ഖമീസ്മുഷൈത്ത്: അസീര്‍ കലാലയം സാംസ്‌കാരിക വേദി സംഘടിപ്പിക്കുന്ന പ്രവാസി സാംസ്‌കാരിക രംഗത്തെ ആഘോഷമായ പ്രവാസി സാഹിത്യോത്സവത്തിന്റെ പതിനഞ്ചാം പതിപ്പ് ജനുവരി 2ന് ഖമീസില്‍ സംഘടിപ്പിക്കുന്നു. അസീര്‍ പ്രവിശ്യയിലെ അബഹ, ഖമീസ് മുഷൈത്, നജ്റാന്‍, മഹായില്‍ എന്നിവിടങ്ങളില്‍ നിന്നുള്ള മത്സരാര്‍ത്ഥികളാണ് സോണ്‍ സാഹിത്യോത്സവത്തില്‍ മാറ്റുരയ്ക്കുക. പ്രവാസി സമൂഹത്തിന്റെ സഹകരണത്തോടെ വര്‍ഷം തോറും നടക്കുന്ന സാഹിത്യോത്സവ് പ്രവാസി കുടുംബങ്ങളുടെ കൂട്ടായ്മയും കലാസാംസ്‌കാരിക ഐക്യവും പ്രോത്സാഹിപ്പിക്കുന്ന വേദിയായി മാറിയിട്ടുണ്ട്. ഇത്തവണ കലാ - സാഹിത്യ മേഖലകളിലായി 60-ല്‍ പരം മത്സര ഇനങ്ങളാണ് ഒരുക്കിയിട്ടുള്ളത്. 30 വയസ്സ് കവിയാത്ത സ്ത്രീ പുരുഷന്മാര്‍ക്കും, കുട്ടികള്‍ക്കും മത്സരത്തില്‍ പങ്കെടുക്കാം.

ICF നാഷണല്‍ സെക്രട്ടറി മഹ്‌മൂദ് സഖാഫിയുടെ അധ്യക്ഷതയില്‍ നാഷനല്‍ സെക്രട്ടറി അബ്ദുള്‍ സലാം കുറ്റ്യാടി ഉദ്ഘാടനം നിര്‍വഹിച്ചു. ഹസന്‍ അഹ്സനി കാലടി സംഘാടക സമിതി പ്രഖ്യാപനം നടത്തി. ഹാഫിള് സാജിദ് സഖാഫിയുടെ (ചെയര്‍മാന്‍) നേതൃത്വത്തില്‍ 81 അംഗ സംഘാടക സമിതിയാണ് നിലവില്‍ വന്നത്. സാഹിത്യോത്സവിന്റെ പോസ്റ്റര്‍ പ്രകാശനവും ചടങ്ങില്‍ വെച്ച് നിര്‍വ്വഹിച്ചു. RSC അസീര്‍ സോണ്‍ ജനറല്‍ കണ്‍വീനര്‍ യൂസുഫ് ആലത്തിയൂര്‍ സ്വാഗതവും സംഘാടക സമിതി ജനറല്‍ കണ്‍വീനര്‍ മൊയ്ദീന്‍ മാവൂര്‍ നന്ദിയും പറഞ്ഞു. ICF വെസ്റ്റ് ചാപ്റ്റര്‍ സെക്രട്ടറി അബ്ദുല്‍ സത്താര്‍ പതിമംഗലം, KCF ഖമീസ് മുഷൈത് പ്രസിഡന്റ് അബ്ദുല്‍ റസാഖ് ബന്നൂര്‍, RSC ഗ്ലോബല്‍ എക്‌സിക്യൂട്ടീവ് നിയാസ് കാക്കൂര്‍ തുടങ്ങിയ പ്രമുഖര്‍ യോഗത്തില്‍ പങ്കെടുത്തു.

അസീറിലെ പ്രവാസി സമൂഹത്തിന്റെ ഐക്യവും സാഹിത്യ-സാംസ്‌കാരിക പാരമ്പര്യവും ഉയര്‍ത്തിപ്പിടിക്കുന്ന വലിയ പരിപാടിയായി തന്നെ ഇത്തവണത്തെ സാഹിത്യോത്സവ് മാറുമെന്ന് സംഘാടക സമിതി അറിയിച്ചു.