റിയാദ്: സൗദി അറേബ്യയില്‍ പൊതുവിദ്യാഭ്യാസ മേഖലയുടെ ഭരണസംവിധാനം ശക്തിപ്പെടുത്തുന്നതിനും, വിദ്യാഭ്യാസ നിലവാരം ഉയര്‍ത്തുന്നതിനുമായി രാജകല്‍പ്പനയിലൂടെ പുതിയ 'പൊതുവിദ്യാഭ്യാസ നിയമം' അംഗീകരിച്ചു. രാജ്യത്തിന്റെ വിഷന്‍ 2030 ലക്ഷ്യങ്ങള്‍ക്ക് അനുസൃതമായാണ് പുതിയ നിയമം രൂപീകരിച്ചിരിക്കുന്നത്. വിദ്യാഭ്യാസ മേഖലയെ കൂടുതല്‍ ഉന്നതതലത്തിലേക്ക് എത്തിക്കുന്നതിനും അതിന്റെ പ്രവര്‍ത്തനക്ഷമത വര്‍ദ്ധിപ്പിക്കുന്നതിനും സഹായിക്കുന്ന ചരിത്രപരമായ ചുവടുവെയ്പ്പാണിതെന്ന് വിദ്യാഭ്യാസ മന്ത്രി യൂസഫ് അല്‍-ബിന്യാന്‍ വ്യക്തമാക്കി. തിരുഗേഹങ്ങളുടെ സേവകന്‍ സല്‍മാന്‍ രാജാവിനും കിരീടാവകാശിയും പ്രധാനമന്ത്രിയുമായ അമീര്‍ മുഹമ്മദ് ബിന്‍ സല്‍മാനും അദ്ദേഹം നന്ദി അറിയിച്ചു.
വിദ്യാഭ്യാസ മന്ത്രാലയം, ജനറല്‍ എജ്യുക്കേഷന്‍ അഫയേഴ്സ് കൗണ്‍സില്‍ എന്നിവയുടെ ചുമതലകളും ഉത്തരവാദിത്തങ്ങളും നിയമം വ്യക്തമാക്കുന്നു. ഇത് നയപരമായ ഏകോപനവും തീരുമാനമെടുക്കലും കൂടുതല്‍ സുഗമമാക്കും.
സ്വകാര്യ-ലാഭേതര മേഖലകളുടെ പങ്കാളിത്തം: വിദ്യാഭ്യാസ രംഗത്ത് നിക്ഷേപം പ്രോത്സാഹിപ്പിക്കുന്നതിനും, പങ്കാളിത്തം വ്യാപിപ്പിക്കുന്നതിനും, സേവനങ്ങളുടെ ഗുണനിലവാരം മെച്ചപ്പെടുത്തുന്നതിനുമുള്ള നിയന്ത്രണ ചട്ടക്കൂടുകള്‍ നിയമത്തില്‍ ഉള്‍പ്പെടുത്തിയിട്ടുണ്ട്. വിദ്യാഭ്യാസം നേടാനുള്ള അവകാശം സംരക്ഷിക്കുന്നതിനൊപ്പം വിദ്യാര്‍ത്ഥികളുടെയും അധ്യാപകരുടെയും അവകാശങ്ങള്‍ ഉറപ്പാക്കുകയും സുരക്ഷിതവും അനുകൂലവുമായ പഠനാന്തരീക്ഷം ഒരുക്കുകയും ചെയ്യുന്നു. വിദ്യാര്‍ത്ഥികളുടെ വിദ്യാഭ്യാസ യാത്രയില്‍ കുടുംബങ്ങളുടെ പങ്കും നിയമം ഊന്നിപ്പറയുന്നു.
സമഗ്ര വിദ്യാഭ്യാസം: കുട്ടികളുടെ ആദ്യകാല ബാല്യകാല വിദ്യാഭ്യാസത്തിന് നിയമം പ്രത്യേക പ്രാധാന്യം നല്‍കുന്നു. ഭിന്നശേഷിക്കാരായ വിദ്യാര്‍ത്ഥികള്‍ക്കുള്ള പിന്തുണയും, പ്രതിഭകളായ കുട്ടികളെ കണ്ടെത്തി വളര്‍ത്തിയെടുക്കുന്നതിനുള്ള പ്രത്യേക പദ്ധതികളും ഇതില്‍ ഉള്‍പ്പെടുത്തിയിട്ടുണ്ട്.
വിദ്യാഭ്യാസ മന്ത്രാലയവും ബന്ധപ്പെട്ട മറ്റ് സര്‍ക്കാര്‍ വകുപ്പുകളും ചേര്‍ന്ന് പുതിയ നിയമം നടപ്പിലാക്കുന്നതിനുള്ള അന്തിമ ചട്ടങ്ങള്‍ക്ക് രൂപം നല്‍കിവരികയാണെന്ന് അധികൃതര്‍ അറിയിച്ചു. വിദ്യാഭ്യാസ ഘട്ടങ്ങള്‍, ജനറല്‍ എജ്യുക്കേഷന്‍ അഫയേഴ്സ് കൗണ്‍സില്‍, വിദ്യാഭ്യാസ സ്ഥാപനങ്ങള്‍, അക്കാദമിക് പാതകള്‍, ഇ-ലേണിംഗ്, തുടര്‍ വിദ്യാഭ്യാസം, പഠനാന്തരീക്ഷം, വിദ്യാര്‍ത്ഥികളുടെയും അധ്യാപകരുടെയും അവകാശങ്ങളും ഉത്തരവാദിത്തങ്ങളും തുടങ്ങിയ വിവിധ കാര്യങ്ങള്‍ പുതിയ നിയമത്തിന്റെ പരിധിയില്‍ വരുന്നു.
Related News
