ജിദ്ദ: സംസ്ഥാനം ഇതുവരെ അനുഭവിക്കാത്ത തരത്തിലുള്ള കടബാധ്യതയും സര്‍ക്കാരിന്റെ ഭരണപരാജയങ്ങളും ദുര്‍ഭരണവും ചര്‍ച്ച ചെയ്യാനനുവദിക്കാതെ, ന്യൂനപക്ഷ ഭൂരിപക്ഷ വോട്ടുകള്‍ ധ്രുവീകരിക്കാന്‍ ഒരേസമയം വേട്ടക്കാരനും ഇരയുടെ രക്ഷകനുമായി അഭിനയിച്ച സി.പി.എമ്മിന്റെ കപട വര്‍ഗീയ രാഷ്ട്രീയത്തിനേറ്റ ശക്തമായ തിരിച്ചടിയാണ് തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പ് ഫലമെന്ന് ജിദ്ദ കെഎംസിസി സെന്‍ട്രല്‍ കമ്മി വിലയിരുത്തി. ജനജീവിതം ദുസ്സഹമാക്കിയ എല്ലാ മേഖലകളിലുമുള്ള പിണറായി സര്‍ക്കാരിന്റെ പരാജയവും, സി.പി.എമ്മിന്റെ രഹസ്യ സംഘപരിവാര്‍ ബാന്ധവവും കേരള സമൂഹം തിരിച്ചറിഞ്ഞ് ബാലറ്റിലൂടെ ശക്തമായി പ്രതികരിച്ചിരിക്കുകയാണെന്ന് ജിദ്ദ കെഎംസിസി സെന്‍ട്രല്‍ കമ്മിറ്റി ആക്ടിങ് പ്രസിഡന്റ് സി കെ റസാഖ് മാസ്റ്ററും, ജനറല്‍ സെക്രട്ടറി വി. പി. മുസ്തഫയും അഭിപ്രായപ്പെട്ടു.

തെരഞ്ഞെടുപ്പ് അടുക്കുമ്പോള്‍ സ്വന്തം പാര്‍ട്ടി നേതാക്കളുടെ ലൈംഗിക വിവാദങ്ങളും അഴിമതികളും മറച്ചുവെച്ച്, പണമിറക്കി അതിജീവിതകളെ പ്രതിഷ്ഠിച്ചു മറ്റുള്ളവര്‍ക്കെതിരെ അടിസ്ഥാനരഹിതമായ ലൈംഗിക ആരോപണങ്ങള്‍ ഉയര്‍ത്തി കേരള സമൂഹത്തെ എന്നും തളച്ചിടാമെന്ന് സി.പി.എം. കരുതേണ്ട. യു.ഡി.എഫ് ഒറ്റക്കെട്ടായി നിന്ന് വരാനിരിക്കുന്ന നിയമസഭാ തെരഞ്ഞെടുപ്പിലും ഈ വിജയം ആവര്‍ത്തിക്കപ്പെടുമെന്ന് ജിദ്ദ കെഎംസിസി നേതാക്കള്‍ ആത്മ വിശ്വാസം പ്രകടിപ്പിച്ചു.

ശബരിമല, സ്വര്‍ണക്കടത്ത്, വഖഫ് പ്രശ്‌നങ്ങള്‍ തുടങ്ങിയവ മൂലം വിശ്വാസികളുടെ മനസ്സില്‍ പറ്റിയ മുറിവുകള്‍ സി.പി.എമ്മിനെതിരെ ശക്തമായ ജനവിധിയായി മാറിയതായും കമ്മിറ്റി ചൂണ്ടിക്കാട്ടി. യു.ഡി.എഫിനെ വിജയത്തിലേക്ക് നയിച്ച എല്ലാ മതേതര, ജനാധിപത്യ വിശ്വാസികള്‍ക്കും ജിദ്ദ കെഎംസിസിയുടെ ഹൃദയപൂര്‍വ്വമായ അഭിനന്ദനങ്ങള്‍.