തിരുവനന്തപുരം: മലയാള സിനിമയെ രാജ്യാന്തര തലത്തിലേക്കുയര്ത്തിയ പ്രതിഭകളിലൊരാളായ പത്മശ്രീ ഷാജി എന്. കരുണ് (73) അന്തരിച്ചു. വൈകിട്ട് അഞ്ചു മണിയോടെ വഴുതക്കാട്ടെ വസതിയായ പിറവിയിലായിരുന്നു അന്ത്യം. അര്ബുദബാധിതനായി ചികില്സയിലായിരുന്നു. സംവിധായകന്, ഛായാഗ്രാഹകന് എന്ന നിലകളില് ഏറെ ശ്രദ്ധേയനായ ഷാജി എന്. കരുണിന് കാനില് അടക്കം പുരസ്കാരങ്ങള് ലഭിച്ചിട്ടുണ്ട്. 2011 ല് രാജ്യം പത്മശ്രീ നല്കി ആദരിച്ചു. മലയാള ചലച്ചിത്ര മേഖലയിലെ ആയുഷ്കാല സംഭാവനയ്ക്കുള്ള 2023 ലെ ജെ.സി.ഡാനിയേല് പുരസ്കാരവും ഇദ്ദേഹത്തിനു ലഭിച്ചിട്ടുണ്ട്.
എന്. കരുണാകരന്റെയും ചന്ദ്രമതിയുടെയും മകനായി 1952 ല് കൊല്ലം കണ്ടംചിറയിലാണ് ഷാജി ജനിച്ചത്. പള്ളിക്കര സ്കൂള്, തിരുവനന്തപുരം മാര് ഇവാനിയോസ്, യൂണിവേഴ്സിറ്റി കോളേജുകള് എന്നിവിടങ്ങളിലെ വിദ്യാഭ്യാസത്തിനു ശേഷം പൂനെ ഫിലിം ഇന്സ്റ്റിറ്റ്യൂട്ടില്നിന്നു സിനിമാട്ടോഗ്രഫിയില് ഡിപ്ലോമ നേടി. കേരള സ്റ്റേറ്റ് ഫിലിം ഡവലപ്മെന്റ് കോര്പറേഷന്റെ ഫിലിം ഓഫിസറായി ജോലി ചെയ്തിരുന്നു. ഭാര്യ: അനസൂയ വാര്യര്. മക്കള് അനില് (ഐസര്, തിരുവനന്തപുരം ) അപ്പു (ജര്മ്മനി). മരുമക്കള്: ഡോ.നീലിമ (സൈക്കോളിജിസ്റ്റ് ഐസര് ), ശീതള് (സൈബര് സ്പെഷ്യലിസ്റ്റ്, ജര്മ്മനി)
ഏഴു തവണ വീതം ദേശീയ. സംസ്ഥാന പുരസ്കാരങ്ങള് നേടിയിട്ടുണ്ട്. കലാ സാംസ്കാരിക സംഭാവനകള്ക്കുള്ള ഫ്രഞ്ച് സര്ക്കാരിന്റെ 'ദി ഓര്ഡര് ഓഫ് ആര്ട്സ് ആന്ഡ് ലെറ്റേഴ്സ്' ബഹുമതിക്കും അര്ഹനായി. ചലച്ചിത്ര അക്കാദമിയുടെ പ്രഥമ ചെയര്മാനായ അദ്ദേഹം നിലവില് ചലച്ചിത്ര വികസന കോര്പറേഷന് ചെയര്മാനാണ്.
1989 ല് പിറവി എന്ന ചിത്രത്തിലൂടെയായിരുന്നു സംവിധായകന് എന്ന നിലയില് ഷാജി എന്. കരുണിന്റെ അരങ്ങേറ്റം. 'പിറവി' എഴുപതോളം ചലച്ചിത്ര മേളകളില് പ്രദര്ശിപ്പിക്കുകയും 31 രാജ്യാന്തര പുരസ്കാരങ്ങള് നേടുകയും ചെയ്തു. കാന് ഫിലിം ഫിലിം ഫെസ്റ്റിവലില് ഗോള്ഡന് ക്യാമറ പ്രത്യേക പരാമര്ശം നേടി. രണ്ടാമത്തെ ചിത്രമായ സ്വം കാനില് മല്സര വിഭാഗത്തിലേക്കു തിരഞ്ഞെടുക്കപ്പെട്ടു. വാനപ്രസ്ഥം കാനിലെ ഔദ്യോഗിക വിഭാഗത്തില് പ്രദര്ശിപ്പിച്ചു. നിഷാദ്, കുട്ടിസ്രാങ്ക്, സ്വപാനം, ഓള് എന്നിവയാണ് മറ്റു ചിത്രങ്ങള്. പതിനാലോളം ഹ്രസ്വചിത്രങ്ങളും സംവിധാനം ചെയ്തു. അരവിന്ദന്റെ കാഞ്ചനസീത, തമ്പ്, കുമ്മാട്ടി, എസ്തപ്പാന്, പോക്കുവെയില്, ചിദംബരം, ഒരിടത്ത്, മാറാട്ടം തുടങ്ങിയ ചിത്രങ്ങളുടെയും കെ.ജി.ജോര്ജിന്റെ പഞ്ചവടിപ്പാലം, ലേഖയുടെ മരണം ഒരു ഫ്ളാഷ് ബാക്ക്, ലെനിന് രാജേന്ദ്രന്റെ മീനമാസത്തിലെ സൂര്യന്, ഹരിഹരന്റെ പഞ്ചാഗ്നി, നഖക്ഷതങ്ങള്, സര്ഗം, എം.ടിയുടെ മഞ്ഞ് തുടങ്ങി 40 ഓളം സിനിമകളുടെ ഛായാഗ്രഹണം നിര്വഹിച്ചിട്ടുണ്ട്.
Related News
