കോട്ടയം: അയര്‍ക്കുന്നം മറ്റപ്പള്ളിയില്‍ സാമ്പത്തിക പ്രതിസന്ധിയെത്തുടര്‍ന്ന് കുടുംബം കൂട്ട ആത്മഹത്യയ്ക്ക് ശ്രമിച്ച സംഭവത്തില്‍ അമ്മയും മകളും മരിച്ചു. ചിറപ്പുറത്ത് ജോബിയുടെ ഭാര്യ ജോസ്ന (40), മൂത്തമകള്‍ മരിയ തെരേസ തോമസ് (16) എന്നിവരാണ് മരിച്ചത്. ഗുരുതരാവസ്ഥയിലായിരുന്ന ജോസ്ന ഇന്നലെ വൈകിട്ടാണ് മരണത്തിന് കീഴടങ്ങിയത്. മരിയ തെരേസ ഇന്നലെ പുലര്‍ച്ചെ 5.30-ഓടെ മരണപ്പെട്ടിരുന്നു.

കുടുംബത്തിന്റെ കൂട്ട ആത്മഹത്യാശ്രമത്തിന് പിന്നില്‍ രൂക്ഷമായ സാമ്പത്തിക പ്രതിസന്ധികളാണെന്നാണ് പ്രാഥമിക നിഗമനം. കഴിഞ്ഞ ദിവസം വൈകിട്ടാണ് ജോബിയും (50), ഭാര്യ ജോസ്നയും, രണ്ട് മക്കളും അടങ്ങുന്ന കുടുംബത്തെ വീട്ടില്‍ വിഷം കഴിച്ച നിലയില്‍ കണ്ടെത്തിയത്.

തിങ്കളാഴ്ച ഉച്ചമുതല്‍ ജോസ്നയുടെ സഹോദരന്‍ പലതവണ ഫോണില്‍ ബന്ധപ്പെടാന്‍ ശ്രമിച്ചെങ്കിലും മറുപടിയുണ്ടായിരുന്നില്ല. സംശയം തോന്നി വൈകിട്ട് മറ്റപ്പള്ളിയിലെ വീട്ടിലെത്തിയപ്പോള്‍ വീട് പൂട്ടിയ നിലയില്‍ കണ്ടെത്തി. തുടര്‍ന്ന് നാട്ടുകാരുടെ സഹായത്തോടെ പിന്‍വാതില്‍ ചവിട്ടിത്തുറന്നപ്പോഴാണ് നാലുപേരെയും അവശനിലയില്‍ കണ്ടെത്തിയത്. ഇവരുടെ സമീപത്തുനിന്ന് കളനാശിനിയുടെ കുപ്പിയും കണ്ടെടുത്തു.

ഉടന്‍ തന്നെ മൂന്നുപേരെ കോട്ടയം മെഡിക്കല്‍ കോളജിലും മകനെ കുട്ടികളുടെ ആശുപത്രിയിലും പ്രവേശിപ്പിച്ചു. ചികിത്സയിലിരിക്കെയാണ് മരിയ തെരേസയും ജോസ്നയും മരണപ്പെട്ടത്. ജോബിയുടെ നില ഇപ്പോഴും അതീവ ഗുരുതരമായി തുടരുകയാണ്. ഇളയ മകന്‍ ചികിത്സയില്‍ കഴിയുന്നു. മരിയ തെരേസയുടെ പോസ്റ്റ്മോര്‍ട്ടം നടപടികള്‍ പൂര്‍ത്തിയായി. ജോസ്നയുടെ മൃതദേഹം ഇന്ന് രാവിലെ പോസ്റ്റ്മോര്‍ട്ടം ചെയ്യും. തുടര്‍ന്ന് ഇരുവരുടെയും സംസ്‌കാരം നടക്കും. സംഭവത്തില്‍ അയര്‍ക്കുന്നം പോലീസ് അന്വേഷണം നടത്തിവരുന്നു.