ദുബായ്: സങ്കല്‍പ്പങ്ങള്‍ക്കും അപ്പുറമുള്ള സാങ്കേതിക കുതിച്ചുചാട്ടത്തിനും അടിസ്ഥാന സൗകര്യ വികസനത്തിനും യുഎഇ ഒരുങ്ങുന്നു. 2026-ഓടെ രാജ്യം ഒരു നവയുഗത്തിലേക്ക് ചുവടുവെക്കുമ്പോള്‍, നിത്യജീവിതത്തെ സ്വാധീനിക്കുന്ന 12 പ്രധാന മാറ്റങ്ങളാണ് നിവാസികളെ കാത്തിരിക്കുന്നത്. പറക്കും ടാക്‌സികള്‍ മുതല്‍ നികുതി പരിഷ്‌കാരങ്ങള്‍ വരെ നീളുന്നതാണ് മാറ്റങ്ങള്‍.:

യാത്രാ മേഖലയിലാണ് ഏറ്റവും വിപ്ലവകരമായ മാറ്റങ്ങള്‍ ഉണ്ടാകുന്നത്. പറക്കും ടാക്‌സികള്‍ യാഥാര്‍ത്ഥ്യമാകുന്നു: ഗതാഗതക്കുരുക്കില്‍ കുടുങ്ങാതെ മിനിറ്റുകള്‍ക്കുള്ളില്‍ ലക്ഷ്യസ്ഥാനത്തെത്താം. പറക്കും ടാക്‌സികള്‍ക്കായി 100-ലധികം ഹെലിപോര്‍ട്ടുകള്‍ സജ്ജമാകും. മണിക്കൂറുകള്‍ നീളുന്ന യാത്രകള്‍ ഇനി നിമിഷങ്ങള്‍ക്കുള്ളില്‍ തീരും.

ഡ്രൈവറില്ലാ ടാക്‌സികള്‍: ദുബായിലെ തിരക്കേറിയ ഷെയ്ഖ് സായിദ് റോഡിലൂടെ സ്വയം ഓടുന്ന ടാക്‌സികള്‍ ഓടിത്തുടങ്ങും. മസാജ് സീറ്റുകള്‍ ഉള്‍പ്പെടെയുള്ള ആധുനിക സൗകര്യങ്ങളുള്ള ഈ ടാക്‌സികള്‍ സുരക്ഷിതവും സുഖകരവുമായ യാത്ര വാഗ്ദാനം ചെയ്യുന്നു.

ഇതിഹാദ് റെയില്‍ യാത്രക്കാര്‍ക്കായി തുറക്കുന്നു: യുഎഇയിലെ 11 പ്രധാന നഗരങ്ങളെ ബന്ധിപ്പിക്കുന്ന ദേശീയ റെയില്‍ ശൃംഖല 2026-ല്‍ യാത്രാ സര്‍വീസുകള്‍ ആരംഭിക്കും. ഇത് രാജ്യത്തെ റിയല്‍ എസ്റ്റേറ്റ് മേഖലയിലും യാത്രാ രീതിയിലും വലിയ മാറ്റങ്ങള്‍ കൊണ്ടുവരും.

ദുബായ് ലൂപ്പ്: ഇലോണ്‍ മസ്‌കിന്റെ സ്വപ്ന പദ്ധതിയായ 17 കിലോമീറ്റര്‍ ദൈര്‍ഘ്യമുള്ള അതിവേഗ ഭൂഗര്‍ഭ ട്രാന്‍സിറ്റ് സിസ്റ്റം 2026-ല്‍ പ്രവര്‍ത്തനക്ഷമമാകും. അതിവേഗത്തിലുള്ള നഗരയാത്ര ഇനി സ്വപ്നമല്ല.

നികുതിയും നിയമങ്ങളും കൂടുതല്‍ ലളിതവും വ്യക്തവുമാവും. ഇ-ഇന്‍വോയ്‌സിങ് : 2026 പകുതിയോടെ ബിസിനസ്സുകള്‍ക്ക് ഇലക്ട്രോണിക് ഇന്‍വോയ്‌സുകള്‍ നിര്‍ബന്ധമാക്കും. ഇത് നികുതി നടപടികള്‍ പൂര്‍ണ്ണമായും സുതാര്യമാക്കും.

വാറ്റ് നിയമ പരിഷ്‌കാരം: വാറ്റ് നിയമങ്ങളില്‍ വലിയ ഇളവുകളും ലളിതവല്‍ക്കരണവും വരുന്നു. റീഫണ്ടുകള്‍ ക്ലെയിം ചെയ്യുന്നതിന് 5 വര്‍ഷത്തെ സമയപരിധി ലഭിക്കും.

സ്മാര്‍ട്ടായ പഞ്ചസാര നികുതി: ഇനി മധുരത്തിന് അനുസരിച്ച് നികുതി മാറും. പാനീയങ്ങളിലെ പഞ്ചസാരയുടെ അളവ് അടിസ്ഥാനമാക്കിയായിരിക്കും പുതിയ നികുതി ഘടന.

പ്ലാസ്റ്റിക് വിമുക്ത യുഎഇ: 2026 ജനുവരി 1 മുതല്‍ പ്ലാസ്റ്റിക് കപ്പുകള്‍, പ്ലേറ്റുകള്‍, കണ്ടെയ്നറുകള്‍ എന്നിവയുടെ ഉത്പാദനവും വ്യാപാരവും പൂര്‍ണ്ണമായി നിരോധിക്കും.

ഇന്ത്യന്‍ സ്‌കൂളുകള്‍ക്ക് പുതിയ കലണ്ടര്‍: ഇന്ത്യന്‍ പാഠ്യപദ്ധതി പിന്തുടരുന്ന സ്‌കൂളുകള്‍ 2026 ഏപ്രില്‍ മുതല്‍ മന്ത്രാലയത്തിന്റെ ഏകീകൃത അക്കാദമിക് കലണ്ടറിലേക്ക് മാറും.

GITEX എക്‌സ്‌പോ സിറ്റിയിലേക്ക്: ലോകത്തിലെ ഏറ്റവും വലിയ ടെക് ഷോയായ ജൈറ്റെക്‌സ് 2026-ല്‍ ദുബായ് എക്‌സ്‌പോ സിറ്റിയില്‍ നടക്കും.

കുരുക്കഴിക്കാന്‍ പുതിയ പാലങ്ങള്‍: വേള്‍ഡ് ട്രേഡ് സെന്റര്‍ റൗണ്ട്എബൗട്ട് പദ്ധതിയുടെ ഭാഗമായി നിര്‍മ്മിക്കുന്ന 5 പാലങ്ങളില്‍ രണ്ടെണ്ണം 2026-ല്‍ തുറക്കും. ഇതോടെ കാത്തിരിപ്പ് സമയം 12 മിനിറ്റില്‍ നിന്ന് വെറും 90 സെക്കന്‍ഡായി കുറയും.