ദമാം: ആറു മാസത്തോളമായി ദമാം ഇന്ത്യന്‍ ഫുട്‌ബോള്‍ അസോസിയേഷന്‍ (ഡിഫ) സംഘടിപ്പിച്ചുവരുന്ന എച്ച്.എം.ആര്‍-ഡിഫ ചാമ്പ്യന്‍സ് ലീഗിന് തുക്ബ ക്ലബ് സ്റ്റേഡിയത്തില്‍ ഉജ്ജ്വല സമാപനം. ഡിഫയില്‍ രജിസ്റ്റര്‍ ചെയ്ത 24 ടീമുകളെ എ, ബി, സി എന്നീ മൂന്ന് ഡിവിഷനുകളായി തിരിച്ചാണ് ഡിഫയുടെ പ്രഥമ ലീഗ് ഫുട്‌ബോള്‍ മേള സംഘടിപ്പിച്ചത്.
തുക്ബ ക്ലബ് സ്റ്റേഡിയത്തില്‍ നടന്ന ആവേശകരമായ കലാശപ്പോരാട്ടത്തില്‍, എ-ഡിവിഷനില്‍ ഇ.എം.എഫ് റാക്കയെ പരാജയപ്പെടുത്തി ഖാലിദിയ എസ്.സി വിജയികളായി. ബി-ഡിവിഷനില്‍ മാഡ്രിഡ് എഫ്.സി, ആര്‍.സി.എഫ്.സി ജുബൈലിനെയും, സി-ഡിവിഷനില്‍ കെപ്വ എഫ്.സി, സ്‌പോര്‍ട്ടിങ് ഖാലിദിയയെയുമാണ് പരാജയപ്പെടുത്തി കിരീടം ചൂടിയത്.
ടൂര്‍ണമെന്റിലെ മികച്ച കളിക്കാരായി എ-ഡിവിഷനില്‍ നിയാസ് (ഇ.എം.എഫ്), ബി-ഡിവിഷനില്‍ ഷാജഹാന്‍ (ആര്‍.സി.എഫ്.സി), സി-ഡിവിഷനില്‍ അസ്ലഹ് (എം.എഫ്.സി ജുബൈല്‍) എന്നിവരെ തിരഞ്ഞെടുത്തു. മറ്റു മികച്ച കളിക്കാരായി അജ്മല്‍, അമീന്‍, യാസിര്‍ റഹ്‌മാന്‍ (ഡിഫന്‍ഡര്‍), ജുനൈസ്, ഫായിസ്, ഫവാസ് (ഗോള്‍കീപ്പര്‍), ജസീം, ഫാരിസ്, ഫൗദ് (ടോപ് സ്‌കോറര്‍) എന്നിവരെയും തിരഞ്ഞെടുത്തു. കലാശപ്പോരാട്ടത്തിലെ 'പ്ലയര്‍ ഓഫ് ദ മാച്ച്' പുരസ്‌കാരത്തിന് ഹാശിം (ഖാലിദിയ), അബൂബക്കര്‍ (മാഡ്രിഡ്), ഫൗദ് (കെപ്വ) എന്നിവര്‍ അര്‍ഹരായി.
സ്വദേശി റഫറിമാരായ മുഹമ്മദ് താബിത്, ഹമദ് അല്‍ ഈസ, താരിഖ് അല്‍ഖൈസ്, അബ്ദുറഹ്‌മാന്‍ വാണിയമ്പലം എന്നിവര്‍ മത്സരം നിയന്ത്രിച്ചു. കുടുംബിനികളടക്കം നിരവധി കായിക പ്രേമികള്‍ കലാശപ്പോരാട്ടം വീക്ഷിക്കാന്‍ സ്റ്റേഡിയത്തിലെത്തിയിരുന്നു. ഡിഫ പ്രസിഡന്റ് ഷമീര്‍ കൊടിയത്തൂര്‍ ഗ്രാന്‍ഡ് ഫിനാലെ ഉദ്ഘാടനം ചെയ്തു.
ദമാമിലെ സാമൂഹിക, സാംസ്‌കാരിക, ബിസിനസ് രംഗത്തെ പ്രമുഖരായ ഡോ. മുഹമ്മദ് ഷാഫി, അഫ്‌സല്‍ അമീര്‍, ഇജാസ്, കൗസര്‍, ലബീബ്, ഷൗഫര്‍, കെ.പി. ഹുസ്സൈന്‍ സാഹിബ്, ഷാജി മതിലകം, ലിയാക്കത്ത് കരങ്ങാടന്‍, നൗഫല്‍ പാരി, വില്‍ഫ്രഡ് ആന്‍ഡ്രൂസ്, സക്കീര്‍ വള്ളക്കടവ്, റഫീഖ് കൂട്ടിലങ്ങാടി, ജൗഹര്‍ കുനിയില്‍ എന്നിവര്‍ സമാപന ചടങ്ങില്‍ സംബന്ധിച്ചു. റാഫിള്‍ കൂപ്പണ്‍ നറുക്കെടുപ്പില്‍ ബുള്ളറ്റിനുള്ള ഒന്നാം സമ്മാനത്തിന് മുഹമ്മദ് ഷജീല്‍ (യു.എഫ്.സി) അര്‍ഹനായി.
ഡിഫ ഭാരവാഹികളായ ആസിഫ് മേലങ്ങാടി, ജുനൈദ് നിലേശ്വരം, സഫീര്‍ മണലോടി, ഫസല്‍ ജിഫ്രി, ടൈറ്റസ് വിന്‍സന്റ്, റഷീദ് ചേന്ദമംഗല്ലൂര്‍, ഷമീം കുനിയില്‍, അന്‍ഷാദ്, റാസിക് വള്ളിക്കുന്ന്, മുഹമ്മദ് ജാഫര്‍, അന്‍വര്‍ സജിത്ത്, ഫത്തീന്‍ മങ്കട എന്നിവര്‍ ടൂര്‍ണമെന്റിന്റെ സംഘാടനത്തിന് നേതൃത്വം നല്‍കി.
ചിത്രം: ഡിഫ ചാമ്പ്യന്‍സ് ലീഗില്‍ കിരീടം ചൂടിയ ഖാലിദിയ, മാഡ്രിഡ്, കെപ്വ ടീമുകള്‍.
