കൊച്ചി: ലുലു ഗ്രൂപ്പ് ചെയര്‍മാന്‍ എം.എ യുസഫലിയുടെ സ്വപ്ന പദ്ധതികളിലൊന്നായ ഐ.ടി സമുച്ചയം മുഖ്യമന്ത്രി പിണറായി വിജയന്‍ നാടിന് സമര്‍പ്പിച്ചു. 1500 കോടി മുതല്‍ മുടക്കില്‍ പൂര്‍ത്തിയാക്കിയ ഇരട്ട ടവറുകളില്‍ 30,000 പേര്‍ക്കാണ് തൊഴിലവസരമൊരുങ്ങുന്നത്. ഇതില്‍ 2500 പേര്‍ക്ക് ഉടന്‍ തൊഴില്‍ ലഭ്യമാവും. ദക്ഷിണേന്ത്യയിലെ ഏറ്റവും വലിയ ഐടി സമുച്ചയം ഉദ്ഘാനം ചെയ്യുന്ന വേളയില്‍ 500 കോടി രൂപയുടെ മറ്റൊരു പുതിയ പദ്ധതി കൂടി ഇന്‍ഫോ പാര്‍ക്ക് ഫെയ്‌സ് 2ല്‍ ലുലു ഗ്രൂപ്പ് പ്രഖ്യാപിച്ചു. പുതിയ പദ്ധതിക്കും സംസ്ഥാന സര്‍ക്കാര്‍ പൂര്‍ണ പിന്തുണ നല്‍കുമെന്ന് മുഖ്യമന്ത്രി പിണറായി വിജയന്‍ വ്യക്തമാക്കി. ഭൂമി ഏറ്റെടുക്കല്‍ ഉള്‍പ്പെടെയുള്ള നടപടികളില്‍ സര്‍ക്കാരിന്റെ ഭാഗത്തുനിന്നുള്ള പ്രവര്‍ത്തനങ്ങള്‍ വേഗത്തിലാക്കുമെന്നും ട്വിന്‍ ടവറിന്റെ ഉദ്ഘാടനം നിര്‍വഹിച്ചുകൊണ്ട് മുഖ്യമന്ത്രി പറഞ്ഞു.

12.74 ഏക്കറില്‍ 35 ലക്ഷം ചതുരശ്ര അടിയില്‍, പഞ്ചനക്ഷത്ര ഹോട്ടലുകള്‍ക്കു സമാനമായ സൗകര്യത്തിലാണ് 30 നില വീതമുള്ള ലുലുവിന്റെ ഇരട്ട ഐടി ടവറുകള്‍ നിര്‍മിച്ചിരിക്കുന്നത്. 25 ലക്ഷം ചതുരശ്ര അടി ഏരിയയിലാണ് വിവിധ ഐടി, ഐടി അനുബന്ധ സംരംഭങ്ങള്‍ ആരംഭിക്കുക. റോബോര്‍ട്ടിങ് പാര്‍ക്കിങ് അടക്കം മൂന്ന് നിലകളിലായി ഒരേ സമയം 4,500 കാറുകള്‍ക്കുള്ള പാര്‍ക്കിങ്ങും നൂറു ശതമാനം പവര്‍ ബാക്ക് അപ്പ്, 12 ഹൈസ്പീഡ് എസ്‌കലറേറ്ററുകള്‍, 600 പേര്‍ക്ക് ഇരിക്കാന്‍ കഴിയുന്ന അത്യാധുനിക കോണ്‍ഫറന്‍സ് ഹാള്‍, 2500 പേര്‍ക്ക് ഒരേ സമയം ഭക്ഷണം കഴിക്കാന്‍ കഴിയുന്ന ഫുഡ്‌കോര്‍ട്ട് സൗകര്യവും വിശാലമായ ഫുഡ്‌കോര്‍ട്ടും അടക്കം ഒട്ടേറെ അനുബന്ധ സൗകര്യങ്ങളും ഇതോടൊപ്പമുണ്ട്.

ഉദ്ഘാടന ചടങ്ങില്‍ പ്രതിപക്ഷ നേതാവ് വി.ഡി. സതീശന്‍ അധ്യക്ഷത വഹിച്ചു. മന്ത്രിമാരായ പി. രാജീവ്, ജി.ആര്‍. അനില്‍, ഹൈബി ഈഡന്‍ എംപി, പ്രതിപക്ഷ ഉപനേതാവ് പി.കെ. കുഞ്ഞാലിക്കുട്ടി, എം.എ യൂസഫലി, ബിജപി സംസ്ഥാന പ്രസിഡന്റ് രാജീവ് ചന്ദ്രശേഖര്‍, ഉമ തോമസ് എംഎല്‍എ, തൃക്കാക്കര മുന്‍സിപ്പാലിറ്റി ചെയര്‍പേഴ്‌സണ്‍ രാധാമണി പിള്ള, കൗണ്‍സിലര്‍ അബ്ദു ഷാന തുടങ്ങിയവര്‍ ചടങ്ങില്‍ പങ്കെടുത്തു.