റിയാദ്- സൗദി അറേബ്യയുടെ വിവിധ ഭാഗങ്ങളില്‍ വരും മണിക്കൂറുകളില്‍ മഴക്കും ശക്തമായ കാറ്റിനും സാധ്യതയുണ്ടെന്ന് ദേശീയ കാലാവസ്ഥാ കേന്ദ്രം അറിയിച്ചു.
മദീനയുടെ ചില ഭാഗങ്ങളില്‍ നേരിയ മഴയ്ക്ക് സാധ്യതയുണ്ട്. കൂടാതെ, ഈ പ്രദേശങ്ങളില്‍ പൊടിപടലങ്ങള്‍ ഉയര്‍ത്തുന്ന രീതിയിലുള്ള ശക്തമായ കാറ്റ് തുടരാന്‍ സാധ്യതയുണ്ടെന്നും റിപ്പോര്‍ട്ട് മുന്നറിയിപ്പ് നല്‍കുന്നു.
മക്ക, അല്‍-ബാഹ, അസീര്‍ മേഖലകളുടെ കിഴക്കന്‍ ഭാഗങ്ങളില്‍ മൂടല്‍മഞ്ഞ് അനുഭവപ്പെടാന്‍ സാധ്യതയുണ്ട്. കിഴക്കന്‍ പ്രവിശ്യയുടെ തെക്കന്‍ ഭാഗങ്ങളില്‍ രാത്രികാലങ്ങളിലും പുലര്‍ച്ചെയും മൂടല്‍മഞ്ഞ് രൂപപ്പെടാന്‍ സാധ്യതയുള്ളതിനാല്‍ വാഹനയാത്രക്കാര്‍ ജാഗ്രത പാലിക്കണം.
വടക്കന്‍, മധ്യ ഭാഗങ്ങളില്‍ വടക്ക്-കിഴക്ക് മുതല്‍ വടക്ക്-പടിഞ്ഞാറ് ദിശയിലും, തെക്കന്‍ ഭാഗത്ത് തെക്ക്-കിഴക്ക് മുതല്‍ തെക്ക് ദിശയിലുമായിരിക്കും കാറ്റ് വീശുക. മണിക്കൂറില്‍ 20 മുതല്‍ 40 കിലോമീറ്റര്‍ വരെ വേഗത്തില്‍ കാറ്റ് വീശാന്‍ സാധ്യതയുണ്ട്. തിരമാലകള്‍ 1 മുതല്‍ 2 മീറ്റര്‍ വരെ ഉയര്‍ന്നേക്കാം. കടല്‍ സാധാരണ നിലയിലോ നേരിയ തോതില്‍ പ്രക്ഷുബ്ധമോ ആയിരിക്കും.
പൊതുജനങ്ങള്‍ ഔദ്യോഗിക അറിയിപ്പുകള്‍ ശ്രദ്ധിക്കണമെന്നും കാലാവസ്ഥാ വ്യതിയാനങ്ങള്‍ക്കനുസരിച്ച് ജാഗ്രത പാലിക്കണമെന്നും അധികൃതര്‍ നിര്‍ദ്ദേശിച്ചു.
Related News
