റിയാദ്: സൗദിയുടെ ഗതാഗത മേഖലയില്‍ വിപ്ലവം സൃഷ്ടിക്കാന്‍ ലക്ഷ്യമിട്ട്, ഇലക്ട്രിക് വാഹന സാങ്കേതികവിദ്യയില്‍ ഉന്നതതല ഗവേഷണം നടത്തുന്നതിനായുള്ള മിഡില്‍ ഈസ്റ്റിലെ ആദ്യത്തെ ഇലക്ട്രിക് വാഹന നവീകരണ കേന്ദ്രം റിയാദില്‍ പ്രവര്‍ത്തനം ആരംഭിച്ചു. സൗദി ദേശീയ ലബോറട്ടറിയായി കണക്കാക്കപ്പെടുന്ന കിങ് അബ്ദുല്‍ അസീസ് സിറ്റി ഫോര്‍ സയന്‍സ് ആന്‍ഡ് ടെക്നോളജി (KACST), പ്രമുഖ ഇലക്ട്രിക് വാഹന നിര്‍മാതാക്കളായ ലൂസിഡ് ഗ്രൂപ്പുമായി സഹകരിച്ചാണ് ഈ പുതിയ സംരംഭത്തിന് തുടക്കം കുറിച്ചത്.

തദ്ദേശീയ, മിഡില്‍ ഈസ്റ്റ്, ആഗോള തലങ്ങളിലെ ഗവേഷണ വൈദഗ്ധ്യത്തെ ഒരുമിപ്പിക്കാനുള്ള പ്രധാന വേദിയായിരിക്കും ഈ കേന്ദ്രം. ഇലക്ട്രിക് വാഹനങ്ങളുടെ കാര്യക്ഷമത, പ്രവര്‍ത്തനക്ഷമത, പ്രകടനം എന്നിവ വര്‍ദ്ധിപ്പിക്കുന്നതിലാണ് ശ്രദ്ധ കേന്ദ്രീകരിക്കുക. പുതിയ സാങ്കേതികവിദ്യകളുടെ സഹായത്തോടെ വാഹന വികസനം വേഗത്തിലാക്കുകയും സൗദിയുടെ ഭാവി ഗതാഗത മേഖലയെ ശക്തിപ്പെടുത്തുകയും ചെയ്യും. EV-IÄ, ബാറ്ററികള്‍, സ്മാര്‍ട്ട് സിസ്റ്റങ്ങള്‍ തുടങ്ങിയ മേഖലകളില്‍ ഭാവി സാങ്കേതികവിദ്യകള്‍ വികസിപ്പിക്കുന്നതില്‍ സൗദിയിലെ പ്രതിഭകളെ പരിശീലിപ്പിക്കും.

ഇലക്ട്രിക് വാഹന സാങ്കേതികവിദ്യകള്‍ വികസിപ്പിക്കുന്നതിനും സാങ്കേതിക നവീകരണത്തിനുള്ള ഒരു ആഗോള കേന്ദ്രമായി സൗദി സ്വയം സ്ഥാപിക്കാനുള്ള ശ്രമങ്ങളെ പിന്തുണയ്ക്കുന്നതിലുമുള്ള ഞങ്ങളുടെ നിരന്തരമായ പ്രതിബദ്ധതയാണ് ഈ കേന്ദ്രമെന്ന് ലൂസിഡ് സി.ഇ.ഒ. മാര്‍ക്ക് വിന്റര്‍ഹോഫ് പറഞ്ഞു.

ഗവേഷണം, വികസനം, നവീകരണ സംവിധാനം, വ്യാവസായിക തന്ത്രം, നിക്ഷേപ തന്ത്രം എന്നിവ തമ്മിലുള്ള സംയോജനം ശക്തിപ്പെടുത്തുന്നതിനും പുതിയ വ്യാവസായിക മൂല്യ ശൃംഖലകള്‍ സ്ഥാപിക്കുന്നതിനും ഈ സഹകരണം സഹായിക്കുമെന്ന് KACST വൈസ് പ്രസിഡന്റ് തലാല്‍ ബിന്‍ അഹമ്മദ് അല്‍സുദൈരി അഭിപ്രായപ്പെട്ടു.

ലൂസിഡിന്റെ എഞ്ചിനീയറിംഗ് വൈദഗ്ധ്യവും KACST-യുടെ നൂതന ഗവേഷണ ശേഷിയും സംയോജിപ്പിച്ചുകൊണ്ട് സുസ്ഥിര മൊബിലിറ്റിയുടെ ഭാവി വികസിപ്പിക്കാനാണ് ഇരു സ്ഥാപനങ്ങളും ലക്ഷ്യമിടുന്നത്. ഈ കേന്ദ്രം സാങ്കേതികവിദ്യാ കൈമാറ്റത്തിനും പ്രാദേശികവത്കരണത്തിനും നിര്‍ണായകമായ ചുവടുവെപ്പായി കണക്കാക്കപ്പെടുന്നു.