ജിദ്ദ- സൗദി സംവിധായിക ഹൈഫ അല്‍-മന്‍സൂറിന്റെ ഏറ്റവും പുതിയ ചിത്രമായ 'അണ്‍ഐഡന്റിഫൈഡ്' റെഡ് സീ ഇന്റര്‍നാഷണല്‍ ഫിലിം ഫെസ്റ്റിവലില്‍ നിറഞ്ഞ സദസ്സില്‍ പ്രദര്‍ശിപ്പിച്ചു. ചിത്രത്തില്‍ അഭിനയിച്ച താരങ്ങളും അണിയറ പ്രവര്‍ത്തകരും പ്രദര്‍ശനത്തിനെത്തി.
ലിംഗപരമായ ചിട്ടവട്ടങ്ങളെ ചോദ്യം ചെയ്യുകയും സ്ത്രീഹത്യയെക്കുറിച്ചുള്ള ലളിത വിവരണങ്ങളെ വെല്ലുവിളിക്കുകയും ചെയ്യുന്ന ഒരു ക്രൈം ത്രില്ലര്‍' ആണ് ഈ ചിത്രം. 'സസ്‌പെന്‍സ് നിറഞ്ഞ 'അണ്‍ഐഡന്റിഫൈഡ്' ഒരു സ്ത്രീ നയിക്കുന്ന ഡിറ്റക്റ്റീവ് കഥയാണ്.
റിയാദിനടുത്തുള്ള മരുഭൂമിയില്‍ ഒരു യുവതിയുടെ ഉപേക്ഷിക്കപ്പെട്ട മൃതദേഹം കണ്ടെത്തിയതിനെ തുടര്‍ന്ന് പുരുഷന്മാര്‍ മാത്രമുള്ള ഡിറ്റക്റ്റീവുകളുടെ സംഘത്തെ സഹായിക്കാന്‍ പോലീസ് ഡിപ്പാര്‍ട്ട്മെന്റിലെ ക്ലര്‍ക്ക് ആയ നവാല്‍ (സൗദി നടി മില അല്‍-സഹ്‌റാനി) തിരഞ്ഞെടുക്കപ്പെടുന്നതാണ് കഥയുടെ ഇതിവൃത്തം.
പോലീസ് മന്ദഗതിയില്‍ നീങ്ങുമ്പോള്‍, അവള്‍ നിശബ്ദമായി കാര്യങ്ങള്‍ സ്വന്തം കൈയ്യിലെടുക്കുന്നു. കാണാതായ വിദ്യാര്‍ഥിയെക്കുറിച്ച് അന്വേഷിക്കാന്‍ അവര്‍ വിവിധ ഗേള്‍സ് ഹൈസ്‌കൂളുകളില്‍ പോകുന്നു, എന്നാല്‍ സ്‌കൂള്‍ അധികൃതരില്‍ നിന്ന് നിസ്സഹകരണം മാത്രമാണ് ലഭിക്കുന്നത്. പോലീസ് ഉപേക്ഷിച്ച കേസില്‍ നവാല്‍ നടത്തിയ ഇടപെടലുകള്‍ മരിച്ച യുവതിക്ക് അന്തസ്സാര്‍ന്ന അന്ത്യയാത്ര ഒരുക്കാന്‍ കാരണമാകുന്നു. പക്ഷെ ആ മരണത്തിന് പിന്നിലുള്ള യഥാര്‍ഥ കുറ്റവാളിയെ തേടി പോലീസ് നീങ്ങുന്നതോടെ തികച്ചും അപ്രതീക്ഷിതമായ ക്ലൈമാക്‌സിലേക്ക് ചിത്രം നീങ്ങുന്നു.
'ദി പെര്‍ഫെക്റ്റ് കാന്‍ഡിഡേറ്റ്' സംവിധാനം ചെയ്ത അല്‍-മന്‍സൂറും ബ്രാഡ് നീമാനും ചേര്‍ന്നാണ് ഈ സിനിമയുടെ തിരക്കഥ ഒരുക്കിയത്.
2012-ല്‍, അല്‍-മന്‍സൂര്‍ തന്റെ ആദ്യ ഫീച്ചര്‍ ഫിലിമായ ''വാജ്ദ'' പുറത്തിറക്കി ചരിത്രം സൃഷ്ടിച്ചിരുന്നു. രാജ്യത്ത് പൂര്‍ണ്ണമായും ചിത്രീകരിച്ച ആദ്യത്തെ ഫീച്ചര്‍ ഫിലിമും ഒരു സൗദി വനിതാ സംവിധായിക നിര്‍മ്മിച്ച ആദ്യത്തെ ഫീച്ചര്‍ സിനിമയും അതായിരുന്നു.
'ആര്‍ക്കൈവ് 81,' 'സിറ്റി ഓഫ് ഫയര്‍,' 'ടെയില്‍സ് ഓഫ് ദ വാക്കിംഗ് ഡെഡ്,' 'ബോസ്: ലെഗസി' തുടങ്ങിയ ഹിറ്റ് സീരീസുകളുടെ എപ്പിസോഡുകള്‍ സംവിധാനം ചെയ്ത് ഹോളിവുഡിലെ പ്രമുഖ ടെലിവിഷന്‍ സംവിധായകരില്‍ ഒരാളായി അവര്‍ മാറി.
.jpg)
Related News
