റിയാദ്: റിയാദ് മ്യൂസിക് വീക്കിന്റെ രണ്ടാം പതിപ്പ് 2025 ഡിസംബര്‍ 4 മുതല്‍ 13 വരെ നടത്തുമെന്ന് സൗദി അറേബ്യയുടെ സംഗീത അതോറിറ്റി പ്രഖ്യാപിച്ചു. ഈ വര്‍ഷത്തെ പരിപാടികളില്‍ സംഗീതജ്ഞര്‍, നിര്‍മ്മാതാക്കള്‍, നയരൂപീകരണ വിദഗ്ധര്‍ എന്നിവര്‍ പങ്കെടുക്കും.
റിയാദ് മ്യൂസിക് വീക്ക് ലോകത്തിന് മുമ്പില്‍ സൗദി അറേബ്യന്‍ സംഗീത ലോകത്തിന്റെ ഹൃദയമിടിപ്പ് കണ്ടെത്താനുള്ള അവസരമാണെന്ന് മ്യൂസിക് അതോറിറ്റി സി.ഇ.ഒ പോള്‍ പസഫിക്കോ അഭിപ്രായപ്പെട്ടു. ഈ വര്‍ഷത്തെ പരിപാടികള്‍ അന്തര്‍ദേശീയ തലത്തിലുള്ള സാംസ്‌കാരികവും സര്‍ഗാത്മകവുമായ കൈമാറ്റത്തിന്റെ ആത്മാവ് പ്രതിഫലിപ്പിക്കുമെന്നും അദ്ദേഹം പറഞ്ഞു.
സൗദി പ്രതിഭകളെയും പ്രാദേശിക സംഗീത ഉള്ളടക്കങ്ങളെയും പ്രദര്‍ശിപ്പിക്കുന്നതിലൂടെയും വിവിധ മേഖലകളുമായുള്ള സഹകരണം വളര്‍ത്തുന്നതിലൂടെയും, രാജ്യത്തെ സംഗീത വ്യവസായത്തിലെ കലാകാരന്മാര്‍ക്കും പ്രൊഫഷണലുകള്‍ക്കും സുസ്ഥിരമായ കരിയര്‍ പാതകള്‍ സൃഷ്ടിക്കാനും ദീര്‍ഘകാല വളര്‍ച്ച നേടാനും റിയാദ് മ്യൂസിക് വീക്ക് ലക്ഷ്യമിടുന്നു.
ഈ വര്‍ഷത്തെ പതിപ്പില്‍ സൗദി റിസര്‍ച്ച് ആന്‍ഡ് മീഡിയ ഗ്രൂപ്പുമായും എംഡിഎല്‍ ബീറ്റ്‌സുമായും പ്രധാന പങ്കാളിത്തങ്ങള്‍ ഉണ്ടാകും. കൂടാതെ, സംഗീത പ്രകടനങ്ങള്‍, എക്‌സിബിഷനുകള്‍, കോണ്‍ഫറന്‍സുകള്‍, മറ്റ് വിവിധ പരിപാടികള്‍ എന്നിവ ഉള്‍പ്പെടുന്ന സമഗ്രമായ പരിപാടിയായിരിക്കും ഇത്. സര്‍ഗ്ഗാത്മക സമൂഹത്തിന് ഉണര്‍വ് നല്‍കുകയും, റിയാദിനെ ഒരു പ്രമുഖ ആഗോള സംഗീത കേന്ദ്രമാക്കി മാറ്റുകയും മേഖലയിലെ വളരുന്ന സര്‍ഗ്ഗാത്മക സമ്പദ്വ്യവസ്ഥയുടെ ഒരു പ്രധാന കേന്ദ്രമായി സ്ഥാപിക്കുകയും ചെയ്യും.
പൈതൃക കേന്ദ്രങ്ങള്‍, ആര്‍ട്ട് ഡിസ്ട്രിക്ടുകള്‍, കഫേകള്‍, ഗസ്റ്റ് ഹൗസുകള്‍ തുടങ്ങി റിയാദിന്റെ വിവിധ പ്രദേശങ്ങളില്‍ സംഗീതത്തെ നഗര ജീവിതവുമായി സമന്വയിപ്പിക്കാന്‍ ലക്ഷ്യമിട്ടുള്ള സംവേദനാത്മക സംഗീത അനുഭവങ്ങളും ഉണ്ടാകും. സംഗീത വിദ്യാഭ്യാസ നയങ്ങള്‍, സംഗീത വ്യവസായത്തിലെ സാങ്കേതിക മുന്നേറ്റങ്ങള്‍, ഏറ്റവും പുതിയ കണ്ടുപിടിത്തങ്ങള്‍ എന്നിവയും ഫോറങ്ങളില്‍ ചര്‍ച്ച ചെയ്യും.
Related News
