തിരുവനന്തപുരം: വിയറ്റ്നാമിലുണ്ടായ ബോട്ട് അപകടത്തില്‍ മരിച്ച കൊല്ലം കൊട്ടാരക്കര സ്വദേശികളായ എ സി തോമസ് (57), ഭാര്യ ലൗനി തോമസ് (56) എന്നിവരുടെ മൃതദേഹങ്ങള്‍ നാളെ (ജൂലൈ 14) നാട്ടിലെത്തിക്കും. ഇന്ന് രാത്രി 09.30 നുള്ള വിമാനത്തില്‍ വിയറ്റ്‌നാമില്‍ നിന്നും മുംബൈയിലെത്തിക്കുന്ന മൃതദേഹങ്ങള്‍ നാളെ രാവിലെ 06.30 നു തിരിക്കുന്ന എയര്‍ ഇന്ത്യ AI 2605 വിമാനത്തില്‍ ഒന്‍പതു മണിയോടെ തിരുവനന്തപുരത്ത് എത്തിക്കും. തുടര്‍ന്ന് കൊട്ടാരക്കരയിലേക്കു റോഡ് മാര്‍ഗം കൊണ്ടുപോകും. മുംബൈ, തിരുവനന്തപുരം വിമാനത്താവളങ്ങളിലും തുടര്‍ന്ന് കൊട്ടാരക്കരയിലേക്ക് മൃതദേഹങ്ങള്‍ കൊണ്ടുപോകുന്നതിനുമുള്ള ക്രമീകരണം നോര്‍ക്ക റൂട്‌സ് ഏകോപിപ്പിക്കും.

വിയറ്റ്നാമിലെ ഫു കുവോക് ദ്വീപിന് സമീപം കഴിഞ്ഞ ശനിയാഴ്ച സ്പീഡ് ബോട്ട് മറിഞ്ഞാണഅ അപകടം. മലയാളി ദമ്പതികള്‍ ഉള്‍പ്പെടെ 15 ഇന്ത്യന്‍ വിനോദസഞ്ചാരികള്‍ അപകടത്തില്‍ മരിച്ചിരുന്നു. ഗ്രൂപ്പ് ടൂറിന്റെ ഭാഗമായി വിയറ്റ്നാമില്‍ അവധിക്കാലം ആഘോഷിക്കാനായി ജൂലൈ 7നാണ് ഇവര്‍ കേരളത്തില്‍ നിന്ന് പുറപ്പെട്ടത്. പെട്ടെന്നുണ്ടായ ശക്തമായ കാറ്റിലും പ്രക്ഷുബ്ധമായ കടലിലും പെട്ട് ബോട്ടിന്റെ നിയന്ത്രണം നഷ്ടപ്പെടുകയും, കരയില്‍ നിന്ന് വെറും 400 മീറ്റര്‍ അകലെ വെച്ച് ബോട്ട് മറിയുകയുമായിരുന്നു. കടല്‍ അതികഠിനമായി പ്രക്ഷുബ്ധമായിരുന്നതിനാലും മറിഞ്ഞ ബോട്ടിനടിയില്‍ നിരവധി യാത്രക്കാര്‍ കുടുങ്ങിപ്പോയതിനാലുമാണ് ഇത്രയും പേര്‍ മരിച്ചത്. 32 ഇന്ത്യന്‍ വിനോദസഞ്ചാരികളും നാല് ജീവനക്കാരുമടക്കം ആകെ 36 പേരാണ് ബോട്ടുണ്ടായിരുന്നതെന്ന് കണക്കാക്കുന്നു. രക്ഷാപ്രവര്‍ത്തകരും സമീപത്തെ വിനോദസഞ്ചാര ബോട്ടുകളും ചേര്‍ന്ന് 21 പേരെ പരിക്കുകളോടെ രക്ഷപ്പെടുത്തി.