ജിദ്ദ- സൗദി അറേബ്യയിലെ പ്രമുഖ റിയല്‍ എസ്റ്റേറ്റ് വികസിതാക്കളായ ഡാര്‍ ഗ്ലോബലും ട്രംപ് ഓര്‍ഗനൈസേഷനും കൈകോര്‍ക്കുന്ന പുതിയ പദ്ധതി 'ട്രംപ് പ്ലാസ ജിദ്ദ' ഔദ്യോഗികമായി പ്രഖ്യാപിച്ചു. ഏകദേശം ഒരു ബില്യണ്‍ ഡോളര്‍ (ഏകദേശം 8,300 കോടിയിലധികം രൂപ) നിക്ഷേപം പ്രതീക്ഷിക്കുന്ന ഈ പദ്ധതി ജിദ്ദയിലെ ലക്ഷ്വറി ലിവിംഗ് മേഖലയില്‍ വലിയ മാറ്റങ്ങള്‍ കൊണ്ടുവരും.

ജിദ്ദയിലെ കിംഗ് അബ്ദുല്‍ അസീസ് റോഡിലുള്ള പ്രമുഖ വികസന മേഖലയായ 'അമയ'യുടെ ഹൃദയഭാഗത്താണ് ഈ പദ്ധതി വരുന്നത്. അത്യാധുനിക സൗകര്യങ്ങളോട് കൂടിയ 1, 2, 3 ബെഡ്‌റൂം എക്സിക്യൂട്ടീവ് റെസിഡന്‍സുകള്‍, പാര്‍ക്ക് റെസിഡന്‍സുകള്‍, നാല് ബെഡ്‌റൂം ടൗണ്‍ഹൗസുകള്‍ എന്നിവ ഇവിടെയുണ്ടാകും.

4,000 ചതുരശ്ര മീറ്ററില്‍ വ്യാപിച്ചുകിടക്കുന്ന അത്യാധുനിക വെല്‍നസ് സെന്റര്‍, സ്പാ, സ്വിമ്മിംഗ് പൂളുകള്‍, ഗോള്‍ഫ് സിമുലേറ്ററുകള്‍ എന്നിവയടങ്ങിയ എക്സ്‌ക്ലൂസീവ് ക്ലബ് പ്ലാസയുടെ പ്രധാന ആകര്‍ഷണമായിരിക്കും. ലോകോത്തര നിലവാരമുള്ള ഓഫീസുകള്‍, ട്രംപ് ഗ്രില്‍ ഉള്‍പ്പെടെയുള്ള പ്രീമിയം റെസ്റ്റോറന്റുകള്‍, കഫേകള്‍ എന്നിവയും ഇതിന്റെ ഭാഗമാണ്.

സൗദിയില്‍ ട്രംപ് ഓര്‍ഗനൈസേഷനുമായി ചേര്‍ന്ന് ഡാര്‍ ഗ്ലോബല്‍ നടപ്പിലാക്കുന്ന മൂന്നാമത്തെ പ്രധാന പദ്ധതിയാണിത്. 2024 ഡിസംബറില്‍ ലോഞ്ച് ചെയ്ത 'ട്രംപ് ടവര്‍ ജിദ്ദ'യ്ക്ക് ലഭിച്ച വലിയ സ്വീകാര്യതയാണ് പുതിയ പദ്ധതിക്ക് പിന്നിലെ പ്രേരണ. റിയാദിലെ ദിരിയയില്‍ 10 ബില്യണ്‍ ഡോളറിന്റെ മറ്റ് പദ്ധതികളും ഇവര്‍ സംയുക്തമായി നടപ്പിലാക്കുന്നുണ്ട്.

സൗദി അറേബ്യയുടെ 'വിഷന്‍ 2030' പദ്ധതിയുടെ ഭാഗമായി വിദേശ നിക്ഷേപം ആകര്‍ഷിക്കുന്നതിനും വിനോദ സഞ്ചാര-റിയല്‍ എസ്റ്റേറ്റ് മേഖലകളെ ശക്തിപ്പെടുത്തുന്നതിനുമാണ് ഇത്തരം പദ്ധതികള്‍ ലക്ഷ്യമിടുന്നത്. ഈ മാസം മുതല്‍ വിദേശികള്‍ക്ക് നിശ്ചിത മേഖലകളില്‍ വസ്തു വാങ്ങാനുള്ള അനുമതി സൗദി സര്‍ക്കാര്‍ നല്‍കിയിട്ടുണ്ട്. ഇത് ട്രംപ് പ്ലാസ പോലുള്ള പദ്ധതികളിലേക്ക് അന്താരാഷ്ട്ര നിക്ഷേപകരെ കൂടുതല്‍ ആകര്‍ഷിക്കുമെന്ന് ഡാര്‍ ഗ്ലോബല്‍ സി.ഇ.ഒ സിയാദ് അല്‍ ചാര്‍ പറഞ്ഞു.

അടുത്ത നാലഞ്ച് വര്‍ഷത്തിനുള്ളില്‍ ഈ പദ്ധതിയുടെ നിര്‍മ്മാണം പൂര്‍ത്തിയാകുമെന്നാണ് പ്രതീക്ഷിക്കുന്നത്. ഇതിലൂടെ ജിദ്ദ ഒരു ആഗോള വാണിജ്യ-താമസ കേന്ദ്രമായി കൂടുതല്‍ കരുത്താര്‍ജ്ജിക്കും.

ഫോട്ടോ: ഡാര്‍ ഗ്ലോബല്‍ സി.ഇ.ഒ സിയാദ് അല്‍ ചാര്‍ റിയാദില്‍ വാര്‍ത്താ ലേഖകനുമായി സംസാരിക്കുന്നു.