റിയാദ്: സൗദി കരാര്‍ അതോറിറ്റിയുടെ (Saudi Contractors Authority) നിലവില്‍ വന്ന ശേഷം സൗദി വിപണിയിലേക്ക് 1,648 വിദേശ കണ്‍ട്രാക്റ്റിങ് കമ്പനികകള്‍ കടന്നു വന്നതായി കണക്കൂകള്‍ സൂചിപ്പിക്കുന്നു. അതോറിറ്റിയില്‍ രജിസ്റ്റര്‍ ചെയ്തിട്ടുള്ള മൊത്തം ആഭ്യന്തര, വിദേശ കമ്പനികളുടെ എണ്ണം 1,40,000 ആണ്. സൗദിയുടെ മൊത്ത ആഭ്യന്തര ഉല്‍പ്പാദനത്തിലേക്ക് ഏകദേശം 8 ശതമാനം സംഭാവന നല്‍കുന്ന കണ്‍ട്രാക്റ്റിങ് മേഖല, രാജ്യത്തെ ഏറ്റവും വലിയ സാമ്പത്തിക മേഖലകളില്‍ ഒന്നാണ്. അടുത്ത മൂന്ന് വര്‍ഷത്തിനുള്ളില്‍ ഈ മേഖലയിലെ പദ്ധതികളുടെ മൂല്യം 3 ലക്ഷം കോടി സൗദി റിയാല്‍ (ഏകദേശം 800 ബില്യണ്‍ ഡോളര്‍) ആകുമെന്ന് സൗദി കോണ്‍ട്രാക്ടേഴ്‌സ് അതോറിറ്റി ചെയര്‍മാന്‍ മുഹമ്മദ് അല്‍-അജ്ലാന്‍ പറഞ്ഞു. രാജ്യത്തിന്റെ അന്താരാഷ്ട്ര സ്വാധീന വര്‍ദ്ധനവും വിദേശ കമ്പനികളുടെ വലിയ തോതിലുള്ള പങ്കാളിത്തവും സൗദിയെ കരാറുകളുടെയും പദ്ധതികളുടെയും പ്രധാന കേന്ദ്രമാക്കി മാറ്റിയതായി അദ്ദേഹം ചൂണ്ടിക്കാട്ടി.

: വിഷന്‍ 2030, എക്‌സ്‌പോ 2030, ലോകകപ്പ് തുടങ്ങിയ പദ്ധതികളുടെ പശ്ചാത്തലത്തില്‍ അടുത്ത 10 വര്‍ഷക്കാലം സൗദി കണ്‍ട്രാക്റ്റിങ് മേഖല അതീവ സജീവമായി തുടരുമെന്നാണ് പ്രതീക്ഷിക്കുന്നത്. കരാര്‍ ബന്ധങ്ങള്‍ നിയന്ത്രിക്കുന്നതിനും തര്‍ക്കങ്ങള്‍ ഒഴിവാക്കുന്നതിനുമായി സ്വകാര്യ മേഖലയില്‍ സ്റ്റാന്‍ഡേര്‍ഡ് കരാറുകള്‍ നിര്‍ബന്ധമാക്കാനുള്ള ഒരുക്കത്തിലാണ് അതോറിറ്റി.

കഴിഞ്ഞ വര്‍ഷത്തെ കണക്കുകള്‍ പ്രകാരം സൗദിയിലെ കണ്‍ട്രാക്റ്റിങ് മേഖലയില്‍ ജോലി ചെയ്യുന്ന സ്വദേശികളുടെ (സ്ത്രീകളും പുരുഷന്മാരും അടക്കം) എണ്ണം 5,82,000 ആയി ഉയര്‍ന്നു. ഇതില്‍ ഏകദേശം 31,700 എന്‍ജിനീയര്‍മാര്‍ ഉള്‍പ്പെടുന്നുവെന്ന് സൗദി കോണ്‍ട്രാക്ടേഴ്‌സ് അതോറിറ്റിയുടെ റിപ്പോര്‍ട്ട് വ്യക്തമാക്കുന്നു.

അഡ്മിനിസ്‌ട്രേറ്റീവ്, ലോജിസ്റ്റിക് മേഖലയില്‍ 3,28,000 പേരും സാങ്കേതിക ജോലികളില്‍ 1,49,000 പേരും തൊഴിലാളികളായി 38,700, എന്‍ജിനീയര്‍മാരായി 31,700 പേരും മറ്റു വിഭാഗങ്ങൡലായി 34,000 ലേറെ പേരും ജോലി ചെയ്യുന്നുണ്ട്.