ദോഹ- ഖത്തറിലെ പ്രമുഖ റെസ്റ്റോറന്റ് ശൃംഖലയായ 'പൂരി ആന്‍ഡ് കരാക്', സ്ഥാപനത്തിനുള്ളില്‍ നടന്ന വന്‍ കവര്‍ച്ചയെത്തുടര്‍ന്ന് താല്‍ക്കാലികമായി പണമിടപാടുകള്‍ നിര്‍ത്തിവെച്ചു. ഇനി മുതല്‍ ബാങ്ക് കാര്‍ഡുകള്‍ വഴിയുള്ള ഇടപാടുകള്‍ മാത്രമേ സ്വീകരിക്കൂ എന്ന് അധികൃതര്‍ അറിയിച്ചു.
2025-ല്‍ റെസ്റ്റോറന്റ് നേരിട്ട ഏറ്റവും വലിയ ആഭ്യന്തര കവര്‍ച്ചയാണിതെന്ന് മാനേജ്മെന്റ് വ്യക്തമാക്കി. സ്ഥാപനത്തിലെ ചില ജീവനക്കാര്‍ തന്നെ പണമിടപാടുകളില്‍ കൃത്രിമം കാണിച്ച് വലിയ തുക തട്ടിയെടുത്തതായാണ് റിപ്പോര്‍ട്ട്. കമ്പനിയുടെ ചരിത്രത്തിലെ തന്നെ ഏറ്റവും വലിയ സാമ്പത്തിക നഷ്ടമാണിതെന്ന് ഔദ്യോഗിക പ്രസ്താവനയില്‍ പറയുന്നു.
സുതാര്യത ഉറപ്പാക്കുന്നതിനും സാമ്പത്തിക സുരക്ഷിതത്വത്തിനുമായി എല്ലാ ബ്രാഞ്ചുകളിലും പണം നേരിട്ട് സ്വീകരിക്കുന്നത് നിര്‍ത്തിവെച്ചു. പകരം ഡെബിറ്റ്/ക്രെഡിറ്റ് കാര്‍ഡുകള്‍, ആപ്പിള്‍ പേ തുടങ്ങിയ ഡിജിറ്റല്‍ സംവിധാനങ്ങള്‍ ഉപയോഗിക്കാം.
സാമ്പത്തിക നിയന്ത്രണ സംവിധാനങ്ങളും നിരീക്ഷണവും ശക്തമാക്കുന്നതിന്റെ ഭാഗമായാണ് ഈ താല്‍ക്കാലിക ക്രമീകരണം. തട്ടിപ്പ് നടത്തിയവര്‍ക്കെതിരെ നടപടിയെടുക്കുമ്പോഴും, നിലവിലുള്ള മറ്റ് ജീവനക്കാരില്‍ തങ്ങള്‍ക്ക് പൂര്‍ണ്ണ വിശ്വാസമുണ്ടെന്നും അവരുടെ സഹകരണത്തിന് നന്ദി പറയുന്നതായും മാനേജ്മെന്റ് അറിയിച്ചു.
ഖത്തര്‍ സ്‌പോര്‍ട്‌സ് ക്ലബ്, അല്‍ വക്ര തുടങ്ങി ഖത്തറിലെ എട്ട് പ്രധാന കേന്ദ്രങ്ങളില്‍ പ്രവര്‍ത്തിക്കുന്ന ഈ റെസ്റ്റോറന്റ് ശൃംഖല സന്ദര്‍ശിക്കുന്നവര്‍ പണത്തിന് പകരം കാര്‍ഡുകള്‍ കരുതേണ്ടതാണ്. ഡിജിറ്റല്‍ പേയ്‌മെന്റ് രീതിയിലേക്ക് മാറുന്നതിലൂടെ ഇടപാടുകള്‍ കൂടുതല്‍ സുരക്ഷിതമാക്കാനാണ് കമ്പനി ലക്ഷ്യമിടുന്നത്.
.jpg)
Related News
