‍-ഖസീമിലെ 'അല്‍-റഹീമിയ' എന്ന ചെറിയ ഗ്രാമത്തില്‍ ജനനം. ചെറുപ്പത്തിലേ പിതാവ് നഷ്ടപ്പെട്ട ബദൂറിനെ വളര്‍ത്തിയത് മാതാവ് ഗസലാണ്. കിംഗ് സൗദ് യൂണിവേഴ്‌സിറ്റിയില്‍ നിന്ന് ഒന്നാം റാങ്കോടെ ദന്തചികിത്സയില്‍ ബിരുദം. തുടര്‍ന്ന് ഹെല്‍ത്ത് പോളിസിയില്‍ മാസ്റ്റര്‍ ബിരുദം. നിലവില്‍ യുകെയിലെ യൂണിവേഴ്‌സിറ്റി ഓഫ് ഗ്ലാസ്‌ഗോയില്‍ പിഎച്ച്.ഡി ഗവേഷകയാണ്.
കുട്ടികളിലെ ദന്തക്ഷയം തടയുന്നതിനായി സൗദി അറേബ്യയില്‍ 'ടോപ്‌സ്' എന്ന പേരില്‍ ആദ്യ ദേശീയ ഗവേഷണ പദ്ധതിക്ക് രൂപം നല്‍കി. സൗദി ആരോഗ്യ മന്ത്രാലയത്തിലെ സേവനം, ശൂറാ കൗണ്‍സിലിലെ ഗവേഷക, അറബ് പാര്‍ലമെന്റിലെ ഹെല്‍ത്ത് പോളിസി സംഘാടക എന്നീ നിലകളില്‍ പ്രവര്‍ത്തിച്ചിട്ടുണ്ട്.
സൗദി ഭരണകൂടം വനിതകള്‍ക്ക് നല്‍കുന്ന ശക്തമായ പിന്തുണയാണ് തന്റെ വിജയത്തിന് പിന്നിലെന്ന് ഡോ. ബദൂര്‍ വിശ്വസിക്കുന്നു. കോവിഡ് കാലത്ത് 100-ലധികം ആരോഗ്യ പ്രവര്‍ത്തകരെ ഉള്‍പ്പെടുത്തി 'ഐ ആം ഫൈന്‍' എന്ന സന്നദ്ധ സംഘടനയ്ക്കും അവര്‍ നേതൃത്വം നല്‍കി.
.jpg)
Related News
