ജിദ്ദ: സൗദി അറേബ്യയുടെ കിഴക്കും പടിഞ്ഞാറും തമ്മിലുള്ള ദൂരം ഇനി റെയില്‍വേ ട്രാക്കിലൂടെ അതിവേഗം മറികടക്കാം. തലസ്ഥാന നഗരിയായ റിയാദിനെയും തുറമുഖ നഗരമായ ജിദ്ദയെയും ബന്ധിപ്പിക്കുന്ന അതിവേഗ റെയില്‍പാത യാഥാര്‍ത്ഥ്യമാകുന്നു. 2034-ഓടെ പദ്ധതി പൂര്‍ത്തിയാകുന്നതോടെ, നിലവില്‍ റോഡ് മാര്‍ഗം പന്ത്രണ്ട് മണിക്കൂര്‍ വരെ നീളുന്ന യാത്ര വെറും 4 മണിക്കൂറായി ചുരുങ്ങും.

സൗദി അറേബ്യയുടെ സമഗ്ര വികസന സ്വപ്നമായ 'വിഷന്‍ 2030'-ന്റെ ഭാഗമായാണ് ഈ വമ്പന്‍ പദ്ധതി വിഭാവനം ചെയ്തിരിക്കുന്നത്. ഏകദേശം 10,000 കോടി സൗദി റിയാല്‍ (100 ബില്യണ്‍ റിയാല്‍) ആണ് പദ്ധതിയുടെ ചെലവ് പ്രതീക്ഷിക്കുന്നത്. 950 കിലോമീറ്റര്‍ ദൂരം വെറും 4 മണിക്കൂറില്‍ പിന്നിടാം. ചരക്ക് നീക്കത്തിനും യാത്രക്കാര്‍ക്കും ഒരുപോലെ പ്രയോജനപ്പെടുന്ന വിധത്തിലാണ് ഈ 'ഈസ്റ്റ്-വെസ്റ്റ്' ഇടനാഴി നിര്‍മ്മിക്കുന്നത്.

സൗദി അറേബ്യയെ ആഗോള ലോജിസ്റ്റിക്‌സ് ഹബ്ബാക്കി മാറ്റുകയാണ് പദ്ധതികൊണ്ട് ലക്ഷ്യമിടുന്നത്. നിലവില്‍ റിയാദിനും ജിദ്ദയ്ക്കും ഇടയില്‍ നേരിട്ടുള്ള ട്രെയിന്‍ സര്‍വീസുകളില്ല. ഈ കുറവ് നികത്തുന്നതിനൊപ്പം രാജ്യത്തെ പ്രധാന തുറമുഖങ്ങളെയും വ്യവസായ കേന്ദ്രങ്ങളെയും തമ്മില്‍ ബന്ധിപ്പിക്കാനും ഈ പാത സഹായിക്കും.

റിയാദ്-ജിദ്ദ പാതയ്ക്ക് പുറമെ, റിയാദിനെ ഖത്തറിലെ ദോഹയുമായി ബന്ധിപ്പിക്കുന്ന ഹൈസ്പീഡ് റെയില്‍വേ പദ്ധതിയും സൗദി പരിഗണിക്കുന്നുണ്ട്. ഭാവിയില്‍ എല്ലാ ജിസിസി രാജ്യങ്ങളെയും തമ്മില്‍ ബന്ധിപ്പിക്കുന്ന വിപുലമായ റെയില്‍ ശൃംഖലയുടെ നട്ടെല്ലായി ഈ പദ്ധതി മാറും.

സൗദിയിലെ നിലവിലെ പ്രധാന റെയില്‍ സര്‍വീസുകള്‍ - ഹറമൈന്‍ ഹൈസ്പീഡ് റെയില്‍: മക്ക, മദീന, ജിദ്ദ, റാബിഗ് നഗരങ്ങളെ ബന്ധിപ്പിക്കുന്നു. നോര്‍ത്ത് റെയില്‍വേ: റിയാദില്‍ നിന്ന് വടക്കന്‍ അതിര്‍ത്തിയായ അല്‍-ഖുറയ്യാത്ത് വരെ. ഈസ്റ്റ് റെയില്‍വേ: റിയാദിനെയും ദമാമിനെയും ബന്ധിപ്പിക്കുന്നു. റിയാദ് മെട്രോ: തലസ്ഥാനത്തെ ഗതാഗതക്കുരുക്കിന് പരിഹാരമായി അടുത്തിടെ തുടങ്ങിയ അത്യാധുനിക മെട്രോ. മശാഇര്‍ മെട്രോ: ഹജ്ജ് തീര്‍ത്ഥാടകര്‍ക്കായി പുണ്യസ്ഥലങ്ങളെ ബന്ധിപ്പിക്കുന്ന പ്രത്യേക സര്‍വീസ്. സൗദി റെയില്‍വേ കമ്പനി സിഇഒ ബഷാര്‍ അല്‍ മാലിക് ആണ് ഈ വികസന പദ്ധതികളുടെ പുരോഗതി അറിയിച്ചത്. പദ്ധതി പൂര്‍ത്തിയാകുന്നതോടെ മധ്യപൂര്‍വേഷ്യയിലെ ഏറ്റവും കരുത്തുറ്റ ഗതാഗത ശൃംഖലയായി സൗദി റെയില്‍വേ മാറും.