ജിദ്ദ: കെഎംസിസി സെന്‍ട്രല്‍ കമ്മിറ്റി സംഘടിപ്പിക്കുന്ന ഒരു മാസത്തോളം നീണ്ടു നില്‍ക്കുന്ന ഇ. അഹമ്മദ് സാഹിബ് മെമ്മോറിയല്‍ സൂപ്പര്‍-7 കപ്പിന് വേണ്ടിയുള്ള ഫുട്‌ബോള്‍ ടൂര്‍ണമെന്റ് മഹോത്സവം ജിദ്ദയില്‍ മുസ്ലിം ലീഗ് ദേശീയ സെക്രട്ടറി ഇ.ടി. മുഹമ്മദ് ബഷീര്‍ എം.പി ഉല്‍ഘടനം ചെയ്തു. കായികവും ശാരീരിക ക്ഷമതയും പ്രധാനം ചെയ്യുന്നതിനപ്പുറം പാരസ്പര്യ സ്‌നേഹവും ഐക്യവും ഊട്ടിഉറപ്പിക്കാനും സംഘടനാ പ്രവര്‍ത്തകരെ ഊര്‍ജ്വസലരാക്കി നിര്‍ത്തുന്നതിനും പ്രയോജനപ്പെടുന്ന ഗെയിം ആണ് ഫുടബോള്‍ പോലുള്ള കളികള്‍ എന്നദ്ദേഹം പറഞ്ഞു.
വി.പി. മുഹമ്മദ് അലി, എബിസി കാര്‍ഗോ പ്രധിനിധി ഷിബിലി, കുഞ്ഞിമോന്‍ കാക്കിയ, അഹമ്മദ് പാളയാട്ട്, കാദര്‍ ചെര്‍ക്കള, ഇസ്മായില്‍ മുണ്ടക്കുളം എന്നിവര്‍ ആശംസകളര്‍പ്പിച്ചു. വി.പി. മുസ്തഫ സ്വാഗതവും ഷൗക്കത്ത് ഞാറക്കോടന്‍ നന്ദിയും പറഞ്ഞു.
ഉല്‍ഘടനത്തോടനുബന്ധിച്ചു ആയിരകണക്കിന് വളണ്ടിയര്‍മാര്‍ അണിനിരന്ന വിവിധ കലാ പ്രകടനങ്ങളോടുംം വേഷ വിധാനങ്ങളോടും കൂടിയ മാര്‍ച്ച് പാസ്റ്റ് ആകര്‍ഷകമായി. ജിദ്ദയിലെ കെഎംസിസി പ്രവര്‍ത്തകരുടെ സംഘ ശക്തിയും സര്‍ഗ്ഗ ശേഷിയും പ്രതിഫലിക്കുന്നതായിരുന്നു മാര്‍ച്ച് പാസ്റ്റ്.
ജിദ്ദ കെഎംസിസി സെന്‍ട്രല്‍ കമ്മിറ്റി സെക്രട്ടറി വിപി മുസ്തഫ, ആക്ടിങ് പ്രസിഡണ്ട് എ.കെ ബാവ , ചെയര്‍മാന്‍ ഇസ്മായില്‍ മുണ്ടക്കുളം എന്നിവര്‍ മാര്‍ച്ച് പാസ്റ്റില്‍ സലൂട്ട് സ്വീകരിച്ചു.
തുടര്‍ന്ന് പ്രേക്ഷകര്‍ തിങ്ങി നിറഞ്ഞ സ്റ്റേഡിയത്തില്‍ നടന്ന ആദ്യ മത്സരത്തില്‍ വയനാട് ജില്ലാ കെഎംസിസി പവര്‍ഹൗസ് വയനാട് എഫ് സിയെയും, രണ്ടാമത്തെ മത്സരത്തില്‍ സി എം എ സി ഫൈസലിയ എഫ് സിയും അവസാനത്തെ മത്സരത്തില്‍ ബിറ്റ് ബോള്‍ട്ട് എഫ്‌സിയും ജേതാക്കളായി.
