ന്യൂഡല്‍ഹി: ഇന്ത്യ ഒരു ഹിന്ദു രാഷ്ട്രമാണെന്നും അതിന് പ്രത്യേകമായ ഭരണഘടനാ അംഗീകാരം ആവശ്യമില്ലെന്നും രാഷ്ട്രീയ സ്വയംസേവക് സംഘ് (ആര്‍.എസ്.എസ്) സര്‍സംഘചാലക് മോഹന്‍ ഭാഗവത്. ആര്‍.എസ്.എസിന്റെ നൂറാം വാര്‍ഷികാഘോഷ പരിപാടികളില്‍ സംസാരിക്കവെയാണ് അദ്ദേഹം ഈ പ്രസ്താവന നടത്തിയത്. ഇന്ത്യയുടെ സാംസ്‌കാരിക പാരമ്പര്യവും പൂര്‍വികരുടെ മഹത്വവും നിലനില്‍ക്കുന്നിടത്തോളം കാലം രാജ്യം ഹിന്ദു രാഷ്ട്രമായി തുടരുമെന്നും അദ്ദേഹം കൂട്ടിച്ചേര്‍ത്തു.

പ്രകൃതിനിയമങ്ങളുമായി ഹിന്ദു രാഷ്ട്രമെന്ന ആശയത്തെ താരതമ്യം ചെയ്തുകൊണ്ടായിരുന്നു ഭാഗവതിന്റെ പ്രസംഗം. 'സൂര്യന്‍ കിഴക്കാണ് ഉദിക്കുന്നത്. അത് എന്നാണ് തുടങ്ങിയതെന്ന് ആര്‍ക്കും അറിയില്ല. അതിന് ഭരണഘടനയുടെ അനുമതിയും ആവശ്യമില്ല. അതുപോലെ തന്നെയാണ് ഹിന്ദുസ്ഥാന്‍ ഒരു ഹിന്ദു രാഷ്ട്രമാണെന്ന കാര്യവും,' അദ്ദേഹം പറഞ്ഞു.

ഇന്ത്യയെ മാതൃരാജ്യമായി കരുതുന്നവരും, ഇവിടുത്തെ സംസ്‌കാരത്തെയും പൂര്‍വികരുടെ മഹത്വത്തെയും വിലമതിക്കുന്നവരും ഈ മണ്ണില്‍ ഉള്ളിടത്തോളം കാലം ഇന്ത്യ ഹിന്ദു രാഷ്ട്രമായിരിക്കുമെന്നതാണ് സംഘത്തിന്റെ പ്രത്യയശാസ്ത്രമെന്നും അദ്ദേഹം വിശദീകരിച്ചു.

ഭരണഘടനയെക്കുറിച്ചും മതേതരത്വത്തെക്കുറിച്ചും മോഹന്‍ ഭാഗവത് നിര്‍ണ്ണായകമായ നിരീക്ഷണങ്ങളും നടത്തി. 'മതേതരത്വം' എന്ന പദം യഥാര്‍ത്ഥ ഭരണഘടനയുടെ ആമുഖത്തിന്റെ ഭാഗമായിരുന്നില്ല. 1976-ലെ ഭരണഘടനാ ഭേദഗതിയിലൂടെ ഇന്ദിരാഗാന്ധിയാണ് 'സോഷ്യലിസ്റ്റ്' എന്ന പദത്തോടൊപ്പം ഇതും ചേര്‍ത്തതെന്ന് അദ്ദേഹം പറഞ്ഞു. ജന്മത്തിന്റെ അടിസ്ഥാനത്തിലുള്ള ജാതിവ്യവസ്ഥ ഹിന്ദുത്വത്തിന്റെ മുഖമുദ്രയല്ലെന്ന് അദ്ദേഹം വ്യക്തമാക്കി. ആര്‍.എസ്.എസ് എല്ലാവരെയും ഉള്‍ക്കൊള്ളുന്ന സുതാര്യമായ സംഘടനയാണെന്നും അദ്ദേഹം പറഞ്ഞു.

ആര്‍.എസ്.എസിനെതിരെയുള്ള വിമര്‍ശനങ്ങളെ തള്ളിക്കളഞ്ഞ ഭാഗവത്, സംഘടന ഒരു മതവിഭാഗത്തിനും എതിരല്ലെന്ന് വ്യക്തമാക്കി. 'മുസ്ലിം വിരുദ്ധ പ്രത്യയശാസ്ത്രമുള്ള സംഘടനയല്ല ആര്‍.എസ്.എസ്. ഇതൊരു സുതാര്യമായ പ്രസ്ഥാനമാണ്. ആര്‍ക്കെങ്കിലും സംശയമുണ്ടെങ്കില്‍ സംഘടനയെക്കുറിച്ച് പഠിക്കാം, അപ്പോള്‍ മാത്രമേ തെറ്റിദ്ധാരണകള്‍ മാറൂ,' അദ്ദേഹം പറഞ്ഞു.

ഭാരതീയ സംസ്‌കാരവും ഹിന്ദു മതവിശ്വാസികളുടെ ഭൂരിപക്ഷവും പരിഗണിക്കുമ്പോള്‍ ഇന്ത്യ ഒരു ഹിന്ദു രാഷ്ട്രമാണെന്നത് വ്യക്തമായ കാര്യമാണെന്നും ആര്‍.എസ്.എസ് തലവന്‍ ആവര്‍ത്തിച്ചു.