ന്യൂഡല്‍ഹി: കഴിഞ്ഞ ഒരാഴ്ചയായി രാജ്യവ്യാപകമായി യാത്രക്കാരെ വലച്ച വ്യോമയാന പ്രതിസന്ധിക്ക് അയവ്. വിമാനങ്ങളുടെ സര്‍വീസ് ശക്തമാക്കിയ ഇന്‍ഡിഗോ, ദുരിതമനുഭവിച്ച യാത്രക്കാര്‍ക്ക് 610 കോടി രൂപയുടെ റീഫണ്ട് നല്‍കിയതായി സിവില്‍ ഏവിയേഷന്‍ മന്ത്രാലയം അറിയിച്ചു.

രാജ്യത്തെ ആഭ്യന്തര വ്യോമയാന വിപണിയുടെ 65% നിയന്ത്രിക്കുന്ന ഇന്‍ഡിഗോ, പ്രതിദിനം 2,300 സര്‍വീസുകള്‍ നടത്തുന്ന നിലയിലേക്ക് തിരിച്ചെത്തിക്കൊണ്ടിരിക്കുകയാണ്. ശനിയാഴ്ച 1,500-ല്‍ അധികവും ഞായറാഴ്ച 1,650-ഓളം വിമാന സര്‍വീസുകളും പുനരാരംഭിച്ചു. 138 ലക്ഷ്യസ്ഥാനങ്ങളില്‍ 135 എണ്ണത്തിലേക്കുള്ള കണക്റ്റിവിറ്റി പുനഃസ്ഥാപിച്ചു കഴിഞ്ഞു.

റദ്ദാക്കിയതും വൈകിയതുമായ വിമാനങ്ങളിലെ യാത്രക്കാര്‍ക്ക് ഇന്‍ഡിഗോ 610 കോടി രൂപയുടെ റീഫണ്ട് നല്‍കി. റദ്ദാക്കലുകള്‍ ബാധിച്ച യാത്രകള്‍ പുനഃക്രമീകരിക്കുന്നതിന് അധിക ഫീസ് ഈടാക്കില്ലെന്ന് സര്‍ക്കാര്‍ അറിയിച്ചു. കുടുങ്ങിക്കിടന്ന യാത്രക്കാരുടെ 3,000 ലഗേജുകള്‍ ഇതിനകം കണ്ടെത്തി തിരികെ നല്‍കി. ബാക്കിയുള്ളവ 48 മണിക്കൂറിനുള്ളില്‍ എത്തിക്കാന്‍ കേന്ദ്ര വ്യോമയാന മന്ത്രാലയം ഇന്‍ഡിഗോയ്ക്ക് നിര്‍ദ്ദേശം നല്‍കിയിട്ടുണ്ട്.

പ്രതിസന്ധി പരിഹരിക്കുന്നതിനായി കൂടുതല്‍ പൈലറ്റുമാരെ ഉള്‍പ്പെടുത്താന്‍ ഇന്‍ഡിഗോ തീരുമാനിച്ചു. ഡിജിസിഎയുടെ ഡ്യൂട്ടി ചട്ടം പാലിക്കുന്നതിന്റെ ഭാഗമായി, ഫെബ്രുവരി 10-ഓടെ 158 പൈലറ്റുമാരെയും അടുത്ത ഡിസംബറോടെ 742 പൈലറ്റുമാരെയും ഉള്‍പ്പെടുത്താനാണ് നീക്കം.

പ്രതിസന്ധി ഘട്ടത്തില്‍ യാത്രക്കാര്‍ക്ക് വേണ്ടി റീഫണ്ട്, റീബുക്കിംഗ് പ്രശ്‌നങ്ങള്‍ എന്നിവ ഉടനടി പരിഹരിക്കാന്‍ പ്രത്യേക സെല്ലുകള്‍ സ്ഥാപിച്ചിട്ടുണ്ടെന്നും മന്ത്രാലയം അറിയിച്ചു.