ഷാര്‍ജ: യുഎഇ ദേശീയ ദിനാഘോഷത്തിന്റെ (ഈദ് അല്‍ ഇത്തിഹാദ്) ഭാഗമായി വാഹനങ്ങളില്‍ പതിച്ച സ്റ്റിക്കറുകളും അലങ്കാരങ്ങളും നീക്കം ചെയ്യാനുള്ള സമയപരിധി ഇന്ന് (ശനി) അവസാനിക്കുമെന്ന് ഷാര്‍ജ പോലീസ് അറിയിച്ചു.

സമയപരിധിക്ക് ശേഷവും വാഹനങ്ങളില്‍ സ്റ്റിക്കറുകള്‍ പ്രദര്‍ശിപ്പിക്കുന്നത് നിയമലംഘനമായി കണക്കാക്കും. ഇത്തരക്കാര്‍ക്കെതിരെ പിഴയടക്കമുള്ള ശിക്ഷാ നടപടികള്‍ സ്വീകരിക്കുമെന്ന് ഷാര്‍ജ പോലീസ് ജനറല്‍ കമാന്‍ഡ് മുന്നറിയിപ്പ് നല്‍കി.

54-ാമത് ഈദ് അല്‍ ഇത്തിഹാദ് ആഘോഷങ്ങള്‍ക്കിടെ ഗുരുതരമായ ഗതാഗത നിയമലംഘനങ്ങള്‍ നടത്തിയതിന് 106 വാഹനങ്ങളും 9 മോട്ടോര്‍ സൈക്കിളുകളും പോലീസ് ഇതിനകം പിടിച്ചെടുത്തിട്ടുണ്ട്. റോഡ് സുരക്ഷക്ക് ഭീഷണിയാകുന്ന വിധത്തില്‍ അമിത ശബ്ദമുണ്ടാക്കുക, മറ്റുള്ളവര്‍ക്ക് ശല്യമുണ്ടാക്കുക, അശ്രദ്ധമായി വാഹനമോടിക്കുക, ലൈസന്‍സില്ലാതെ വാഹനമോടിക്കുക തുടങ്ങിയ കുറ്റങ്ങള്‍ക്കാണ് നടപടി സ്വീകരിച്ചത്.

ഇത്തവണ വാഹനങ്ങള്‍ അലങ്കരിക്കുന്നതില്‍ ലളിതവും മനോഹരവുമായ ഡിസൈനുകള്‍ക്കാണ് വാഹന ഉടമകള്‍ മുന്‍ഗണന നല്‍കിയതെന്ന് വിപണി വൃത്തങ്ങള്‍ സൂചിപ്പിച്ചു. നിയമനടപടികള്‍ ഒഴിവാക്കുന്നതിനായി ഡിസംബര്‍ 6-ന് മുമ്പ് തന്നെ എല്ലാ വാഹന ഉടമകളും അലങ്കാരങ്ങള്‍ നീക്കം ചെയ്യണമെന്ന് പോലീസ് അഭ്യര്‍ത്ഥിച്ചു.