ജിദ്ദ: കഴിഞ്ഞ ആറു മാസത്തിനിടെ സൗദി അറേബ്യയില്‍ 900 കിലോമീറ്ററിലേറെ പുതിയ റോഡുകള്‍ നിര്‍മിച്ച് പൊതുജനങ്ങള്‍ക്ക് തുറന്നുകൊടുത്തു. വിഷന്‍ 2030-ന്റെ ഭാഗമായി രാജ്യത്തെ ഗതാഗത സൗകര്യങ്ങള്‍ മെച്ചപ്പെടുത്തുന്നതിനും റോഡ് സുരക്ഷ വര്‍ധിപ്പിക്കുന്നതിനും സാമ്പത്തിക വളര്‍ച്ചയ്ക്ക് പിന്തുണയേകുന്നതിനുമായി ജനറല്‍ അതോറിറ്റി ഫോര്‍ റോഡ്‌സ് രാജ്യത്തുടനീളം ആവിഷ്‌കരിച്ച 40 പദ്ധതികളാണ് നടപ്പിലാക്കിയത്.

മക്ക, മദീന, അസീര്‍, കിഴക്കന്‍ പ്രവിശ്യ , ഖസീം എന്നിവിടങ്ങളിലാണ് പദ്ധതികള്‍ നടപ്പിലാക്കിയത്. നഗരങ്ങളും പ്രദേശങ്ങളും തമ്മിലുള്ള ബന്ധം ദൃഢമാക്കുന്നതിനും യാത്രാ സമയം കുറയ്ക്കുന്നതിനും വിനോദസഞ്ചാരം, ലോജിസ്റ്റിക്‌സ്, വാണിജ്യം എന്നിവയെ പിന്തുണയ്ക്കുന്നതിനുമായാണ് ഇവ രൂപകല്‍പ്പന ചെയ്തിട്ടുള്ളതെന്ന് അധികൃതര്‍ വ്യക്തമാക്കി

ഈ വര്‍ഷത്തെ ആദ്യ ആറുമാസത്തിനുള്ളില്‍ രാജ്യത്തെ ലോജിസ്റ്റിക് ഇടനാഴികളില്‍ 3.7 ദശലക്ഷത്തിലേറെ ട്രക്ക് സഞ്ചാരമുണ്ടായി. തുറമുഖങ്ങള്‍, അതിര്‍ത്തി കടലുകള്‍, സാമ്പത്തിക കേന്ദ്രങ്ങള്‍ എന്നിവ തമ്മിലുള്ള വ്യാപാരവും വിതരണ ശൃംഖലയും സുഗമമാക്കുന്നതില്‍ റോഡ് നെറ്റ്വര്‍ക്ക് വഹിക്കുന്ന പ്രധാന പങ്ക് ഇത് വ്യക്തമാക്കുന്നു. ദേശീയ റോഡ് നെറ്റ്വര്‍ക്കിലെ സേവനങ്ങള്‍ക്കായി അതോറിറ്റി 32,000-ത്തിലധികം പെര്‍മിറ്റുകള്‍ നല്‍കി.

റോഡ് പ്രവര്‍ത്തനങ്ങളും പരിപാലനവും നിരീക്ഷിക്കുന്നതിനായി ഒരു കണ്‍ട്രോള്‍ ആന്‍ഡ് റാപ്പിഡ് റെസ്പോണ്‍സ് സെന്ററും സ്മാര്‍ട്ട് കണ്‍ട്രോള്‍ സെന്ററും പ്രവര്‍ത്തനം ആരംഭിച്ചു. റോഡ് ശൃംഖല നിരീക്ഷിക്കാനും അടിയന്തര പ്രതികരണം വേഗത്തിലാക്കാനുമായി ആര്‍ട്ടിഫിഷ്യല്‍ ഇന്റലിജന്‍സും നൂതന സാങ്കേതികവിദ്യകളുമാണ് ഇവിടെ ഉപയോഗിക്കുന്നത്. ഹജ്ജ് സീസണില്‍ പുണ്യസ്ഥലങ്ങളിലേക്കുള്ള റോഡുകളില്‍ ദര്‍ബക് നൂര്‍ പദ്ധതി, മൊബൈല്‍ സര്‍വീസ് സ്റ്റേഷനുകള്‍, പ്രത്യേക ഹജ്ജ് റോഡ് ഗൈഡ് എന്നിവയുള്‍പ്പെടെ നിരവധി സേവനങ്ങളും പദ്ധതികളും അതോറിറ്റി നടപ്പിലാക്കി.