അല്‍ ബാഹ: സൗദി അറേബ്യയിലെ അല്‍ബാഹ പ്രവിശ്യയിലുള്ള ടൂറിസ്റ്റ് ഫാമുകള്‍ ശൈത്യകാലത്ത് സഞ്ചാരികളുടെ പ്രധാന ആകര്‍ഷണ കേന്ദ്രമായി മാറുന്നു. സ്വദേശികളും വിദേശികളുമായ നിരവധി സന്ദര്‍ശകരാണ് ഈ കൃഷിയിടങ്ങളിലേക്ക് ഒഴുകുന്നത്.
മനോഹരമായ പ്രകൃതിദൃശ്യങ്ങള്‍, മിതമായ കാലാവസ്ഥ, ഗ്രാമീണ ജീവിതത്തിന്റെ തനിമ എന്നിവയാണ് ഈ ഫാമുകളുടെ പ്രധാന ആകര്‍ഷണം. പരിസ്ഥിതി ഭംഗിയും പ്രാദേശികമായ ആതിഥ്യമര്യാദയും ഒത്തുചേരുന്ന ഇവിടെ സന്ദര്‍ശകര്‍ക്ക് സവിശേഷമായ അനുഭവം ലഭിക്കുന്നു. പര്‍വതങ്ങളും സമതലങ്ങളും പച്ചപ്പും നിറഞ്ഞ ബഹയിലെ വിവിധ ഗവര്‍ണറേറ്റുകളിലായി ഈ ഫാമുകള്‍ വ്യാപിച്ചു കിടക്കുന്നു.
ശൈത്യകാലത്തെ മഞ്ഞുമൂടിയ അന്തരീക്ഷം ഈ പ്രദേശത്തിന് പ്രത്യേക ചൈതന്യം നല്‍കുന്നു. കുടുംബങ്ങള്‍ക്കൊപ്പം വിശ്രമിക്കാനും സമാധാനം കണ്ടെത്താനും അനുയോജ്യമായ ഒരിടമാണിത്. തുറസ്സായ ഇരിപ്പിടങ്ങള്‍, വിന്റര്‍ ക്യാമ്പുകള്‍, വിനോദ പരിപാടികള്‍, കാര്‍ഷിക പ്രവര്‍ത്തനങ്ങള്‍, കുട്ടികള്‍ക്കായുള്ള പ്രത്യേക ഇടങ്ങളും ഇവിടത്തെ പ്രത്യേകതയാണ്.
സൗദി അറേബ്യയുടെ തെക്കുപടിഞ്ഞാറന്‍ ഭാഗത്ത് സമുദ്രനിരപ്പില്‍ നിന്ന് ഉയരത്തില്‍ സ്ഥിതി ചെയ്യുന്ന ബാഹ (Al Baha), അവിടുത്തെ തണുത്ത കാലാവസ്ഥ കൊണ്ടും മനോഹരമായ മലനിരകള്‍ കൊണ്ടും 'സൗദിയിലെ സ്വിറ്റ്‌സര്‍ലന്‍ഡ്' എന്നാണ് അറിയപ്പെടുന്നത്.
ബഹയിലെ ഏറ്റവും പ്രശസ്തമായ ചരിത്ര കേന്ദ്രമാണ് ദി ഐന്‍ പുരാതന ഗ്രാമം്. 400 വര്‍ഷത്തിലേറെ പഴക്കമുള്ള ഈ ഗ്രാമം വെളുത്ത മാര്‍ബിള്‍ കല്ലുകള്‍ കൊണ്ട് നിര്‍മ്മിച്ച വീടുകള്‍ക്ക് പേരുകേട്ടതാണ്. ഒരു കുന്നിന്‍ ചെരിവില്‍ സ്ഥിതി ചെയ്യുന്ന ഈ ഗ്രാമത്തിന് ചുറ്റും വാഴത്തോട്ടങ്ങളും നാരകങ്ങളും നിറഞ്ഞുനില്‍ക്കുന്നു. യുനെസ്‌കോയുടെ താല്‍ക്കാലിക ലോക പൈതൃക പട്ടികയിലും ഇത് ഇടംപിടിച്ചിട്ടുണ്ട്.
നഗരത്തിന്റെ തിരക്കുകളില്‍ നിന്ന് മാറി പ്രകൃതിയുടെ മടിത്തട്ടില്‍ സമയം ചെലവഴിക്കാന്‍ ആഗ്രഹിക്കുന്നവര്‍ക്ക് പറ്റിയ ഇടമാണ് റഗദാന്‍ ഫോറസ്റ്റ് പാര്‍ക്ക്. കോടമഞ്ഞ് മൂടിയ മലനിരകളും പച്ചപ്പും ഇവിടുത്തെ പ്രത്യേകതയാണ്. രാത്രികാലങ്ങളില്‍ ഇവിടുത്തെ ദീപാലങ്കാരങ്ങള്‍ സഞ്ചാരികളെ ആകര്‍ഷിക്കുന്നു. കുടുംബങ്ങള്‍ക്കായി കളിസ്ഥലങ്ങളും വിശ്രമ കേന്ദ്രങ്ങളും ഇവിടെ ഒരുക്കിയിട്ടുണ്ട്.
ഷദ പര്‍വതങ്ങള്‍ സാഹസിക പ്രിയര്‍ക്കും പ്രകൃതി സ്‌നേഹികള്‍ക്കും പ്രിയപ്പെട്ട ഇടമാണിത്. ഗ്രാനൈറ്റ് പാറകള്‍ നിറഞ്ഞ ഈ മലനിരകളില്‍ പുരാതനമായ ഗുഹകളും അപൂര്‍വ്വമായ സസ്യജാലങ്ങളും കാണാം. ഈ പാറകള്‍ക്കിടയില്‍ നിര്‍മ്മിച്ച റിസോര്‍ട്ടുകള്‍ ഇന്ന് ബഹയിലെ വലിയൊരു ആകര്‍ഷണമാണ്.
അതിമനോഹരമായ വെള്ളച്ചാട്ടങ്ങളും പച്ചപ്പും നിറഞ്ഞ പ്രദേശമാണ് ഖാബ വനം. മലമുകളില്‍ നിന്ന് താഴേക്ക് ഒഴുകുന്ന നീരുറവകളും അവിടുത്തെ വിശാലമായ കാര്‍ഷിക തോട്ടങ്ങളും സന്ദര്‍ശകര്‍ക്ക് പുത്തന്‍ അനുഭവമാണ് നല്‍കുന്നത്.
അല്‍മഫാസ് പാര്‍ക്കാണ് മറ്റൊരു ആകര്‍ഷണ കേന്ദ്രം. മേഘങ്ങള്‍ തൊട്ടുരുമ്മി നില്‍ക്കുന്ന ഉയരത്തിലുള്ള പാര്‍ക്കാണിത്. മലനിരകളുടെ വിശാലമായ ദൃശ്യം ഇവിടെ നിന്ന് ആസ്വദിക്കാം. ഫോട്ടോഗ്രാഫര്‍മാരുടെ പ്രിയപ്പെട്ട കേന്ദ്രങ്ങളില്‍ ഒന്നുകൂടിയാണിത്.
മേഖലയിലെ ടൂറിസം സാധ്യതകളെ വൈവിധ്യവല്‍ക്കരിക്കുന്നതില്‍ ഈ വിനോദസഞ്ചാര ഫാമുകള്‍ വലിയ പങ്ക് വഹിക്കുന്നു. പ്രകൃതി സംരക്ഷണത്തോടൊപ്പം ഗ്രാമീണ പൈതൃകത്തെ ആഘോഷമാക്കുന്നതിലൂടെ സുസ്ഥിര വിനോദസഞ്ചാരത്തെ പ്രോത്സാഹിപ്പിക്കാനും ഈ പദ്ധതികള്‍ക്ക് സാധിക്കുന്നുണ്ട്.
