മുംബൈ - 2025 ലെ ഏറ്റവും മോശം കറന്‍സിയായി ഇന്ത്യന്‍ രൂപ. 2025 ജനുവരി-ഒക്ടോബര്‍ കാലയളവില്‍ ഡോളറുമായുള്ള വിനിമയത്തില്‍ ഇന്ത്യന്‍ രൂപയുടെ മൂല്യത്തില്‍ 4.3 ശതമാനത്തിന്റെ ഇടിവാണ് നേരിട്ടത്. അമേരിക്ക-ഇന്ത്യ വ്യാപാരക്കരാര്‍ ഉടനുണ്ടായില്ലെങ്കില്‍ ഡോളറിനെതിരേ രൂപയുടെ മൂല്യം 90 കടന്നേക്കുമെന്നാണ് വിദേശവിനിമയ വിപണിയുമായി ബന്ധപ്പെട്ടവര്‍ നല്‍കുന്ന സൂചന. അതായത് ഒരു ഡോളറിന് 90 രൂപ നല്‍കണം.

നവംബര്‍ 21-ന് വ്യാപാരത്തിനിടെ ഇന്ത്യന്‍ രൂപ ഡോളറിനെതിരേ പുതിയ താഴ്ചയിലെത്തിയിരുന്നു. ഡോളറൊന്നിന് 89.66 എന്ന നിലയിലേക്കാണ് കൂപ്പുകുത്തിയത്. ഇതിനുശേഷം തിരിച്ചുകയറിയ രൂപ 89.27 നിലവാരത്തിലാണ് ബുധനാഴ്ച വ്യാപാരം അവസാനിപ്പിച്ചത്. ഈ സാമ്പത്തിക വര്‍ഷമെടുത്താല്‍ ജാപ്പനീസ് യെന്നിനുപിന്നില്‍ രണ്ടാമതാണ് രൂപ. ജാപ്പനീസ് യെന്‍ 4.36 ശതമാനം ഇടിവുനേരിട്ടപ്പോള്‍ രൂപക്കിത് 4.26 ശതമാനമാണ്.

ഏതാനും മാസമായി ഡോളറിനെതിരേ രൂപ തുടര്‍ച്ചയായി ഇടിയുകയാണ്. ഓഹരിവിപണയില്‍ വിദേശനിക്ഷേപകര്‍ തുടര്‍ച്ചയായി ഓഹരികള്‍ വിറ്റഴിക്കുന്നതും യു.എസിന്റെ ഉയര്‍ന്ന തീരുവയും സ്വര്‍ണം, വെള്ളി എന്നിവയുടെ ഉയര്‍ന്ന വിലയുമാണ് രൂപക്ക് തിരിച്ചടിയാകുന്നത്. ഏഷ്യന്‍ കറന്‍സികളായ ചൈനീസ് യുവാന്‍, ഇന്‍ഡൊനീഷ്യന്‍ റുപയ എന്നിവയുമായി താരതമ്യം ചെയ്യുമ്പോള്‍ ഇന്ത്യന്‍ രൂപയുടെ മൂല്യത്തില്‍ വന്‍വീഴ്ചയാണ് രേഖപ്പെടുത്തിയിട്ടുള്ളത്. ഇന്‍ഡൊനീഷ്യന്‍ റുപയക്കിത് 2.9 ശതമാനവും ഫിലിപ്പീന്‍ പെസോക്ക് 1.3 ശതമാനവുമാണ്. ചൈനീസ് യുവാന്റെ മൂല്യം ഉയരുകയാണ്.
ഡോളറുമായുള്ള വിനിമയമൂല്യം ക്രമീകരിക്കുന്നതിന് തുടര്‍ച്ചയായി വിപണിയിലിടപെടുന്ന ചൈനീസ് വിദേശവിനിമയനയം ഇതില്‍ വലിയ പങ്കുവഹിക്കുന്നുണ്ട്. ഡോളര്‍ കരുത്ത് വീണ്ടെടുത്തതും രൂപയുടെ മൂല്യത്തെ കാര്യമായി ബാധിച്ചു. രണ്ടുമാസത്തിനിടെ ഡോളറിന്റെ മൂല്യത്തില്‍ 3.6 ശതമാനം വര്‍ധനയുണ്ടായിട്ടുണ്ട്. ഇതും ഇന്ത്യന്‍ കറന്‍സിക്ക് സമ്മര്‍ദം കൂട്ടുന്നതാണ്.