റിയാദ്- അല്‍-ഫൈസലിയ ജില്ലയില്‍മുനിസിപ്പല്‍ അധികൃതരും സുരക്ഷാ വിഭാഗങ്ങളും മറ്റ് സര്‍ക്കാര്‍ ഏജന്‍സികളും ചേര്‍ന്ന് നടത്തിയ റെയ്ഡില്‍ നിരവധി അനധികൃത സ്ഥാപനങ്ങള്‍ അടച്ചുപൂട്ടുകയും വന്‍തോതില്‍ ഭക്ഷ്യവസ്തുക്കളും നിരോധിത ഉല്‍പ്പന്നങ്ങളും പിടിച്ചെടുക്കുകയും ചെയ്തു.
ലൈസന്‍സില്ലാത്ത വാണിജ്യ സ്ഥാപനങ്ങളെയും, സ്വയംതൊഴില്‍ ചെയ്യുന്ന തൊഴിലാളികള്‍ക്ക് വാടകയ്ക്ക് നല്‍കിയതും ഭാഗികമായി വാണിജ്യ ആവശ്യങ്ങള്‍ക്കായി മാറ്റിയതുമായ താമസസ്ഥലങ്ങളെയും കേന്ദ്രീകരിച്ചായിരുന്നു പരിശോധന.

പരിശോധനയുടെ ഫലമായി നിരവധി നിയമലംഘനങ്ങളാണ് അധികൃതര്‍ രേഖപ്പെടുത്തിയത്. 85 സ്ഥാപനങ്ങള്‍ അടച്ചുപൂട്ടി. 171 നിയമലംഘന നോട്ടീസുകള്‍ നല്‍കി. 32 സ്ഥലങ്ങളിലെ വൈദ്യുതി ബന്ധം വിച്ഛേദിച്ചു. 22 തെരുവ് കച്ചവടക്കാരെ അറസ്റ്റ് ചെയ്തു. 13.5 ടണ്‍ പച്ചക്കറികള്‍, പഴങ്ങള്‍, മറ്റ് ഭക്ഷ്യവസ്തുക്കള്‍ എന്നിവ പിടിച്ചെടുത്തു. 901 പുകയില ഉല്‍പ്പന്നങ്ങള്‍ നശിപ്പിച്ചു. 61 ഇനം സാധനങ്ങള്‍ കണ്ടുകെട്ടി.

റെസ്റ്റോറന്റുകള്‍, അലക്കുശാലകള്‍, ബാര്‍ബര്‍ ഷോപ്പുകള്‍, തയ്യല്‍ കടകള്‍, റെഡിമെയ്ഡ് വസ്ത്രശാലകള്‍, ബഫറ്റുകള്‍, തെരുവ് കച്ചവട സ്ഥലങ്ങള്‍ എന്നിവിടങ്ങളിലായിരുന്നു പ്രധാന പരിശോധന.