ന്യൂഡല്‍ഹി: മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതി (MGNREGA) ഇനി മുതല്‍ 'വിബി-ജി റാം ജി' (VB-G RAM JI) എന്ന പേരില്‍ അറിയപ്പെടും. 'വികസിത് ഭാരത് ഗ്യാരന്റി റോസ്ഗാര്‍ ആന്‍ഡ് അജീവിക മിഷന്‍ ഗ്രാമീണ്‍' എന്ന പേരുമാറ്റ ബില്ലില്‍ രാഷ്ട്രപതി ഒപ്പുവെച്ചതോടെ പദ്ധതിയുടെ ഘടനയില്‍ തന്നെ വലിയ മാറ്റങ്ങളാണ് വരുന്നത്. പാവപ്പെട്ടവരുടെ പട്ടിണി മാറ്റാന്‍ 100 ദിവസം തൊഴില്‍ ഉറപ്പാക്കിയിരുന്ന പദ്ധതിയില്‍ കേന്ദ്രത്തിന് കൂടുതല്‍ നിയന്ത്രണം ലഭിക്കുന്നതാണ് പുതിയ ഭേദഗതി. എന്നാല്‍, ഫണ്ടിംഗിന്റെ 60 ശതമാനം മാത്രം കേന്ദ്രം നല്‍കുന്നതും പഞ്ചായത്തുകളുടെ അധികാരം വെട്ടിക്കുറയ്ക്കുന്നതും ഫെഡറല്‍ സംവിധാനത്തിന് തിരിച്ചടിയാകുമെന്ന് ചൂണ്ടിക്കാണിക്കപ്പെടുന്നു.

പ്രതിപക്ഷ പ്രതിഷേധത്തിനിടെ പദ്ധതിയുടെ പേര് മാറ്റുന്ന ബില്ലിന് രാഷ്ട്രപതി അംഗീകാരം നല്‍കി. ഗാന്ധിജിയുടെ പേര് ഒഴിവാക്കുന്നതിനെതിരെയും പഞ്ചായത്തുകളുടെയും ഗ്രാമസഭകളുടെയും അധികാരം കവര്‍ന്നെടുക്കുന്നതിനെതിരെയും പ്രതിപക്ഷം രംഗത്തുവന്നു. പദ്ധതി ചെലവിന്റെ 60 ശതമാനം മാത്രമാണ് ഇനി കേന്ദ്രം നല്‍കുക. ഇത് സംസ്ഥാനങ്ങള്‍ക്ക് വലിയ ബാധ്യതയുണ്ടാക്കുമെന്ന് പ്രിയങ്ക ഗാന്ധി ആരോപിച്ചു.

പഞ്ചായത്തീരാജ് സംവിധാനത്തെ തകര്‍ക്കുന്നതാണ് പുതിയ ബില്ലെന്ന് പ്രിയങ്കാ ഗാന്ധി പ്രതികരിച്ചു. 20 വര്‍ഷമായി സാധാരണ ജനങ്ങള്‍ക്ക് സംരക്ഷണം ഒരുക്കുന്നതായിരുന്നു മഹാത്മാഗാന്ധി ഗ്രാമീണ തൊഴിലുറപ്പ് പദ്ധതി. 100 ദിവസം തൊഴില്‍ രാജ്യത്തെ പാവങ്ങളുടെ പട്ടിണി അകറ്റി. പുതിയ ബില്ലിലൂടെ പഞ്ചായത്തുകള്‍, ഗ്രാമസഭകള്‍ ഉള്‍പ്പെടെയുള്ളവരുടെ അധികാരങ്ങള്‍ കുറയും. പുതിയ ബില്ലിലൂടെ കൂടുതല്‍ നിയന്ത്രണങ്ങള്‍ കേന്ദ്രത്തിന് വരികയാണ്. പദ്ധതിയുടെ നിയന്ത്രണം ഏറ്റെടുക്കാനാണ് കേന്ദ്ര സര്‍ക്കാര്‍ നീക്കം. പുതിയ ബില്ലിലൂടെ 60 ശതമാനം ഫണ്ട് മാത്രമാണ് കേന്ദ്രം നല്‍കുന്നത്. ഇത് സംസ്ഥാനങ്ങള്‍ കേന്ദ്രത്തിന് പണം നല്‍കുന്ന വ്യവസ്ഥയാണെന്നും പ്രിയങ്ക പറഞ്ഞു. സഭയില്‍ മഹാത്മാഗാന്ധിയുടെ ചിത്രം ഉയര്‍ത്തി യുഡിഎഫ് എംപിമാര്‍ പ്രതിഷേധിച്ചു.