ഗുവാഹതി- ദക്ഷിണാഫ്രിക്കക്കെതിരായ രണ്ടാം ടെസ്റ്റില്‍ ഇന്ത്യ തോല്‍വിയിലേക്ക്. 60 റണ്‍സെടുക്കുന്നതിനിടെ അഞ്ച് വിക്കറ്റുകള്‍ നഷ്ടമായ ഇന്ത്യക്ക് ശേഷിക്കുന്ന അഞ്ചു വിക്കറ്റുകളുമായി ഇന്ന് പിടിച്ച് നില്‍ക്കണം. ഇല്ലെങ്കില്‍ പരമ്പര ദക്ഷിണാഫ്രിക്ക തൂത്തുവാരും.

549 റണ്‍സ് വിജയലക്ഷ്യവുമായി ബാറ്റിംഗ് തുടങ്ങിയ ഇന്ത്യ നാലാംദിനം കളിനിര്‍ത്തുമ്പോള്‍ രണ്ടിന് 27 എന്ന നിലയിലായിരുന്നു. അവസാനദിനം കളി പുനരാരംഭിച്ചപ്പോള്‍ ആദ്യ സെഷന്‍ പൂര്‍ത്തിയാക്കുംമുമ്പേ മൂന്ന് വിക്കറ്റുകള്‍കൂടി നഷ്ടമായി. നിലവില്‍ അഞ്ചിന് 70 എന്ന നിലയില്‍ ബാറ്റിങ് തുടരുന്ന ഇന്ത്യക്കായി സായ് സുദര്‍ശനും (13*) രവീന്ദ്ര ജഡേജ(7*) യുമാണ് ക്രീസിലുള്ളത്.

കഴിഞ്ഞ ദിവസം വാച്ച്മാനായി എത്തിയ കുല്‍ദീപ് യാദവി (5)നെയാണ് ഇന്ന് ഇന്ത്യക്ക് ആദ്യം നഷ്ടമായത്. രണ്ട് റണ്‍കൂടി ചേര്‍ക്കുന്നതിനിടെ ധ്രുവ് ജുറലും (2) പുറത്തായി. 13 റണ്‍സെടുത്ത ഋഷഭ് പന്തും പിന്നാലെ കളംവിട്ടു. സൈമണ്‍ ഹാമറാണ് വിക്കറ്റുകളും കരസ്ഥമാക്കിയത്. കെ.എല്‍.രാഹുലിന്റെ സ്റ്റംമ്പും ഹാമര്‍ പിഴുതിരുന്നു. ഇതോടെ നാലു വിക്കറ്റായി ദക്ഷിണാഫ്രിക്കന്‍ ഓഫ് സ്പിന്നര്‍ക്ക്. ജന്‍സെനാണ് ഒരു വിക്കറ്റ്.
സ്‌കോര്‍: ദക്ഷിണാഫ്രിക്ക 489, 260/5 ഡിക്ല. ഇന്ത്യ 201, 70/5.