റിയാദ്: ആഗോള തൊഴില്‍ മേഖലയിലെ പ്രമുഖരെ ഒരുമിപ്പിച്ച് ഗ്ലോബല്‍ ലേബര്‍ മാര്‍ക്കറ്റ് കോണ്‍ഫറന്‍സിന്റെ (GLMC) മൂന്നാം പതിപ്പിന് സൗദി അറേബ്യയുടെ തലസ്ഥാനമായ റിയാദ് ആതിഥേയത്വം വഹിക്കും. 2026 ജനുവരി 26, 27 തീയതികളിലാണ് സമ്മേളനം. മാനവ വിഭവശേഷി, സാമൂഹിക വികസന മന്ത്രാലയമാണ് സമ്മേളനം സംഘടിപ്പിക്കുന്നത്. 'കിങ് അബ്ദുല്‍ അസീസ് ഇന്റര്‍നാഷണല്‍ കോണ്‍ഫറന്‍സ് സെന്ററില്‍' നടക്കുന്ന സമ്മേളനത്തിന്റെ പ്രധാന പ്രമേയം 'ഭാവി പുരോഗതിയിലാണ്' എന്നതാണ്.

ലോകമെമ്പാടുമുള്ള ഭരണാധികാരികള്‍, ബിസിനസ്സ് രംഗത്തെ നേതാക്കള്‍, തൊഴില്‍ വിപണി വിദഗ്ധര്‍, അന്താരാഷ്ട്ര സംഘടനകളില്‍ നിന്നുള്ള പ്രതിനിധികള്‍ തുടങ്ങിയവര്‍ സമ്മേളനത്തില്‍ പങ്കെടുക്കും. 50-ലധികം ഇവന്റുകളും സെഷനുകളുമായി 200-ല്‍ അധികം പ്രഭാഷകരും ലോകത്തിന്റെ വിവിധ ഭാഗങ്ങളില്‍ നിന്നുള്ള 7,000-ത്തിലധികം പ്രതിനിധികളും സമ്മേളനത്തില്‍ അണിനിരക്കും.

തൊഴില്‍ മേഖലയിലെ ആഗോള വിഷയങ്ങളില്‍ ശ്രദ്ധ കേന്ദ്രീകരിച്ചുള്ള ഹാക്കത്തോണുകളും ഗവേഷകര്‍ നയിക്കുന്ന അക്കാദമിക് ചര്‍ച്ചകളും ഈ വര്‍ഷത്തെ പരിപാടിയുടെ പ്രത്യേകതയാണ്.

ഇന്റര്‍നാഷണല്‍ ലേബര്‍ ഓര്‍ഗനൈസേഷന്‍, വേള്‍ഡ് ബാങ്ക്, യുണൈറ്റഡ് നേഷന്‍സ് ഡെവലപ്‌മെന്റ് പ്രോഗ്രാം , ഓര്‍ഗനൈസേഷന്‍ ഫോര്‍ ഇക്കണോമിക് കോ-ഓപ്പറേഷന്‍ ആന്‍ഡ് ഡെവലപ്‌മെന്റ് തുടങ്ങിയ പ്രമുഖ അന്താരാഷ്ട്ര സംഘടനകളുമായി സഹകരിച്ചാണ് സൗദി മന്ത്രാലയം ഈ സുപ്രധാന സമ്മേളനം നടത്തുന്നത്.