ജിദ്ദ: നഗരവാസികള്‍ക്കിടയില്‍ കായികക്ഷമതയും ആരോഗ്യകരമായ ജീവിതശൈലിയും വളര്‍ത്തുന്നതിനായി ജിദ്ദ ഗവര്‍ണറേറ്റ് സംഘടിപ്പിക്കുന്ന 'ജിദ്ദ വാക്ക്‌സ് 2' വിന്റര്‍ എഡിഷന്‍ ഡിസംബര്‍ 25 മുതല്‍ ആരംഭിക്കുന്നു. ജിദ്ദയിലെ വിവിധ പ്രധാന നടപ്പാതകളിലും അനുബന്ധ വീഥികളിലുമായാണ് ഈ നടത്തം സംഘടിപ്പിക്കുന്നത്.

ഡിസംബര്‍ 25 മുതല്‍ 4 ആഴ്ചയാണ് കാലയളവ്. വ്യാഴം, വെള്ളി, ശനി ദിവസങ്ങളിലാണ് പരിപാടി. ജീവിതനിലവാരം ഉയര്‍ത്തുക, കായിക പ്രവര്‍ത്തനങ്ങള്‍ വര്‍ദ്ധിപ്പിക്കുക, ആരോഗ്യകരമായ ശീലങ്ങള്‍ പ്രോത്സാഹിപ്പിക്കുക എന്നിവയാണ് ലക്ഷ്യം.


ജിദ്ദ മുനിസിപ്പാലിറ്റി, ആരോഗ്യ മന്ത്രാലയം, കായിക മന്ത്രാലയം എന്നിവയുടെ സഹകരണത്തോടെയാണ് ഈ സംരംഭം നടപ്പിലാക്കുന്നത്. ഇതില്‍ പങ്കെടുക്കാന്‍ ആഗ്രഹിക്കുന്നവര്‍ 'Walking Challenge' എന്ന ആപ്ലിക്കേഷന്‍ വഴി മുന്‍കൂട്ടി രജിസ്റ്റര്‍ ചെയ്യേണ്ടതുണ്ട്. ഈ ആപ്പ് വഴി ഓരോരുത്തരുടെയും ശാരീരിക പ്രവര്‍ത്തനങ്ങള്‍ ട്രാക്ക് ചെയ്യാനും വിവിധ ചലഞ്ചുകളില്‍ പങ്കുചേരാനും സാധിക്കും.

കുട്ടികള്‍ മുതല്‍ മുതിര്‍ന്നവര്‍ വരെ എല്ലാ പ്രായത്തിലുള്ളവര്‍ക്കും അനുയോജ്യമായ രീതിയിലുള്ള പരിപാടികളും പ്രോത്സാഹന പദ്ധതികളും ഇതില്‍ ഉള്‍പ്പെടുത്തിയിട്ടുണ്ട്. നടത്തത്തില്‍ സജീവമാകുന്നവര്‍ക്കായി പ്രത്യേക പ്രോത്സാഹന പരിപാടികളും ആപ്പ് വഴി ലഭ്യമാകും.

ജിദ്ദയെ ഒരു 'വാക്കിംഗ് ഫ്രണ്ട്ലി' നഗരമാക്കി മാറ്റുന്നതിനും സാമൂഹികമായ ഒത്തുചേരലുകള്‍ക്കും ഈ പദ്ധതി അവസരമൊരുക്കുന്നു.

ജിദ്ദയിലെ താമസക്കാരും സന്ദര്‍ശകരും ഈ അവസരം പ്രയോജനപ്പെടുത്തണമെന്നും 'Walking Challenge' ആപ്പ് വഴി എത്രയും വേഗം രജിസ്റ്റര്‍ ചെയ്യണമെന്നും ജിദ്ദ മുനിസിപ്പാലിറ്റി അറിയിച്ചു.