ജിദ്ദ: ജിദ്ദയിലെ മലയാളികള്‍ക്കിടയില്‍ വിശുദ്ധ ഖുര്‍ആനിന്റെയും പ്രവാചക ചര്യയുടെയും അടിസ്ഥാനത്തില്‍ പ്രബോധന പ്രവര്‍ത്തനങ്ങള്‍ നടത്തി വരുന്ന ജിദ്ദ ഇന്ത്യന്‍ ഇസ്ലാഹി സെന്റര്‍ മഹ്ജറിലുള്ള ന്യൂ ഗുലൈല്‍ പോളി ക്ലിനിക്കില്‍ പുതുതായി ഖുര്‍ആന്‍ പഠന ക്ലാസ് ആരംഭിച്ചു. പോളി ക്ലിനിക്ക് സി.ഇ.ഒ. അബ്ദുല്‍ ഗഫൂര്‍ പൂവഞ്ചേരി ഉദ്ഘാടന കര്‍മ്മം നിര്‍വ്വഹിച്ചു. മാനവരാശിയുടെ സമ്പൂര്‍ണ്ണ സംസ്‌കരണത്തിന്റെ നിദാനം വിശുദ്ധ ഖുര്‍ആനിന്റെ ആശയങ്ങളെ ജീവവായുവാക്കുകയാണെന്നും അതിന്റെ പ്രകടനമായ പ്രവാചക ജീവിതത്തിന്റെ നേര്‍ ചിത്രം ഒരോരുത്തരിലൂടേയും സാക്ഷാത്കരിക്കലാണെന്നും പഠന ക്ലാസിന് നേതൃത്വം നല്‍കിയ ശിഹാബ് സലഫി എടക്കര പറഞ്ഞു.
തുടര്‍ന്ന് സംസാരിച്ച ഇസ്സുദ്ദീന്‍ സ്വലാഹി ഖുര്‍ആന്‍ പഠനത്തിന്റെ സവിശേഷതകളെ കുറിച്ച് വിവരിച്ചു. നമ്മുടെ ആരോഗ്യവും ഒഴിവുസമയവും ചോദ്യം ചെയ്യപ്പെടുമെന്നും നമ്മുടെ മരണ ശേഷം പരലോകത്ത് നമുക്ക് സമാധാനം പറയേണ്ടി വരുമെന്നും അദ്ദേഹം സദസ്സിനെ ഉണര്‍ത്തി. എല്ലാ തിങ്കളാഴ്ചയും ഇശാ നമസ്‌കാരത്തിന് ശേഷമായിരിക്കും ക്ലാസുകള്‍ ആരംഭിക്കുക. വിശുദ്ധ ഖുര്‍ആനിലെ അമൂല്യമായ പാഠങ്ങള്‍ മനസ്സിലാക്കുവാന്‍ എല്ലാവരെയും ഖുര്‍ആന്‍ പഠന ക്ലാസിലേക്ക് സ്വാഗതം ചെയ്യുന്നതായി ഭാരവാഹികള്‍ അറിയിച്ചു. കൂടുതല്‍ വിവരങ്ങള്‍ക്ക് 0571796161, 0500903547, 0509396416 എന്നീ നമ്പറില്‍ ബന്ധപ്പെടാവുന്നതാണ്.
ജിദ്ദ ഇന്ത്യന്‍ ഇസ്ലാഹി സെന്റര്‍ പ്രസിഡണ്ട് അബ്ബാസ് ചെമ്പന്‍ അധ്യക്ഷത വഹിച്ചു. നൂരിഷാ വള്ളിക്കുന്ന് സ്വാഗതവും അഷ്‌റഫ് ഒളവണ്ണ നന്ദിയും പറഞ്ഞു.
Related News
