റിയാദ്: സൗദി അറേബ്യയുടെ പബ്ലിക് ഇന്‍വെസ്റ്റ്‌മെന്റ് ഫണ്ടും (PIF) ലോകബാങ്ക് ഗ്രൂപ്പിന്റെ രണ്ട് സ്ഥാപനങ്ങളും തമ്മില്‍ 950 കോടി ഡോളര്‍ (ഏകദേശം $9.5 ബില്യണ്‍) വരെയുള്ള നിക്ഷേപ കരാറുകളില്‍ ഒപ്പുവെച്ചു. രാജ്യത്തും വളര്‍ന്നുവരുന്ന വിപണികളിലും നിക്ഷേപം വര്‍ദ്ധിപ്പിക്കുക, സാമ്പത്തിക വികസനം പിന്തുണയ്ക്കുക, തൊഴിലവസരങ്ങള്‍ സൃഷ്ടിക്കുക എന്നിവയാണ് കരാറുകളുടെ ലക്ഷ്യം.

അന്താരാഷ്ട്ര ധകാര്യ കോര്‍പ്പറേഷനുമായി (IFC) ഉണ്ടാക്കിയ 600 കോടി ഡോളറിന്റെ കരാര്‍; അടിസ്ഥാന സൗകര്യങ്ങള്‍, ഊര്‍ജ്ജം, ഗതാഗതം, ടൂറിസം, ആരോഗ്യം തുടങ്ങിയ മേഖലകളിലെ പദ്ധതികളില്‍ സഹകരിച്ച് നിക്ഷേപം നടത്തുന്നതിനുള്ള അവസരങ്ങള്‍ പരിശോധിക്കും. കൂടാതെ അറിവുകള്‍ പങ്കുവെക്കുന്നതിനും സ്വകാര്യ നിക്ഷേപങ്ങളെ പ്രോത്സാഹിപ്പിക്കുന്നതിനും ഈ കരാര്‍ സഹായിക്കും.

മള്‍ട്ടിലാറ്ററല്‍ ഇന്‍വെസ്റ്റ്‌മെന്റ് ഗ്യാരണ്ടി ഏജന്‍സിയുമായി (MIGA) ഒപ്പുവെച്ച 350 കോടി ഡോളറിന്റെ മറ്റൊരു കരാര്‍; സൗദി അറേബ്യയിലും മറ്റ് പ്രാദേശിക വിപണികളിലും പ്രവര്‍ത്തിക്കുന്ന പിഐഎഫ് പോര്‍ട്ട്‌ഫോളിയോ കമ്പനികള്‍ക്ക് ധനസഹായം ഉറപ്പാക്കുന്നതിനായി ക്രെഡിറ്റ് ഗ്യാരണ്ടികള്‍ നല്‍കുന്നത് പരിശോധിക്കും. കാര്‍ബണ്‍ ബഹിര്‍ഗമനം കുറയ്ക്കല്‍ (ഡീകാര്‍ബണൈസേഷന്‍), നൂതന വ്യവസായങ്ങളുടെ വികസനം, തൊഴിലവസരങ്ങള്‍ സൃഷ്ടിക്കല്‍ തുടങ്ങിയ മേഖലകളില്‍ ഈ സഹകരണം ശ്രദ്ധ കേന്ദ്രീകരിക്കും.

സൗദി അറേബ്യയുടെ സാമ്പത്തിക വൈവിധ്യവല്‍ക്കരണത്തെ പിന്തുണയ്ക്കുന്നതിനും തന്ത്രപ്രധാനമായ മേഖലകളിലേക്ക് സ്വകാര്യ നിക്ഷേപം ആകര്‍ഷിക്കുന്നതിനുമാണ് ഈ പങ്കാളിത്തങ്ങള്‍ ലക്ഷ്യമിടുന്നതെന്ന് പിഐഎഫ് വ്യക്തമാക്കി. ലോകത്തിലെ ഏറ്റവും വലിയ സോവറൈന്‍ വെല്‍ത്ത് ഫണ്ടുകളില്‍ ഒന്നായ പിഐഎഫ്, വിഷന്‍ 2030-ന്റെ പ്രമുഖ പദ്ധതികള്‍ക്ക് ധനസഹായം നല്‍കുന്നതിലും വികസിപ്പിക്കുന്നതിലും നിര്‍ണായക പങ്ക് വഹിക്കുന്നുണ്ട്.

സൗദി അറേബ്യയിലും വിദേശത്തുമുള്ള തങ്ങളുടെ പോര്‍ട്ട്‌ഫോളിയോ കമ്പനികള്‍ക്ക് നിക്ഷേപ അവസരങ്ങള്‍ പിന്തുണയ്ക്കുന്നതിനായി അന്താരാഷ്ട്ര ധനകാര്യ സ്ഥാപനങ്ങളുമായുള്ള പങ്കാളിത്തം വ്യാപിപ്പിക്കുന്ന തന്ത്രത്തിന്റെ ഭാഗമാണ് ഈ കരാറുകളെന്ന് പിഐഎഫിന്റെ ഗ്ലോബല്‍ ക്യാപിറ്റല്‍ ഫിനാന്‍സ് ഡിവിഷന്‍ ഫിനാന്‍ഷ്യല്‍ ഇന്‍സ്റ്റിറ്റിയൂഷന്‍സ് ആന്‍ഡ് ഇന്‍വെസ്റ്റര്‍ റിലേഷന്‍സ് മേധാവി റസീല്‍ അല്‍ സൗദ് പറഞ്ഞു.

സ്വകാര്യ മൂലധനം സമാഹരിക്കാനും, അതിര്‍ത്തി കടന്നുള്ള നിക്ഷേപങ്ങള്‍ ശക്തിപ്പെടുത്താനും, ഊര്‍ജ്ജം-ഭക്ഷണം-ജലം എന്നീ മേഖലകളെ ഉത്തേജിപ്പിക്കുന്നതിനും സ്വകാര്യ മേഖലയില്‍ തൊഴിലവസരങ്ങള്‍ സൃഷ്ടിക്കുന്നതിനും അറിവുകള്‍ കൈമാറാനും ഈ പങ്കാളിത്തം സഹായിക്കുമെന്ന് ഐഎഫ്‌സി വൈസ് പ്രസിഡന്റും ചീഫ് ഫിനാന്‍ഷ്യല്‍ ഓഫീസറുമായ ജോണ്‍ ഗാന്‍ഡോള്‍ഫോ വ്യക്തമാക്കി.

പരിവര്‍ത്തനാത്മകമായ പദ്ധതികള്‍ക്ക് നേതൃത്വം നല്‍കുന്നതും തൊഴിലവസരങ്ങള്‍ സൃഷ്ടിക്കുന്നതുമായ അന്താരാഷ്ട്ര നിക്ഷേപങ്ങളെ ആകര്‍ഷിച്ചുകൊണ്ട് വിഷന്‍ 2030 സാമ്പത്തിക വൈവിധ്യവല്‍ക്കരണ തന്ത്രത്തെ ഈ കരാര്‍ പിന്തുണയ്ക്കുമെന്ന് മിഗയുടെ (MIGA) ഓപ്പറേഷന്‍സ് വൈസ് പ്രസിഡന്റ് ജുനൈദ് കമല്‍ അഹ്‌മദ് പറഞ്ഞു.