ന്യൂയോര്‍ക്ക്- അമേരിക്കന്‍ സ്‌ട്രൈക്കര്‍ ഫൊളാരിന്‍ ബാലോഗന് നേരിട്ട് ചുവപ്പ് കാര്‍ഡ് ലഭിച്ചതിനെത്തുടര്‍ന്ന് ഏര്‍പ്പെടുത്തിയ ഒരു മത്സരത്തിലെ വിലക്ക് താല്‍ക്കാലികമായി നീക്കാനുള്ള ഫിഫയുടെ തീരുമാനത്തിനെതിരെ അപ്പീല്‍ നല്‍കാന്‍ ബെല്‍ജിയത്തിന് അനുമതി ലഭിച്ചതായി പ്രമുഖ മാധ്യമമായ 'ദി അത്‌ലറ്റിക്' റിപ്പോര്‍ട്ട് ചെയ്യുന്നു. തിങ്കളാഴ്ച നടക്കുന്ന പ്രീ-ക്വാര്‍ട്ടര്‍ (റൗണ്ട് ഓഫ് 16) മത്സരത്തില്‍ ബാലോഗന് കളിക്കാനാകില്ലെന്നായിരുന്നു ആദ്യം കരുതിയിരുന്നത്. എന്നാല്‍ ഞായറാഴ്ച ഫിഫ ഈ വിലക്ക് താല്‍ക്കാലികമായി റദ്ദാക്കിയതോടെയാണ് വിവാദങ്ങള്‍ക്ക് തുടക്കമായത്.
ഫിഫയുടെ ഈ അപ്രതീക്ഷിത നടപടി വലിയ ചര്‍ച്ചകള്‍ക്ക് വഴിവെക്കുകയും റോയല്‍ ബെല്‍ജിയന്‍ ഫുട്‌ബോള്‍ അസോസിയേഷന്‍ ശക്തമായ പ്രതിഷേധവുമായി രംഗത്തെത്തുകയും ചെയ്തു. തങ്ങളുടെ മുന്നിലുള്ള എല്ലാ നിയമപരമായ വഴികളും പരിശോധിക്കുമെന്ന് ബെല്‍ജിയം ഫുട്‌ബോള്‍ അസോസിയേഷന്‍ വ്യക്തമാക്കിയിരുന്നു. ഇതിനെത്തുടര്‍ന്ന് ഫിഫയ്ക്ക് ഔദ്യോഗികമായി അപ്പീല്‍ നല്‍കിയ ബെല്‍ജിയത്തിന്, അതിനുള്ള അവകാശമുണ്ടെന്ന് ഫിഫ സ്ഥിരീകരിക്കുകയായിരുന്നു.
മത്സരം ആരംഭിക്കുന്നതിന് കൃത്യം 12 മണിക്കൂര്‍ മുന്‍പ് (അമേരിക്കന്‍ സമയം പുലര്‍ച്ചെ 5 മണിക്ക്) ഇരു ഫെഡറേഷനുകളോടും തങ്ങളുടെ ഭാഗം വിശദീകരിക്കാന്‍ ഫിഫ ആവശ്യപ്പെട്ടിട്ടുണ്ട്. യുറോപ്യന്‍ അല്ലെങ്കില്‍ കോണ്‍കാകാഫ് ഫെഡറേഷനുകളില്‍ ഉള്‍പ്പെടാത്ത ഒരു സ്വതന്ത്ര അംഗത്തെയാണ് ഈ കേസ് കേള്‍ക്കാനായി ഫിഫ അപ്പീല്‍ കമ്മിറ്റി നിയോഗിച്ചിരിക്കുന്നത്. എന്നാല്‍ തിങ്കളാഴ്ചത്തെ മത്സരത്തിന് മുന്‍പ് തന്നെ ഇതില്‍ അന്തിമ വിധി വരുമെന്ന് ബെല്‍ജിയത്തിന് ഉറപ്പൊന്നും ലഭിച്ചിട്ടില്ല.
നിലവിലെ സാഹചര്യത്തില്‍ ബാലോഗന് മത്സരത്തില്‍ കളിക്കാന്‍ യോഗ്യതയുണ്ട്. ബോസ്‌നിയ ആന്‍ഡ് ഹെര്‍സഗോവിനയ്‌ക്കെതിരായ നിര്‍ണായക ഗോള്‍ ഉള്‍പ്പെടെ ഈ ലോകകപ്പില്‍ മൂന്ന് ഗോളുകളുമായി അമേരിക്കയുടെ ടോപ്പ് സ്‌കോററാണ് 25-കാരനായ ഈ താരം. അതിനിടെ, ഈ വിഷയത്തില്‍ അമേരിക്കന്‍ പ്രസിഡന്റ് ഡൊണാള്‍ഡ് ട്രംപ് ഫിഫ പ്രസിഡന്റ് ജിയാനി ഇന്‍ഫാന്റിനോയെ നേരിട്ട് വിളിച്ച് സംസാരിച്ചതായും റിപ്പോര്‍ട്ടുകളുണ്ട്. ഫിഫയുടെ തീരുമാനത്തെ സ്വാഗതം ചെയ്ത ട്രംപ്, വലിയൊരു അനീതിയാണ് ഫിഫ തിരുത്തിയതെന്ന് തന്റെ സോഷ്യല്‍ മീഡിയ പ്ലാറ്റ്ഫോമായ 'ട്രൂത്ത് സോഷ്യലില്‍' കുറിച്ചു.
വിലക്ക് നീക്കിയ ഫിഫയുടെ നടപടിയെ അമേരിക്കന്‍ പരിശീലകന്‍ മൗറീഷ്യോ പോച്ചെറ്റിനോ ന്യായീകരിച്ചപ്പോള്‍, കടുത്ത പരിഹാസത്തോടെയാണ് ബെല്‍ജിയം കോച്ച് റൂഡി ഗാര്‍ഷ്യ ഇതിനോട് പ്രതികരിച്ചത്. ജൂലൈ അഞ്ച് എപ്പോഴാണ് ഏപ്രില്‍ ഫൂള്‍ ദിനമായി മാറിയതെന്ന് തനിക്കറിയില്ലെന്നായിരുന്നു ഗാര്‍ഷ്യയുടെ പരിഹാസം. ഫുട്‌ബോളിന്റെ അന്തസ്സും സുതാര്യതയും തകര്‍ക്കുന്ന തീരുമാനമാണിതെന്നും ബെല്‍ജിയം ഫെഡറേഷന്‍ ആരോപിച്ചു.
Related News
