റിയാദ്: സൗദി അറേബ്യയുടെ ഭാവി ഗതാഗത സ്വപ്നങ്ങള്‍ക്ക് ചിറകു നല്‍കി എയര്‍ ടാക്‌സി സേവനങ്ങള്‍ യാഥാര്‍ത്ഥ്യമാകാന്‍ ഒരുങ്ങുന്നു. അമേരിക്ക ആസ്ഥാനമായുള്ള വിമാന നിര്‍മ്മാണ കമ്പനിയായ ആര്‍ച്ചര്‍ ഏവിയേഷനും സൗദിയിലെ ജനറല്‍ അതോറിറ്റി ഓഫ് സിവില്‍ ഏവിയേഷനും (GACA) തമ്മില്‍ ഇതുസംബന്ധിച്ച ധാരണാപത്രം ഒപ്പുവെച്ചു.
സൗദിയിലെ ഭാവി ഗതാഗത സംവിധാനത്തിന്റെ നിര്‍ണായക ഭാഗമായ അഡ്വാന്‍സ്ഡ് എയര്‍ മൊബിലിറ്റി (AAM) മേഖലയുടെ വികസനമാണ് ഈ നീക്കത്തിലൂടെ പ്രധാനമായും ലക്ഷ്യമിടുന്നത്. ഈ പുതിയ പങ്കാളിത്തത്തിന് മുന്നോടിയായി, സൗദിയിലെ പബ്ലിക് ഇന്‍വെസ്റ്റ്മെന്റ് ഫണ്ടിന്റെ (PIF) ഉടമസ്ഥതയിലുള്ള ടി ഹെലികോപ്റ്റര്‍ കമ്പനി, റെഡ് സീ ഗ്ലോബല്‍ എന്നിവരുമായി ആര്‍ച്ചര്‍ ഏവിയേഷന്‍ നേരത്തെ സഹകരണ കരാറുകള്‍ ഒപ്പുവെച്ചിരുന്നു.
സൗദിയില്‍ ഇലക്ട്രിക് വിമാനങ്ങള്‍ വികസിപ്പിക്കാനും പരീക്ഷിക്കാനും പ്രവര്‍ത്തിപ്പിക്കാനും ഈ കരാറുകള്‍ ലക്ഷ്യമിടുന്നു. പുതിയ സഹകരണ കരാര്‍ പ്രകാരം, ടി ഹെലികോപ്റ്റര്‍ കമ്പനിയും ആര്‍ച്ചര്‍ ഏവിയേഷനും റെഡ് സീ ഗ്ലോബലും ചേര്‍ന്ന് ടൂറിസ്റ്റ് കേന്ദ്രങ്ങളിലേക്ക് ആര്‍ച്ചര്‍ ഏവിയേഷന്റെ ഇലക്ട്രിക് വിമാനം ഉപയോഗിച്ച് സര്‍വീസ് നടത്താനായി വ്യോമപാത നിര്‍മ്മിക്കാന്‍ പ്രവര്‍ത്തിക്കും. ഇലക്ട്രിക് വിമാനങ്ങളുടെ പ്രവര്‍ത്തനം, പരീക്ഷണം, നിയന്ത്രണങ്ങള്‍ എന്നിവ രാജ്യത്തിന്റെ വ്യോമയാന നിയമങ്ങള്‍ക്ക് അനുസൃതമാണെന്ന് ഉറപ്പുവരുത്താനും ഈ സംരംഭം ലക്ഷ്യമിടുന്നുണ്ട്.
നിലവില്‍ എയര്‍ ടാക്‌സി സാങ്കേതികവിദ്യകളില്‍ ലോകം കൈവരിക്കുന്ന വളര്‍ച്ചയ്ക്ക് അനുസൃതമായി, വിമാനങ്ങളുടെ നിര്‍മ്മാണവും പ്രവര്‍ത്തനക്ഷമതയും നിയമപരമായ ചട്ടക്കൂടുകള്‍ക്ക് അനുസൃതമാക്കുക എന്നതാണ് ഈ പദ്ധതിയുടെ സുപ്രധാന ലക്ഷ്യം. GACA-യുമായുള്ള സഹകരണത്തിലൂടെ സൗദി ശ്രദ്ധ കേന്ദ്രീകരിക്കുന്നത് പ്രധാനമായും സിവില്‍ വ്യോമയാന മേഖലയിലെ വളര്‍ച്ചയാണ്. നിയമപരമായ പിന്തുണ, സുരക്ഷ, മേല്‍നോട്ടം എന്നിവക്ക പുറമെ വ്യോമ ഗതാഗത സാങ്കേതികവിദ്യകളിലെ ആഗോള മികച്ച സമ്പ്രദായങ്ങള്‍ നടപ്പിലാക്കുകയെന്നതും ലക്ഷ്യമാണ്.
ഭാവി സാങ്കേതികവിദ്യകള്‍ക്ക് അനുയോജ്യമായ സുരക്ഷിതവും സുഗമവുമായ വ്യോമയാത്രാ സംവിധാനം ഒരുക്കാന്‍ റെഡ് സീ ഗ്ലോബല്‍ കമ്പനിയുമായി ആര്‍ച്ചര്‍ ഏവിയേഷന്‍ നേരത്തെ പങ്കാളിത്തത്തിന് തുടക്കമിട്ടത്, ആഢംബര ടൂറിസം കേന്ദ്രങ്ങള്‍ വികസിപ്പിക്കുന്നതിനുള്ള രാജ്യത്തിന്റെ ഗതാഗത ശൃംഖലയുടെ ഭാഗമായാണ്. വ്യോമയാനത്തിന്റെ ഭാവിയില്‍ നിര്‍ണായക സ്ഥാനമുള്ള എയര്‍ മൊബിലിറ്റി സാങ്കേതികവിദ്യകള്‍ക്ക് സൗദി അറേബ്യയുടെ മൊത്തത്തിലുള്ള കാഴ്ചപ്പാടില്‍ നിന്നും ഇത് പിന്തുണ ഉറപ്പാക്കുന്നു.
.jpg)
Related News
