ജിദ്ദ: ജപ്പാനും സൗദി അറേബ്യയും തമ്മിലുള്ള സാംസ്‌കാരിക വിനിമയത്തിന്റെ വേദിയായി ജിദ്ദയിലെ ഹയ്യ് ജമീലില്‍ 'ഹയ്യ് മത്സൂരി' ഫെസ്റ്റിവല്‍ തിരിച്ചെത്തി. ഇന്ന് സമാപിക്കുന്ന മേള പൊതുജനങ്ങള്‍ക്ക് സൗജന്യമായി സന്ദര്‍ശിക്കാവുന്നതാണ്. സംഗീതം, ഭക്ഷണം, സിനിമ, കരകൗശല വിദ്യകള്‍ എന്നിവയുള്‍പ്പെടെ മുപ്പത്തഞ്ചിലധികം വൈവിധ്യമാര്‍ന്ന പരിപാടികളാണ് ഫെസ്റ്റിവലില്‍ ഒരുക്കിയിരിക്കുന്നത്.
പാരമ്പര്യത്തെ അനുകരിക്കുക, പുതുമകള്‍ പരീക്ഷിക്കുക, പുതിയവ കണ്ടെത്തുക എന്നീ മൂന്ന് ഘട്ടങ്ങളിലൂടെയുള്ള പഠനത്തെ സൂചിപ്പിക്കുന്ന 'ഷു ഹാ റി' എന്ന ജാപ്പനീസ് ദര്‍ശനമാണ് ഈ വര്‍ഷത്തെ മേളയുടെ പ്രമേയം. പാരമ്പര്യ കലകള്‍ എങ്ങനെ ആധുനിക കാലഘട്ടത്തില്‍ പുനര്‍ചിന്തനത്തിന് വിധേയമാകുന്നു എന്ന് വിവിധ കലാരൂപങ്ങളിലൂടെ ഇവിടെ അവതരിപ്പിക്കപ്പെടുന്നു.
പ്രധാന ആകര്‍ഷണങ്ങള്‍
ജാപ്പനീസ് സംഗീതത്തെ റെഗ്ഗെ, ജാസ്സ് ശൈലികളുമായി സമന്വയിപ്പിക്കുന്ന 'ടോക്കിയോ റിഥം ബാന്‍ഡ്' ആദ്യമായി സൗദിയില്‍ അവതരിപ്പിക്കപ്പെട്ടു.
ആര്‍ട്ടിസ്റ്റ് കാസുകോ ഹോക്കി നയിക്കുന്ന പ്രശസ്ത ബാന്‍ഡ് 'ഫ്രാങ്ക് ചിക്കന്‍സ്' തങ്ങളുടെ ആദ്യ സൗദി പ്രകടനം നടത്തി. പങ്ക്-പോപ്പ് ശൈലിയും നാടന്‍ പാട്ടുകളും ഹാസ്യവും ചേര്‍ത്തുള്ള ഇവരുടെ പ്രകടനം കാണികളെ വിസ്മയിപ്പിച്ചു.
കേവലം ഒരു ബാന്‍ഡ് എന്നതിലുപരി കലാ കൂട്ടായ്മയായിട്ടാണ് തങ്ങള്‍ പ്രവര്‍ത്തിക്കുന്നതെന്ന് കാസുകോ ഹോക്കി പറഞ്ഞു. ജിദ്ദയിലെ വേദിയില്‍ ഏഴ് വനിതാ കലാകാരികളാണ് അണിനിരന്നത്. ഇവരുടെ വിഖ്യാതമായ 'വി ആര്‍ നിഞ്ച' എന്ന ഗാനം കാണികളെയും പങ്കാളികളാക്കി അവതരിപ്പിച്ചു.
ജിദ്ദയിലെ ജാപ്പനീസ് കോണ്‍സല്‍ ജനറല്‍ യമമോട്ടോ ഡെയ്സുകെ ചടങ്ങിനെ പ്രശംസിച്ചു. 'ജപ്പാനില്‍ സാധാരണയായി വേനല്‍ക്കാലത്ത് ആഘോഷിക്കുന്ന 'മത്സൂരി' ഉത്സവം അതേ തനിമയോടെ ഇവിടെ പുനരാവിഷ്‌കരിച്ചിരിക്കുന്നത് കാണുമ്പോള്‍ വലിയ സന്തോഷമുണ്ട്. സൗദി പൗരന്മാരും പ്രവാസികളും ഒരുപോലെ ജാപ്പനീസ് സംസ്‌കാരത്തോട് താല്പര്യം പ്രകടിപ്പിക്കുന്നത് അത്ഭുതകരമാണ്.'
ലൈവ് പെര്‍ഫോമന്‍സുകള്‍ക്ക് പുറമെ, ജാപ്പനീസ് ഭക്ഷണശാലകള്‍, ഓപ്പണ്‍ മാര്‍ക്കറ്റ്, സിനിമ പ്രദര്‍ശനങ്ങള്‍, ബോര്‍ഡ് ഗെയിമുകള്‍ എന്നിവയും എല്ലാ പ്രായക്കാര്‍ക്കുമായി ഫെസ്റ്റിവലില്‍ ഒരുക്കിയിട്ടുണ്ട്.
.jpg)
