കൊച്ചി: ഡല്‍ഹി ജന്തര്‍മന്തറില്‍ നീറ്റ് പരീക്ഷാ ക്രമക്കേടുകള്‍ക്കെതിരെ സമരം ചെയ്ത വിദ്യാര്‍ഥികള്‍ക്കെതിരെ വധഭീഷണിയും അധിക്ഷേപകരമായ പരാമര്‍ശങ്ങളും നടത്തിയ ടി.ജി.മോഹന്‍ദാസിനെതിരെ ശക്തമായ പ്രതിഷേധം. പരാമര്‍ശം വിവാദമായതോടെ അദ്ദേഹത്തെ തള്ളി ആര്‍എസ്എസും രംഗത്തെത്തി. ഇതിനിടയില്‍, ടി.ജി.മോഹന്‍ദാസിന്റെ മാനസികാവസ്ഥ മൃഗങ്ങളെക്കാള്‍ കഷ്ടമാണെന്നും ഇയാളെ ജയിലിലടക്കണമെന്നും ആവശ്യപ്പെട്ട് നടന്‍ സുരേഷ് ഗോപിയുടെ മകന്‍ മാധവ് സുരേഷും രൂക്ഷ വിമര്‍ശനവുമായി എത്തിയിട്ടുണ്ട്.
ആര്‍എസ്എസ് നിലപാട് വ്യക്തമാക്കുന്നു
ടി.ജി.മോഹന്‍ദാസ് നടത്തിയത് തികച്ചും അപലപനീയവും വ്യക്തിപരവുമായ പരാമര്‍ശങ്ങളാണെന്ന് ആര്‍എസ്എസ് ദക്ഷിണ കേരളം പ്രാന്ത സഹകാര്യവാഹ് കെ.ബി.ശ്രീകുമാര്‍ പ്രസ്താവനയിലൂടെ വ്യക്തമാക്കി. 'അടുത്തിടെ നടന്ന സമരങ്ങളെക്കുറിച്ച് ടി.ജി.മോഹന്‍ദാസ് നടത്തിയ അഭിപ്രായപ്രകടനങ്ങള്‍ അങ്ങേയറ്റം അപലപനീയമാണ്. അത് അദ്ദേഹത്തിന്റെ വ്യക്തിപരമായ അഭിപ്രായങ്ങളാണ്. ആ അഭിപ്രായങ്ങളോടും അത്തരം കാഴ്ചപ്പാടുകളോടും ആര്‍എസ്എസ് ഒരു തരത്തിലും യോജിക്കുന്നില്ല. ടി.ജി.മോഹന്‍ദാസ് ആര്‍എസ്എസിന്റെ ഒരു തരത്തിലുള്ള ചുമതലയും വഹിക്കുന്നില്ല.' - കെ.ബി.ശ്രീകുമാര്‍ പറഞ്ഞു.
മാധവ് സുരേഷിന്റെ രൂക്ഷ വിമര്‍ശനം
വിദ്യാര്‍ത്ഥികള്‍ക്കെതിരെയുള്ള ടി.ജി.മോഹന്‍ദാസിന്റെ കൊലവിളി പ്രസംഗം പങ്കുവെച്ചുകൊണ്ട് മാധവ് സുരേഷ് സോഷ്യല്‍ മീഡിയയിലൂടെയാണ് തന്റെ പ്രതിഷേധം അറിയിച്ചത്. ഇത്തരത്തിലുള്ള വികൃത മനോഭാവത്തിന് ഉടമയായ ഇയാളെ അഴിയെണ്ണിക്കണമെന്നും അദ്ദേഹം ആവശ്യപ്പെട്ടു. 'ഇത്തരമൊരു വികൃത മനോഭാവത്തിന് ഉടമയായ ഇയാളെ അഴിയെണ്ണിക്കണം. ഈ ആര്‍എസ്എസ് ബുദ്ധിജീവിയേക്കാള്‍ എത്രയോ ഉന്നതമായ സംസ്‌കാരവും വിവേകവുമാണ് മൃഗങ്ങള്‍ പോലും പുലര്‍ത്തുന്നത്.' - മാധവ് സുരേഷ് പറഞ്ഞു. സിജെപി നിലപാടുകളെയും മാധവ് സുരേഷ് അതിരൂക്ഷമായി വിമര്‍ശിച്ചിരുന്നു.
വിവാദമായ ടി.ജി.മോഹന്‍ദാസിന്റെ പരാമര്‍ശങ്ങള്‍
സി.ജെ.പിയുടെ നേതൃത്വത്തില്‍ ജന്തര്‍ മന്തറില്‍ സംഘടിപ്പിച്ച സമരത്തില്‍ പങ്കെടുത്ത 'ജെന്‍ സി' പ്രക്ഷോഭകരെ അധിക്ഷേപിച്ച് ഒരു യൂട്യൂബ് ചാനലിലൂടെയായിരുന്നു ടി.ജി.മോഹന്‍ദാസിന്റെ വിവാദ പ്രതികരണം. 'എനിക്ക് ഈ സിറ്റുവേഷന്‍ കയ്യില്‍ കിട്ടിയാല്‍ ജന്തര്‍ മന്തര്‍ പരിസരത്ത് കര്‍ഫ്യൂ പ്രഖ്യാപിക്കും. ആളുകളോട് പിരിഞ്ഞുപോകാന്‍ മൂന്ന് തവണ ആവശ്യപ്പെടും. പിന്നെ വെടിവെക്കും. കുറേപ്പേര്‍ മരിക്കും, കുറേപ്പേര്‍ക്ക് അംഗഭംഗം സംഭവിക്കും. നാല് മണിക്കൂര്‍ കൊണ്ട് രംഗം ശാന്തമാകും. ശവങ്ങള്‍ പെറുക്കി ആശുപത്രിയിലെത്തിക്കും.' വിദ്യാര്‍ത്ഥിനികളെ അധിക്ഷേപിച്ചുകൊണ്ടുള്ള ബലാല്‍സംഗം പോലുള്ള മറ്റ് ചില മോശം പരാമര്‍ശങ്ങളും ഇയാള്‍ നടത്തിയിരുന്നു.
അവകാശങ്ങള്‍ക്കായി ജനാധിപത്യപരമായി തെരുവിലിറങ്ങിയ വിദ്യാര്‍ഥികള്‍ക്ക് നേരെ അക്രമത്തിനും കൊലവിളിക്കും ആഹ്വാനം ചെയ്ത സംഭവത്തില്‍ യുവജന സംഘടനകള്‍ നല്‍കിയ പരാതിയുടെ അടിസ്ഥാനത്തില്‍ സൈബര്‍ സെല്‍ അന്വേഷണം ആരംഭിച്ചിട്ടുണ്ട്.
Related News
