റിയാദ്: സൗദി പരിസ്ഥിതി, ജല, കൃഷി മന്ത്രാലയത്തിന്റെ റിയാദ് ബ്രാഞ്ച് നടത്തിയ ശക്തമായ ഫീല്‍ഡ് പരിശോധനയില്‍ ഉറവിടം വ്യക്തമല്ലാത്ത 4,200 കിലോഗ്രാമിലധികം കോഴിയിറച്ചി പിടികൂടി. റിയാദിലെ വിവിധ പൊതു വിപണികളില്‍ ലൈസന്‍സില്ലാതെ പ്രവര്‍ത്തിച്ചിരുന്ന വില്‍പന കേന്ദ്രങ്ങളില്‍നിന്നാണ് ഇവ കണ്ടെത്തിയത്. പിടിച്ചെടുത്ത ഇറച്ചി ബന്ധപ്പെട്ട അധികൃതരുടെ മേല്‍നോട്ടത്തില്‍ നിയമപരമായ നടപടിക്രമങ്ങള്‍ പാലിച്ച് നശിപ്പിച്ചു.
കഴിഞ്ഞ ഏതാനും ആഴ്ചകളായി തലസ്ഥാന നഗരിയുടെ വിവിധ ഭാഗങ്ങളില്‍ നടന്നുവരുന്ന പരിശോധനകളുടെ തുടര്‍ച്ചയാണിത്. നേരത്തെ 5 ടണ്ണിലധികം കോഴിയിറച്ചി ഇത്തരത്തില്‍ പിടികൂടിയിരുന്നു. തുടര്‍ന്നുള്ള അന്വേഷണത്തില്‍ നഗരപ്രാന്തങ്ങളിലെ വിശ്രമകേന്ദ്രങ്ങളിലും മറ്റും രഹസ്യമായി പ്രവര്‍ത്തിച്ചിരുന്ന അനധികൃത അറവുശാലകളും അധികൃതര്‍ കണ്ടെത്തി.
ഇതോടെ സമീപകാലത്ത് പിടിച്ചെടുത്ത ആകെ അനധികൃത ഇറച്ചിയുടെ അളവ് 10 ടണ്ണിലധികമായി. ഏകദേശം 40,000-ത്തോളം ആളുകള്‍ക്ക് ഭക്ഷണമായി നല്‍കാന്‍ കഴിയുന്നത്ര വലിയ അളവാണിത്.
വിപണികളിലെ ഗുണനിലവാരം ഉറപ്പുവരുത്തുന്നതിനും ഉപഭോക്താക്കളുടെ വിശ്വാസം വര്‍ദ്ധിപ്പിക്കുന്നതിനുമായി വര്‍ഷം മുഴുവന്‍ നീണ്ടുനില്‍ക്കുന്ന പരിശോധനകളുടെ ഭാഗമാണിതെന്ന് മന്ത്രാലയം വ്യക്തമാക്കി. കൃത്യമായ ആരോഗ്യ-വെറ്ററിനറി മാനദണ്ഡങ്ങള്‍ പാലിക്കുന്നുണ്ടെന്ന് ഉറപ്പാക്കുകയാണ് ഇതിലൂടെ ലക്ഷ്യമിടുന്നത്.
നിയമലംഘകര്‍ക്കെതിരെ യാതൊരു വിട്ടുവീഴ്ചയും ഇല്ലാതെ കര്‍ശന നടപടികള്‍ തുടരുമെന്ന് മന്ത്രാലയം അറിയിച്ചു. ഉപഭോക്താക്കളുടെ ആരോഗ്യം സംരക്ഷിക്കുന്നതിനൊപ്പം പ്രാദേശിക ഉല്‍പാദകരുടെ അവകാശങ്ങള്‍ സംരക്ഷിക്കാനും വിപണിയിലെ വ്യാജ ഉല്‍പ്പന്നങ്ങള്‍ തടയാനും ഈ പരിശോധനകള്‍ സഹായിക്കുമെന്ന് അധികൃതര്‍ കൂട്ടിച്ചേര്‍ത്തു.
Related News
