ന്യൂഡല്‍ഹി: പൈലറ്റ് ക്ഷാമം കാരണം വിമാന സര്‍വീസുകള്‍ വ്യാപകമായി റദ്ദാക്കി ആയിരക്കണക്കിന് യാത്രക്കാരെ ദുരിതത്തിലാക്കിയ സംഭവത്തില്‍ ഇന്‍ഡിഗോ എയര്‍ലൈന്‍സ് വ്യോമയാന ഡയറക്ടര്‍ ജനറല്‍ (ഡിജിസിഎ) നല്‍കിയ കാരണം കാണിക്കല്‍ നോട്ടിസിന് മറുപടി നല്‍കി. ഇന്‍ഡിഗോയുടെ സി.ഇ.ഒ. നല്‍കിയ മറുപടിയില്‍ യാത്രക്കാര്‍ക്കുണ്ടായ പ്രയാസത്തില്‍ അങ്ങേയറ്റം ദുഃഖം രേഖപ്പെടുത്തുകയും മാപ്പ് ചോദിക്കുകയും ചെയ്തു.
സര്‍വീസുകള്‍ കൂട്ടത്തോടെ റദ്ദാക്കിയതിന്റെ യഥാര്‍ഥ കാരണം കണ്ടെത്താന്‍ കൂടുതല്‍ സമയം വേണമെന്നാണ് ഇന്‍ഡിഗോ ഡിജിസിഎയോട് ആവശ്യപ്പെട്ടിരിക്കുന്നത്. ഒന്നിലേറെ പ്രതികൂല ഘടകങ്ങള്‍ ഒരുമിച്ചെത്തിയതാണ് ഇത്ര വ്യാപകമായ സര്‍വീസ് റദ്ദാക്കലുകള്‍ക്ക് കാരണമെന്നും കൃത്യമായ കാരണം ഈ സമയത്ത് കണ്ടെത്തുക പ്രയാസമാണെന്നും ഇന്‍ഡിഗോ അറിയിച്ചു. വിപുലമായ വിശകലനം നടത്തി കാരണം കണ്ടെത്താന്‍ കൂടുതല്‍ സമയം വേണം. കാരണം കാണിക്കല്‍ നോട്ടിസുകള്‍ക്ക് മറുപടി നല്‍കാന്‍ ഡിജിസിഎ മാന്വല്‍ പ്രകാരം 15 ദിവസത്തെ സമയമുണ്ടെന്നും ഇന്‍ഡിഗോ ചൂണ്ടിക്കാട്ടി.
സര്‍വീസുകള്‍ റദ്ദാക്കിയതിന് പിന്നിലെ പ്രാഥമിക കാരണങ്ങളായി ഇന്‍ഡിഗോ ചൂണ്ടിക്കാട്ടിയത് ഇവയാണ്: പുതിയ സുരക്ഷാ ചട്ടം നടപ്പാക്കിയത്. ചെറിയ സാങ്കേതിക തടസ്സങ്ങള്‍ നേരിട്ടത്. ശൈത്യകാല സീസണ്‍ തുടങ്ങിയതിലെ ഷെഡ്യൂള്‍ മാറ്റങ്ങള്‍. പ്രതികൂല കാലാവസ്ഥ. വ്യോമയാന മേഖലയിലെ തിരക്ക് വര്‍ധിച്ചത്.
സുരക്ഷാ ചട്ടം നടപ്പിലാക്കുന്നതുമായി ബന്ധപ്പെട്ട വെല്ലുവിളികളെക്കുറിച്ച് ഡിജിസിഎയുമായി ചര്‍ച്ച നടത്തി വരികയാണെന്നും, ഇതില്‍ മാറ്റങ്ങളും ഇളവുകളും തേടുകയാണെന്നും ഇന്‍ഡിഗോ അറിയിച്ചു.
.jpg)
Related News
