ന്യൂഡല്‍ഹി: സാമ്പത്തിക പ്രതിസന്ധിയെത്തുടര്‍ന്ന് വന്‍ ജനകീയ പ്രക്ഷോഭം പുകയുന്ന ഇറാനിലേക്ക് ഇനിയൊരു അറിയിപ്പ് ഉണ്ടാകുന്നതുവരെ ഇന്ത്യന്‍ പൗരന്മാര്‍ യാത്ര ചെയ്യരുതെന്ന് കേന്ദ്ര വിദേശകാര്യ മന്ത്രാലയം നിര്‍ദ്ദേശിച്ചു. ഇറാനിലെ സ്ഥിതിഗതികള്‍ അതീവ ഗുരുതരമായി തുടരുന്ന സാഹചര്യത്തിലാണ് മന്ത്രാലയത്തിന്റെ കര്‍ശന മുന്നറിയിപ്പ്. നിലവില്‍ ഇറാനിലുള്ള ഇന്ത്യന്‍ പൗരന്മാരോടും ഇന്ത്യന്‍ വംശജരോടും അതീവ ജാഗ്രത പാലിക്കാന്‍ എംബസി നേരത്തെ നിര്‍ദേശം നല്‍കിയിരുന്നു.

വന്‍തോതിലുള്ള പ്രകടനങ്ങളോ പ്രതിഷേധങ്ങളോ നടക്കുന്ന ഇടങ്ങളില്‍ നിന്ന് മാറിനില്‍ക്കണമെന്നും ഇറാനില്‍ താമസവിസയിലുള്ള ഇന്ത്യക്കാര്‍ ഇതുവരെ രജിസ്റ്റര്‍ ചെയ്തിട്ടില്ലെങ്കില്‍ ഉടന്‍ തന്നെ ഇന്ത്യന്‍ എംബസിയില്‍ വിവരം അറിയിക്കണമെന്നും നിര്‍ദേശമുണ്ട്.

തെഹ്റാനിലെ ഇന്ത്യന്‍ എംബസിയുടെ ഔദ്യോഗിക വെബ്സൈറ്റും സോഷ്യല്‍ മീഡിയ പേജുകളും വഴി പുറപ്പെടുവിക്കുന്ന അറിയിപ്പുകള്‍ കൃത്യമായി ശ്രദ്ധിക്കണമെന്നും അറിയിപ്പില്‍ പറയുന്നു.

2022-ന് ശേഷം രാജ്യം സാക്ഷ്യം വഹിക്കുന്ന ഏറ്റവും വലിയ ഭരണകൂട വിരുദ്ധ പ്രക്ഷോഭത്തിനാണ് ഇറാന്‍ ഇപ്പോള്‍ വേദിയാകുന്നത്. കുതിച്ചുയരുന്ന ജീവിതച്ചെലവും രൂക്ഷമായ സാമ്പത്തിക പ്രതിസന്ധിയുമാണ് ജനങ്ങളെ തെരുവിലിറക്കിയത്. റിപ്പോര്‍ട്ടുകള്‍ പ്രകാരം ഇതുവരെയുള്ള സംഘര്‍ഷങ്ങളില്‍ കൊല്ലപ്പെട്ടവരുടെ എണ്ണം 2400 കടന്നു. ജനരോഷം തണുപ്പിക്കാന്‍ ഭരണകൂടം ചില നിയന്ത്രണങ്ങളില്‍ ഇളവ് പ്രഖ്യാപിച്ചെങ്കിലും പ്രതിഷേധം അടങ്ങിയിട്ടില്ല.

ഇറാനിലെ സ്ഥിതിഗതികള്‍ സൂക്ഷ്മമായി നിരീക്ഷിക്കുകയാണെന്ന് ട്രംപ് ഭരണകൂടം അറിയിച്ചു. നേരിട്ടുള്ള സൈനിക നീക്കം ഇറാനെതിരെ വേണോ എന്ന കാര്യത്തില്‍ വൈറ്റ് ഹൗസില്‍ ചര്‍ച്ചകള്‍ തുടരുകയാണ്. എന്നാല്‍, നേരിട്ടുള്ള ആക്രമണം അമേരിക്കയെ മറ്റൊരു ദീര്‍ഘകാല യുദ്ധത്തിലേക്ക് വലിച്ചിഴയ്ക്കുമെന്നും അത് തിരിച്ചടിയുണ്ടാക്കുമെന്നും രാഷ്ട്രീയ ഉപദേഷ്ടാക്കള്‍ ട്രംപിന് മുന്നറിയിപ്പ് നല്‍കിയിട്ടുണ്ട്.