തിരുവനന്തപുരം: സംസ്ഥാനത്ത് അതിശക്തമായ മഴ തുടരുന്ന സാഹചര്യത്തില്‍ വിവിധ ജില്ലകളില്‍ റെഡ്, ഓറഞ്ച് അലര്‍ട്ടുകള്‍ പ്രഖ്യാപിച്ചു. മഴ ശക്തമായതിനെ തുടര്‍ന്ന് പത്ത് ജില്ലകളിലെ വിദ്യാഭ്യാസ സ്ഥാപനങ്ങള്‍ക്ക് ഇന്ന് (ബുധനാഴ്ച, ഓഗസ്റ്റ് 5) അവധി പ്രഖ്യാപിച്ചിട്ടുണ്ട്. ഇതിനിടയില്‍ ആറന്മുളയിലെ രക്ഷാപ്രവര്‍ത്തനത്തിന് ശേഷം മടങ്ങുകയായിരുന്ന അബിന്‍ വര്‍ക്കി എംഎല്‍എയുടെ കാര്‍ അപകടത്തില്‍പ്പെട്ട് എംഎല്‍എയെ പത്തനംതിട്ടയിലെ സ്വകാര്യ ആശുപത്രിയില്‍ പ്രവേശിപ്പിച്ചു.
രാവിലെ 7 മണിക്ക് പുറപ്പെടുവിച്ച നിര്‍ദേശപ്രകാരം ആലപ്പുഴ, കോട്ടയം ജില്ലകളില്‍ അടുത്ത 3 മണിക്കൂറില്‍ റെഡ് അലര്‍ട്ട് പ്രഖ്യാപിച്ചിട്ടുണ്ട്. ഒറ്റപ്പെട്ടയിടങ്ങളില്‍ ശക്തമായ മഴയ്ക്കും മണിക്കൂറില്‍ 40 കിലോമീറ്റര്‍ വരെ വേഗത്തില്‍ കാറ്റിനും സാധ്യതയുണ്ട്.
കോഴിക്കോട്, എറണാകുളം, തൃശൂര്‍, കണ്ണൂര്‍, കോട്ടയം, പത്തനംതിട്ട, കാസര്‍കോട്, ആലപ്പുഴ, ഇടുക്കി, വയനാട് എന്നീ 10 ജില്ലകളിലെ വിദ്യാഭ്യാസ സ്ഥാപനങ്ങള്‍ക്കാണ് ഇന്ന് അവധി നല്‍കിയിരിക്കുന്നത്. കൂടാതെ, കേരള സര്‍വകലാശാല ബുധനാഴ്ച നടത്താന്‍ നിശ്ചയിച്ചിരുന്ന എല്ലാ പരീക്ഷകളും (തിയറി, പ്രാക്ടിക്കല്‍, വൈവവോസി ഉള്‍പ്പെടെ) മാറ്റിവെച്ചു. പുതുക്കിയ തീയതി പിന്നീട് അറിയിക്കും (സര്‍വകലാശാല പഠന വകുപ്പുകളിലെ പരീക്ഷകള്‍ക്ക് മാറ്റമില്ല).
പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം, കോഴിക്കോട്, വയനാട്, കണ്ണൂര്‍, കാസര്‍കോട് എന്നീ ഒമ്പത് ജില്ലകളില്‍ ഇന്ന് ഓറഞ്ച് അലര്‍ട്ടും; തിരുവനന്തപുരം, കൊല്ലം, തൃശൂര്‍, പാലക്കാട്, മലപ്പുറം ജില്ലകളില്‍ യെല്ലോ അലര്‍ട്ടും പ്രഖ്യാപിച്ചിട്ടുണ്ട്. മലയോര മേഖലകളില്‍ മണ്ണിടിച്ചിലിനും മലവെള്ളപ്പാച്ചിലിനും സാധ്യതയുള്ളതിനാല്‍ യാത്രകള്‍ ഒഴിവാക്കാനും, തീരദേശവാസികള്‍ ജാഗ്രത പാലിക്കാനും മുന്നറിയിപ്പ് നല്‍കിയിട്ടുണ്ട്. മണിക്കൂറില്‍ 50 കിലോമീറ്റര്‍ വരെ വേഗതയില്‍ കാറ്റ് വീശാനും കടലാക്രമണത്തിനും സാധ്യതയുണ്ട്.
അബിന്‍ വര്‍ക്കി എംഎല്‍എയുടെ കാര്‍ അപകടത്തില്‍പ്പെട്ടു
പത്തനംതിട്ടയില്‍ പുത്തന്‍പീടിക ഷട്ടര്‍മുക്കില്‍ ഇന്നലെ രാത്രി 11.45-ഓടെയാണ് അബിന്‍ വര്‍ക്കി എംഎല്‍എയുടെ കാര്‍ അപകടത്തില്‍പ്പെട്ടത്. എതിരെ വന്ന കാറുമായി എംഎല്‍എയുടെ കാര്‍ കൂട്ടിയിടിക്കുകയായിരുന്നു. ആറന്മുളയിലെ വെള്ളപ്പൊക്ക രക്ഷാപ്രവര്‍ത്തനങ്ങള്‍ക്ക് ശേഷം പത്തനംതിട്ടയിലെ ഓഫിസില്‍ നിന്നും പ്രക്കാനത്തെ വീട്ടിലേക്ക് മടങ്ങുമ്പോഴാണ് അപകടമുണ്ടായത്.
തലയിടിച്ച അബിന്‍ വര്‍ക്കിയെ സിടി സ്‌കാനിന് വിധേയനാക്കി. എംഎല്‍എയ്ക്കും ഡ്രൈവര്‍ വിഷ്ണു, ജെറിന്‍, അരുണ്‍ എന്നിവര്‍ക്കും, എതിരേ വന്ന കാര്‍ ഓടിച്ചിരുന്ന അതുമ്പുംകുളം സ്വദേശി സജിക്കും പരുക്കേറ്റിട്ടുണ്ട്. എല്ലാവരെയും പത്തനംതിട്ടയിലെ സ്വകാര്യ ആശുപത്രിയില്‍ പ്രവേശിപ്പിച്ചു.
നാശനഷ്ടങ്ങളും മന്ത്രിസഭാ യോഗവും
കനത്ത മഴയിലും വെള്ളപ്പൊക്കത്തിലും സംസ്ഥാനത്തുണ്ടായ നാശനഷ്ടങ്ങള്‍ ഇന്നത്തെ മന്ത്രിസഭാ യോഗം വിലയിരുത്തും. ദുരന്തബാധിത മേഖലകളില്‍ സ്വീകരിക്കേണ്ട മുന്‍കരുതല്‍ നടപടികള്‍ യോഗം ചര്‍ച്ച ചെയ്യും. ആറന്മുള, റാന്നി ഉള്‍പ്പെടെയുള്ള ദുരന്തബാധിത മേഖലകളെ സഹായിക്കാന്‍ പ്രത്യേക പാക്കേജ് പ്രഖ്യാപിച്ചേക്കും. കൃഷിനാശത്തിനുള്ള നഷ്ടപരിഹാരം വര്‍ദ്ധിപ്പിക്കുന്നതും അജണ്ടയിലുണ്ട്. ഇന്നലെ ദുരിതാബാധിത മേഖലകള്‍ സന്ദര്‍ശിച്ച മുഖ്യമന്ത്രി വി.ഡി. സതീശന്‍ സ്ഥിതിഗതികള്‍ നേരിട്ട് വിലയിരുത്തിയിരുന്നു.
