ജിദ്ദ- റെഡ് സീ ഫിലിം ഫെസ്റ്റിവലുമായി ബന്ധപ്പെട്ട് ജിദ്ദയില്‍ ഇന്ത്യന്‍ കോണ്‍സുലേറ്റിന്റെ ആഭിമുഖ്യത്തില്‍ 'ഇന്ത്യ നൈറ്റ്' എന്ന പേരില്‍ പരിപാടി സംഘടിപ്പിച്ചു. സിനിമാ രംഗത്ത് ഇന്ത്യയും സൗദി അറേബ്യയും തമ്മിലുള്ള പങ്കാളിത്തം ആഘോഷമാക്കുക എന്നതായിരുന്നു പാര്‍ക്ക് ഹയാത്ത് ഹോട്ടലില്‍ നടന്ന ഈ ചടങ്ങിന്റെ ലക്ഷ്യം.
ഇന്ത്യന്‍ അംബാസഡര്‍ സുഹൈല്‍ അജാസ് ഖാന്‍, കോണ്‍സല്‍ ജനറല്‍ ഫഹദ് അഹമ്മദ് ഖാന്‍ സൂരി എന്നിവരാണ് പരിപാടികള്‍ക്ക് നേതൃത്വം നല്‍കിയത്. ബോളിവുഡ് സംവിധായകന്‍ മുസഫര്‍ അലി ഖാന്‍, ബോളിവുഡ് താരം കാര്‍ത്തിക് ആര്യന്‍, കേന്ദ്ര വാര്‍ത്താവിതരണ മന്ത്രാലയം സെക്രട്ടറി ശ്രുതി സിംഗ് തുടങ്ങിയ പ്രമുഖര്‍ ചടങ്ങില്‍ പങ്കെടുത്തു. ജിദ്ദ റെഡ് സീ ഫിലിം ഫെസ്റ്റിവലിന്റെ സംഘാടകരും വിവിധ രാജ്യങ്ങളുടെ പ്രതിനിധികളും സന്നിഹിതരായിരുന്നു.
സിനിമ വിനോദത്തിനപ്പുറം ഭാഷകളെയും സംസ്‌കാരങ്ങളെയും പരസ്പരം കൈമാറ്റം ചെയ്യാനുള്ള ശക്തമായ മാധ്യമമാണെന്ന് ഇന്ത്യന്‍ അംബാസഡര്‍ സുഹൈല്‍ അജാസ് ഖാന്‍ അഭിപ്രായപ്പെട്ടു. ഇന്ത്യയുടെ സിനിമാ സൗഹൃദം സൗദി അറേബ്യയുമായുള്ള ബന്ധം കൂടുതല്‍ ദൃഢമാക്കുമെന്നും അദ്ദേഹം കൂട്ടിച്ചേര്‍ത്തു.
പ്രമുഖ ഹിന്ദി ഗായിക ഷിബാനി കശ്യപ്പിന്റെ നേതൃത്വത്തില്‍ നടന്ന സംഗീത വിരുന്നായിരുന്നു പരിപാടിയുടെ മുഖ്യ ആകര്‍ഷണം.
.jpg)
