ബെംഗളൂരു: രാജ്യത്തെ പ്രമുഖ ഐടി കമ്പനിയായ ടാറ്റ കണ്‍സള്‍ട്ടന്‍സി സര്‍വീസസ് (ടിസിഎസ്) 12,200 ഓളം ജീവനക്കാരെ പിരിച്ചുവിടാനൊരുങ്ങുന്നു. മൊത്തം ജീവനക്കാരില്‍ രണ്ടു ശതമാനം വരുമിത്. വിവിധ പ്രവര്‍ത്തനങ്ങള്‍ക്ക് ആര്‍ട്ടിഫിഷ്യല്‍ ഇന്റലിജന്‍സ് (എഐ അഥവാ നിര്‍മിത ബുദ്ധി) സാങ്കേതിക വിദ്യയെ ആശ്രയിക്കാന്‍ തുടങ്ങി എന്നതിന്റെ സൂചനയായാണ് ഇതു വിലയിരുത്തപ്പെടുന്നത്. 2026 സാമ്പത്തിക വര്‍ഷത്തിലായിരിക്കും നിലവിലെ ജീവനക്കാരില്‍ രണ്ടു ശതമാനം പേര്‍ക്ക് തൊഴില്‍ നഷ്ടമുണ്ടാവുക. മിഡില്‍, സീനിയര്‍ മാനേജ്‌മെന്റ് തലത്തിലുള്ള 12,200 പേര്‍ക്ക് ജോലി നഷ്ടമാകുമെന്നാണു സൂചന.


ടിസിഎസിന് ഏകദേശം 6,13,000 ജീവനക്കാരാണുള്ളത്. എഐയുടെ പ്രവര്‍ത്തന മണ്ഡലം വിപുലമാകുന്നതിനനുസരിച്ച് ആഗോള തലത്തില്‍ ഐടി കമ്പനികള്‍ ജീവനക്കാരെ കുറയ്ക്കുന്ന പ്രവണത നിലവിലുണ്ട്. കമ്പനിയുടെ സേവനങ്ങള്‍ തടസ്സപ്പെടാത്ത രീതിയിലായിരിക്കും തൊഴില്‍ പുനക്രമീകരണം നടപ്പിലാക്കുകയെന്നു ടിസിഎസ് പ്രസ്താവനയില്‍ വ്യക്തമാക്കി. ഐടി രംഗത്ത് ഭാവി സുനിശ്ചിതമാക്കുന്നതിനുള്ള നടപടികള്‍ സ്വീകരിച്ചുവരികയാണെന്നും കമ്പനി അധികൃതര്‍ പറഞ്ഞു.

നിര്‍മിത ബുദ്ധിയുടെ കടന്നു വരവാണു ജോലി വെട്ടിക്കുറയ്ക്കലിന് ഇടയാക്കിയതെന്ന വാര്‍ത്തകള്‍ ടിസിഎസ് അധികൃതര്‍ നിഷേധിച്ചു. ഐടി മേഖലയില്‍ പ്രവര്‍ത്തന രീതികള്‍ മാറിക്കൊണ്ടിരിക്കുകയാണെന്നും ഭാവിക്കായി സജ്ജമാകേണ്ടതുണ്ടെന്നും ടിസിഎസ് സിഇഒ കെ.കൃതിവാസന്‍ മാധ്യമങ്ങളോടു പറഞ്ഞു. നിര്‍മിതബുദ്ധിപോലുള്ള പുതിയ സാങ്കേതികവിദ്യകളെക്കുറിച്ചും പ്രവര്‍ത്തന രീതികളിലെ മാറ്റങ്ങളെക്കുറിച്ചും കമ്പനി ചര്‍ച്ച ചെയ്യുകയാണെന്നും അദ്ദേഹം കൂട്ടിച്ചേര്‍ത്തു. പുതിയ സാങ്കേതിക മേഖലകളില്‍ നിക്ഷേപം നടത്താനും പുതിയ വിപണികളില്‍ പ്രവേശിക്കാനും അടുത്ത തലമുറയിലേക്കായി അടിസ്ഥാന സൗകര്യങ്ങള്‍ വികസിപ്പിക്കാനുമാണ് കമ്പനിയുടെ ശ്രദ്ധയെന്നും അദ്ദേഹം വ്യക്തമാക്കി.

283 ബില്യന്‍ ഡോളറിന്റെ വരുമാനമാണ് ഇന്ത്യന്‍ ഐടി മേഖല പ്രതിവര്‍ഷമുണ്ടാക്കുന്നത്. ഇന്ത്യന്‍ ഐടി മേഖലയില്‍ ഏറ്റവും വലിയ തൊഴില്‍ദാതാക്കളാണ് ടാറ്റ കണ്‍സള്‍ട്ടന്‍സി സര്‍വീസസ്. ടാറ്റ ഗ്രൂപ്പിന് കീഴിലുള്ള ടിസിഎസിന്റെ ആസ്ഥാനം മുംബൈയാണ്.