ജിദ്ദ- സൗദി മന്ത്രിസഭ ഇന്നലെ അംഗീകരിച്ച 2026-ലെ പൊതു ബജറ്റില്‍ മൊത്തം ചെലവിന്റെ 12% (162 ബില്യണ്‍ റിയാല്‍) മൂലധന ചെലവുകള്‍ക്കായി നീക്കിവെച്ചിരിക്കുന്നു. ജീവിതനിലവാരം ഉയര്‍ത്തുക എന്ന ലക്ഷ്യത്തോടെ പൊതു സൗകര്യങ്ങളുടെയും അടിസ്ഥാന സേവനങ്ങളുടെയും വികസനത്തിനായി ചെലവുകള്‍ തുടരുന്നതിലാണ് ഈ ബജറ്റ് ശ്രദ്ധ കേന്ദ്രീകരിക്കുന്നത്.

2026-ലെ മൂലധന ചെലവ് 162 ബില്യണ്‍ റിയാലാണ്. ഇത് 2025-ലെ കണക്കാക്കിയ തുകയേക്കാള്‍ ഏകദേശം 5.5% കുറവാണ്. നിരവധി പദ്ധതികളുടെ പൂര്‍ത്തീകരണവും ലക്ഷ്യങ്ങള്‍ കൈവരിച്ചതുമാണ് ഈ കുറവിന് കാരണമായി വിലയിരുത്തുന്നത്. നിക്ഷേപ അവസരങ്ങള്‍ക്ക് നേതൃത്വം നല്‍കാന്‍ സ്വകാര്യമേഖലയെയും ദേശീയ ഫണ്ടുകളെയും സര്‍ക്കാര്‍ കൂടുതല്‍ പ്രോത്സാഹിപ്പിക്കുന്നതും ഇതിനുള്ള കാരണമാണ്.

2021 മുതല്‍ സൗദി അറേബ്യ മൂലധന ചെലവ് മൊത്തം ബജറ്റ് ചെലവിന്റെ 11% മുതല്‍ 14% വരെ എന്ന പരിധിയില്‍ നിലനിര്‍ത്തിപ്പോരികയാണ്. കഴിഞ്ഞ വര്‍ഷത്തെ പ്രാഥമിക കണക്കുകള്‍ പ്രകാരം മൂലധന ചെലവ് ഏകദേശം 172 ബില്യണ്‍ റിയാല്‍ ആയിരുന്നു. അതിന്റെ മുന്‍ വര്‍ഷത്തേക്കാള്‍ 10% കുറവായിരുന്നു ഇത്.

ബജറ്റിന് അംഗീകാരം നല്‍കിക്കൊണ്ട് കിരീടാവകാശി മുഹമ്മദ് ബിന്‍ സല്‍മാന്‍ രാജകുമാരന്‍ പറഞ്ഞത്, സൗദി സമ്പദ്വ്യവസ്ഥയെയും പൗരന്മാരെയും പിന്തുണക്കുന്നതിനുള്ള ഘടനപരമായ പരിവര്‍ത്തനമാണ് സര്‍ക്കാരിന്റെ പ്രധാന മുന്‍ഗണന എന്നാണ്. പുതിയ നയത്തില്‍, രാജ്യത്തിന്റെ പൊതു ബജറ്റിനൊപ്പം പബ്ലിക് ഇന്‍വെസ്റ്റ്മെന്റ് ഫണ്ടിനെയും (പിഐഎഫ്) മൂലധന ചെലവുകളുടെ പ്രധാന പങ്കാളിയായി സമന്വയിപ്പിക്കാന്‍ സൗദി ലക്ഷ്യമിടുന്നു. എണ്ണയിതര സ്രോതസ്സുകളിലേക്ക് സമ്പദ്വ്യവസ്ഥയെ വൈവിധ്യവത്കരിക്കുന്നതില്‍ പിഐഎഫ് ഒരു പ്രധാന ചാലകശക്തിയാണ്.

വിഷന്‍ 2030 യാഥാര്‍ത്ഥ്യമാക്കാനുള്ള പരിപാടികള്‍, പ്രധാന പദ്ധതികള്‍, മുനിസിപ്പല്‍ സേവനങ്ങള്‍, ആരോഗ്യം, വിദ്യാഭ്യാസം തുടങ്ങിയ മേഖലകളിലെ നിക്ഷേപ പദ്ധതികള്‍ എന്നിവ മൂലധന ചെലവില്‍ ഉള്‍പ്പെടുന്നു.

ധനമന്ത്രി മുഹമ്മദ് അല്‍-ജദ്ആന്‍ അഭിപ്രായപ്പെട്ടത്, രാജ്യം ഇതുവരെ സാമ്പത്തിക സുസ്ഥിരതയുടെ ഘട്ടത്തില്‍ എത്തിയിട്ടില്ലെന്നും അതിലേക്ക് എത്താന്‍ പരിശ്രമിക്കുകയാണെന്നുമാണ്. നിലവിലെ ചെലവുകളില്‍ ഭൂരിഭാഗവും ഭാവിയില്‍ പ്രയോജനം ലഭിക്കുന്ന നിക്ഷേപങ്ങളാണ്. വായ്പ എടുക്കുന്നതിനുള്ള ചെലവിനേക്കാള്‍ കൂടുതല്‍ വരുമാനം ലഭിക്കുന്നിടത്തോളം കാലം സര്‍ക്കാര്‍ ചെലവുകള്‍ തുടരും.

വളര്‍ച്ചയെയും പദ്ധതികളെയും പിന്തുണയ്ക്കുന്നതിനായി സൗദി അറേബ്യ വിപുലീകരണ ബജറ്റുകളാണ് ലക്ഷ്യമിടുന്നത്.
വന്‍കിട പദ്ധതികള്‍ക്കായി വലിയ തുക ചെലവഴിക്കുമ്പോഴും, അടിസ്ഥാന സേവനങ്ങള്‍ മെച്ചപ്പെടുത്തുന്നതിലും പൗരന്മാര്‍ക്ക് നല്‍കുന്ന സേവനങ്ങളുടെ ഗുണനിലവാരം ഉയര്‍ത്തുന്നതിലുമാണ് അത് ശ്രദ്ധ കേന്ദ്രീകരിക്കുന്നത്.

സൗദി അറേബ്യയിലെ പണപ്പെരുപ്പം 2.3% എന്ന നിലയില്‍ സ്ഥിരത കൈവരിച്ചിട്ടുണ്ട്, 2028 ആകുമ്പോഴേക്കും ഇത് 1.9% ആയി കുറയുമെന്നാണ് പ്രതീക്ഷിക്കുന്നത്.